1987ʼ ВОСЯ ЯНВАР 11ʼ ЛУН


Дзуртысь тюпеня шычкыртӧ Войпӧль,
Пашляк лыйсьӧмысь сыркмунлӧ сикт.
Коклябӧрӧдзыс гыӧрзьӧм тополь
Беддя косіник дедӧ кодь дзик.

Коми Войпӧльыс збыльысь тай дурмис,
Быттьӧ юӧма коддзӧдан морс.
Весиг йӧлӧга шӧвк бӧжа ур моз
Корсьӧ дзебсянін — пожӧм пу горс.

Весиг, тӧдӧмысь, ош тӧвъян жыръяс
Ниртӧ лапанас турдалӧм пель.
Татшӧм кӧдзыднад ассьыс кузь нырсӧ
Сӧмын оз кынтав дзор Мороз-пӧль.

Войвыв саридзсянь пӧлясьӧ тӧлыс,
Лэбач гӧлӧс оз некутшӧм кыв.
Гортӧ ӧшинь пыр вӧзйысьӧ тӧлысь,
Мед эз кынмы сэн карнана ныв.