1866ʼ ВО ПЕТІГӦН

Тэ мӧдін инӧ сэтчӧ, кытысь некод
Оз бергӧдчывлы. Ен мед лоас тэкӧд
И хроника мед тэнӧ гаралас
Пыр, кытчӧӧдз ас нэмыс нюжалас!
Кӧть йӧзлысь лэдзин тшӧтш и тэ тай вирсӧ,
И герцогъяслысь нӧйтін ёна нырсӧ,
Кӧть, колян и став локтан вояс моз,
Эн гажӧд му тэ, коньӧр мортлысь поз,
Кӧть йӧзӧс, кыдз став ті-вок, пӧръялін тэ,
Кӧть велӧдӧмшӧн пыдди ньӧръялін тэ
Бур пиянсӧ бур комилысь, кӧть мем
Тэ эн вӧч бурсӧ нисьӧ лёксӧ нем, —
Ен тэкӧд! Войтыр важ шогъяссӧ асьныс
Зэв кокньыда тай, медбӧр, вунӧдласныс!
Морт ӧлӧм бӧрӧ бура бӧрыньтчы
И сэн мед оз кыв сэсся тэнад шы!
Сэн ӧтлаасьмысьт Адам нэмкӧд сувтӧ
И виччысьӧ тшӧтш менӧ; енвевт увті
Мем недыр, гашкӧ, лоас ветлыны;
Тан ловлы пуктӧм дыр-ӧ ӧзъявны?