ЭКЗАМЕН

— Экзаментӧ сдайтны, том йӧз, абу сьӧкыд, — надзӧникӧн мойдӧ дежурство дырйи Семен Вась.

— Главнӧйыс, колӧ экзаменаторсӧ бура гӧгӧрвоны, сылысь сямсӧ тӧдмавны. Вот ме коркӧ милициялӧн высшӧй школаын думышті заочнӧ велӧдчыны, экзаменъяс вылӧ муні. Кӧть эськӧ уджалан опытыд ыджыд нин, а тӧдӧмлунъясыд абуӧсь. Роч кывйысь экзамен вылӧ пыри. А сэні сэтшӧм интеллигентнӧй профессор пукалӧ, гӧгрӧсіник тошка, ӧчкиа, ачыс абу на и пӧрысь. Первой сетіс меным гижан удж, кодӧс помалӧм бӧрас босьтіс, син пырыс нуӧдіс, видзӧдліс ме вылӧ нюмъялана синъяснас ӧчки вывтіыс и заводитім сыкӧд варовитны.

— Да, том морт, — шуӧ меным сійӧ, — правописание да грамматика тіян чотӧны кыкнан кок вылас. И ёна чотӧны! Тіян кутшӧм национальностьныд?

— Ме коми, — вочавидза ме сылы.

— А роч классикъясыслысь сочинениеяссӧ лыддьылінныд?

— А кыдзи жӧ! Мый школьнӧй программаӧ сюйӧма, ме став книгасӧ лыдди.

— Но, сідзкӧ, висьталӧй, мый йылысь гижӧма Достоевский аслас «Преступление и наказаниеын»?

— «Преступление и наказаниеын»? Ой, профессор ёрт, Достоевскийыдлысь тайӧ книгасӧ ме буретш эг и лыддьыв. Кызвын книгасӧ лыддьылі, а вот тайӧ мыйлакӧ эз сюрлы.

— Жаль, — профессорыд нюмъялігтырйи ме вылӧ видзӧдӧ. — А Чернышевскийлысь «Что делать» ті лыддинныд? Вера Павловналысь нёльӧд вӧтсӧ тшук помнитанныд?

Кутшӧмкӧ Вера Павловналысь нёльӧд вӧт юасьӧ! Ме и ассьым тавойся вӧтсӧ ог помнит-а.

— Профессор ёрт, меным зэв яндзим, но тайӧ уна вӧта книгасӧ ме эг жӧ лыддьыв.

— Да? Жаль, жаль. Но, а кутшӧм книга ті лыддьылінныд?

— А та кындзи ме нинӧм эг лыддьыв.

Серамыс петіс профессорыдлӧн.

— Классикъясӧс, том морт, колӧ тӧдны!

— Но ме старайтча, мый сюрас, век лыддя. Вот гортын менам Лермонтовлӧн «Полное собрание сочинений» эм.

Нӧшта на гораджыка серавны кутіс профессорыд.

— Молодеч! — шуӧ меным, ачыс ӧчкисӧ пӧрччис да ныр чышкӧдӧн синвасӧ косӧдӧ. — Нинӧм он шу, молодеч! Тіян гортса библиотекаын эм нин Лермонтовлӧн «Полное собрание сочинений», сідзкӧ, ті, том морт, восьлаланныд наукалӧн медводдза радъясын. Но кыдзи та бӧрын верман пуктыны тіянлы «двойка»? Сӧмын «удовлетворительно»!

Ме зэв дӧвӧльнӧя чеччи да мӧдӧдчи ӧдзӧслань, а профессорыд чӧвтіс бӧрвывсянь:

— Сӧмын водзӧ вылӧ тӧдӧй, том морт, Лермонтовлӧн «Полное собрание сочинений» некор на эз петавлы!