ЮРКА ТЫ

Маджа сиктын оліс ӧтик крестьянин. И сылӧн вӧлі ӧти пи. Нимыс вӧлі Юрка. Кор сійӧ быдмис, лои дас арӧса, кутіс ветлыны чери кыйны. Ачыс тушаӧн вӧлі ыджыд, ён. Батьыс эз тӧд, кутшӧм ён сылӧн пиыс. Вердӧ вӧлі омӧля. Сёян вӧлі оз тырмы. Кор мунас чери кыйны, вуграсьны, оз вӧлі вугрась, а мунас видз вылӧ мӧсъяс дінӧ да гусялас ӧтик мӧс или кукань. Ваяс сэтчӧ, кӧні вӧлі узьӧ-олӧ. Куляс кучик мӧслысь и ульӧн заводитас сёйны яй. Тадз вӧлі олӧ гожся кадӧ. Мӧс да кукань гусялӧмӧн сёйӧ и перйӧ аслыс кынӧмпӧт. Кор уна вошласьны пондіс сиктысь мӧс да кукань, заводитісны видзны видз вылын. Ӧти лунӧ ӧти нывка казяліс, мый Юрка мышку вылас нуӧ кукань. Сійӧ нылыд вӧтчас Юрка бӧрся: кытчӧ, мыйла нуӧ куканьсӧ? Воис Юрка оланінас, заводитіс кульны куканьлысь ку. И сэки нылыд мунас сиктӧ бать дінас да висьталас, мый Юрка мышку вылас нуис кукань, виис и кулис кучиксӧ. Нылыс висьталіс батьыслы, батьыс муніс сиктӧ и висьталіс уна мужиклы. И мунісны Юрка дінӧ, мый сійӧ вӧчӧ уль яйнас. Кор воисны Юрка дінӧ, Юрка Эжва дорын пукалӧ и вуграсьӧ. Юалісны: «Мый вӧчан, Юрка?» Юрка висьталіс: «Вуграся!» Мужикъяс мунісны Юрка оланінӧ. Сэсь аддзисны уна юр да кок, гӧгӧрвоисны, мый Юрка уна нин сёйӧма мӧс да кукань. Кор став сиктыс пондіс тӧдны, мый Юрка виялӧ и сёйӧ мӧсъясӧс да куканьясӧс, вӧчасны сиктын ӧтувъя собрание, мый вӧчны Юркакӧд. Собрание вылын шуасны, мый Юркаӧс колӧ кыдзкӧ вины. И став йӧзыс полӧны Юркаысь, ӧткӧн сы дінӧ матыстчыны оз позь. Сылӧн сила выйим зэв уна. Ӧтчыдӧн сёйӧ дзонь кукань туша ульӧн.

Тайӧ сиктас, Маджаын, Юрка батьлӧн вӧлі вок, кодлӧн вӧлі ӧтик юын мельнича. И сійӧ мельникыс чукӧртіс гӧсьтъясӧс аслас чужан лунӧ. И корис Юркалысь став рӧдвужсӧ и тшӧтш Юркаӧс. Юрка вина эз на юлывлы, некӧн на эз вӧв гӧсьтӧн. Кор воис дядь ордӧ, дядь сійӧс пуксьӧдіс тшӧтш пызан сайӧ. Пызан сайын пукалӧ уна рӧдвуж Юркалӧн. Юӧны яндӧваысь вина да сур. И тшӧтш сетісны яндӧваӧн вина Юркалы. Юрка юис, кажитчис винаыс зэв бур. Юис ӧтик яндӧва, юис мӧдӧс. Юрка век оз коддзы. И ставсӧ юис квайт яндӧва вина. Юркалӧн заводитіс бергавны юр вежӧрыс. Кор казяліс Юркалӧн дядь, мый Юрка коддзис, и шуӧ Юркалы: «Мун комнатаӧ, вод да шойччы!» Юрка мунас комнатаӧ, водас шойччыны. И гажа юрнад унмовсяс зэв сьӧкыд унмӧн. Дядь казялас и висьталас мужикъяслы и тшӧтш Юрка бать-мамлы, мый Юрка узьӧ зэв бура. Сэки Юркалӧн бать-мам ыстасны рӧдвуж пиысь вайны ыджыд чери кыян тыв и уна гез. Кор ваясны тыв да уна гез, петасны комнатаӧ, кӧні узьӧ Юрка. Ставӧн пернапасасясны и заводитасны Юркаӧс тывйӧн гартны. Кор гартасны тывйӧн и заводитасны тӧбны тыв вывті гезйӧн, медым оз вермы киӧн да кокӧн Юрка бергӧдчыны. Садьмас Юрка, а сылӧн оз вӧрзьы ки ни кок. И Юрка шуас: «Мый ті менӧ кӧсъяд вӧчны?» Некод Юркалы оз нем висьтав. Юркаӧс босьтасны, петкӧдасны ывлаӧ и пуктасны телега вылӧ. Кор Юркаӧс заводитасны нуны телегаӧн, Юркалӧн бать да дядь тшӧктасны бабаяслы пуны ыджыд пӧртйӧн рок.

Нуасны Юркаӧс ты дорӧ. Пуктасны телегаысь му вылӧ. И мунасны телегаӧн мельнича дорӧ. Мельнича дорысь пуктасны кык ыджыд изки и ваясны ты дорӧ. Тыын вӧлі ыджыд пыж. Пыжӧ сӧвтасны кык изки и Юркаӧс. И петас пыжӧн ю шӧрӧ уна мужик. Кӧрталасны Юркаӧс изки бердӧ. И чӧвтасны Юркаӧс изкиӧн ты шӧрӧ. Юрка кыпӧдчылас кыкысь да шуас: «Кужинныд вины менӧ, кӧрталінныд ки и кок!» Тадз Юркаӧс вӧйтісны ыджыд ты шӧрӧ. Мужикъяс петісны берегӧ, чӧвтісны ставӧн пернапас, и Юркалӧн дядь шуӧ мужикъяслы: «Но, мунам ме ордӧ! Менам гортын пуисны кык пӧрт рок и сійӧс ӧти паньӧн паньыштам, медым ставнымлы ӧтмында лои грек Юрка виӧмысь!» Воисны Юрка дядь ордӧ сиктса мужикъяс, кык пӧрт рок дорӧ, и паньыштісны быдӧн ӧтчыдысьӧн рок, медым лои грек ставыслы ӧтмында.

Кутшӧм тыӧ виисны Юркаӧс, нимсӧ тыыслы пуктісны Юрка ты.