ЮМОВ ГАЛАНКА ВА
Юалан кӧ талунъя сиктса челядьлысь, мый сійӧ галанкаыс, ӧдвакӧ кужасны висьтавны. А менам челядьдырйи сійӧс пӧшти быд град йӧрын вӧдитлісны. Сы бӧрся ыджыд дӧзьӧр оз ков. Ӧшинювса виричын быдтан рӧсада. Пуктан торъя град вылӧ. Вежон кымын киськалан. А сэсся сійӧ ачыс нин быдмас. Корсюрӧ сӧмын ёгсьыс весалыштан.
Мыйлакӧ миян кадӧ ӧгурцытӧ, помидортӧ да капустатӧ эз ёна вӧдитлыны. На бӧрся ӧд бур дӧзьӧр колӧ. Да и теплицаясыд сэки эз на вӧвны. Сэк жӧ верстьӧ лун и вой мырсисны колхозлӧн муяс да видзьяс вылын. Кытысь нин вичмӧдны кадтӧ ӧгурцы да помидор быдтӧм вылӧ. Бур мый нӧшта лук да чеснӧк йывсьыд эз вунӧдлыны.
А галанка бӧрсяыд збыльысь ыджыд дӧзьӧр оз вӧлі и ков. Бура быдмыліс. Гожӧм помланьыс сылӧн пашкыр коръясыс вевттьылісны дзоньнас мусӧ. А ачыс галанкаыс сідзи и вӧзйысис ортсӧ. Быттьӧ кӧсйис петны мусьыс. Сідзкӧ, бур урожай лоас, нимкодьпырысь мӧвпавлісны ас кежысь верстьӧ. Коркӧ сентябр заводитчигӧн сійӧс нетшкылісны. Гырысь мича галанкаясысь быдса ыджыд чукӧр артмывліс град вылын. Верстьӧ весавлісны миянлы медыджыд галанкасӧ. Сыысь юмолыс челядьлы сійӧ кадас нинӧм эз вӧв. А сэсся мам пулывліс галанка ва, кӧдзӧдлывліс сійӧс гӧбӧчын. И ми окотапырысь панявлім тайӧ сорвасӧ нянь сорӧн. Сійӧ вӧлі компот кодь.
Но торйӧн нин сьӧлӧм вылӧ воліс косьтӧм галанка. Весалӧм бӧрас сійӧс вундавлісны, тэчлісны ыджыд кӧрт листъяс вылӧ да сюйлывлісны пӧжны кӧдзалыштӧм нин пачӧ. Тайӧ пӧжӧм сьӧд рӧма галанкаторъясыс вӧліны торйӧн нин юмолӧсь. Косьтӧм галанкаыс миянлы вӧлі медся ыджыд чӧсмасянторйӧн. Сійӧс пӧжигас керка пытшкӧс тырліс аслыссикас чӧскыд дукӧн.
Бур сорваӧн вӧлі галанка ваыс тӧвся тӧлысьясӧ, кор сувтліс мӧсным. Сійӧс сэки панявлім йӧв пыдди. Медбӧрын ми, челядь чукӧр, весиг дӧзмывлім. Мый нӧ тайӧ, пыр галанка ва да галанка ва. А кор нӧ йӧлыс лолас? Мамным пыр жӧ вӧлі вомалыштас миянӧс:
— Панялӧй, мый эм. Бур, мый тайӧ пуктасыслы Енмыс сетіс чужны.
И тӧвбыд кежлӧ тырмыліс галанкаыс. Медбӧрын сюрукным вайсьыліс. Вайсьӧм бӧрас мам чӧсмӧдліс миянӧс чӧжйӧлысь пӧжӧм чӧскыдсьыс-чӧскыд рыськӧн. Но корсюрӧ пыр на окотапырысь панявлім галанка ватӧ вомкӧр вежӧм могысь.
А нӧшта сійӧ шоммӧм бӧрас вӧлі дзик ырӧш кодьӧн. Тайӧс тӧдӧмӧн Ивадорса верстьӧ мужичӧйяс праздникъяс бӧрын корсюрӧ пыравлісны миянӧ.
— Настук, абу-ӧ шома галанка ваыд, юрным висьӧ, — шыӧдчывлісны найӧ мам дінӧ. И мам петкӧдліс гӧбӧчысь миска тыр галанка ва:
— На, юӧй, тайӧ добраыд абу жаль.
И мужичӧйяс шома галанка ватӧ юӧм бӧрын сӧмын ружӧктывлісны:
— Ок и чӧскыд вӧлӧма. Пыр жӧ лӧсьыдджык лоис.
А тулыснас ӧшинювса вирич вылӧ мам бара кӧдзліс галанка кӧйдыс. Тадзи вӧлі менам челядьдырйи эз ӧти во. Но сэсся и миян, и мукӧд семьяясын эновтчисны галанкаысь. Мӧд сикас град выв пуктас кутісны вӧдитны. Кӧть эськӧ ӧнія учёнӧй-биологъяслӧн висьталӧм серти, галанкаад быд сикас витаминыс ёна уна вӧлӧма. Важ йӧзыд, тыдалӧ, и учёнӧйястӧгыд бура тӧдлӧмаӧсь та йылысь. Сійӧн и дзоньвидзаӧн быдмылӧмаӧсь. А ме ӧні на вӧтасьла чӧскыд вӧтъяс: быттьӧ пукала кильчӧ вылын да йира галанка. И весиг вомӧй сэки узигас юммывлӧ.
