ЮГЫД МОЗЫН


Мозын юӧ чӧвтіс алӧй шӧвксӧ кыа,
Ӧзйис юыс, кывтіг мореӧ лӧнь шыӧн.
Гудӧк шы бӧрся лӧз енэжӧ сэк ачыс
Нӧрыс йывсянь нывлӧн мича сьылӧм качис:

Югыд Мозын,
Дона ю,
Ылӧ сьыланкыв тэ ну!
Ну да висьтав море сайын:
Долыд овны Коми крайын, — 
Гӧгӧр дзоридзалӧ му!

Эрдыс лывкнитіс зэв лӧсьыд, мича шыӧн,
Мозын мӧвкнитіс хрустальнӧй аслас гыӧн.
Сэні берегъяссянь ӧвтчис озыр шепӧн
Буретш сійӧ, мый зіль уджныс йӧзлы сетӧ.

Кӧнкӧ ылын, пемыд вӧрсянь, кыліс йӧла, — 
Сэні рельсъяс вывті грымӧдіс сталь вӧла.
«Туки-туки, туки-туки», — сьыліс сійӧ,
Вӧрсӧ югдӧдіс син ёран аслас биӧн.

Паськыд борднас алӧй кыа лэбис ылӧ,
Оз нин важӧн ӧгыр рӧмыс ӧзйы сылӧн.
Сӧмын ланьтны тай оз вермы кыпыд сьылӧм, — 
Вӧръяс весьтын асывводзӧдз сійӧ кылӧ:

Югыд Мозын,
Дона ю,
Ылӧ сьыланкыв тэ ну!
Ну да висьтав море сайын:
Долыд овны Коми крайын, — 
Гӧгӧр дзоридзалӧ му!

1961 во.