ЁЛЬДІН


Тан нинӧм торъяыс: кузь ласта, вывтас рӧч,
Кык ичӧт кось, а сэсся вомын пыр и вомын.
Збыль шуа, татчӧ ме эг волыв нин во комын,
Но вои — сьӧлӧм тіпкӧ менам йӧймытӧдз.

Со коз и вывтас рӧч, кӧн вӧвліс миян стан,
Кӧн дӧлавліс тӧв йылын еджыд дӧра вонным.
Эг сэн-ӧ вӧчлыв туисъяс ме ичӧт зонмӧн,
Кор рытын чӧскыд ужин дасьтіс менам мам?!

Ме дзорга ю вылӧ. Тат сійӧ ты кодь лӧнь
И лӧсталӧ, кыдз кельыд, мича лӧз шӧвк вӧнь,
И гӧгӧр бузакылӧ сэні гырысь чери.

— Лёль катӧ, лёль! — ме кыла гӧлӧс шы.
Тадз Вась чож горзывліс, кык аддзиг гӧгрӧс гы.
И нимкодь казьтыны мен важся турун керӧм!

1967