* * *

Аддза ылысянь картина:
Гӧсьтъяс пызан гӧгӧр,
Быд морт водзын вина,
Быд ныр, кыдзи ӧгыр…

Дас кык морт сэн лыдӧн;
Мелі чужӧмаӧсь
Пукалӧны быдӧн
(Тӧдчӧ бур йӧз таысь).

Мукӧд копыртчӧмны
Этша морта-мортлань,
Мукӧд бергӧдчӧмны
Вина — шаньджык сортлань.

Сэтӧн куим дама,
Гортса идеалъяс;
Куим том морт рама
Лэптӧмны бокалъяс…

Югыдӧсь сэн синъяс
И оз тӧдны чинъяс…
Сёрнитӧны… Лёк кыв
Ылын понда ог кыв.