ЯЛТА


Со рытыв-лунвылын Ай-Петри лэптӧ юр,
Сы весьтын гыалӧ веж гыӧн Чёрнӧй море.
Лӧз енэж шӧрсянь синтӧ ӧзйысь шонді ёрӧ, —
Кӧть погребӧ тэ пыр, тэн ыркыдін оз сюр.

Но Набережнӧй улича — «Ялтинскӧй Бродвей»,
Кӧть мореыс и лыдтӧм купайтчысьӧн пуӧ,
Оз овлыв тыртӧм, — сэні лыдтӧм йӧз век жуӧ,
И ӧти дзугйӧ ставлӧн кысьӧ олӧм вей *.

Орешникъяс да пальма сывъяс улын лов
Зэв ветлӧ кокниа, пӧсь вашкӧдчӧ любов.
Ни тӧжд, ни сылы шог — дзик ставсьыс сійӧ ылын.

Оз ю тан рыт ни асыв некод прӧстӧй ва, —
Быд вожын автомат, сэсь лэччӧ сур, вина,
И сьӧлӧм мӧвкъялӧ янтарнӧй гыяс вылын.