ШЫР, НИНКӦМ ДА ГАДЬ

Важӧн олісны-вылісны шыр, гадь да нинкӧм ӧтилаын. Зэв дружнӧя олӧны. Мыйкӧ сэсся налӧн эз кут тырмыны. Колӧ вӧлі мыйлакӧ вӧрӧ ветлыны. Кыйсьыны, буди, сёянтор корсьны.

И шуӧны:

— Вайӧ ми ветлам вӧрӧ!

А вӧрас мунны вӧлі колӧ кутшӧмкӧ шор вуджны.

— Мунам, ветлам ӧтилаын ставӧн! Ӧтик-ӧтиӧн ми шортӧ вуджны ог вермӧ, артельӧн мунам!

Шор дорӧдзыс мунісны найӧ. И некыдз оз вермыны шортӧ вуджныыд. Ӧти ног заводитласны, мӧд ног заводитласны. Оз вермыны некыдз вуджныыд шортӧ. Шыр шуӧ:

— Час, ме ветла кытчӧкӧ да оз-ӧ кӧть мыйкӧ сюр, ог-ӧ вермы вайны вомӧн пуктыштны кутшӧмкӧ пос?!

Шыр гӧняйтліс, гӧняйтліс, гӧняйтліс, а найӧ виччӧны шор дорын, нинкӧм да гадь. Шыр кыськӧ идзас си вайис, кузькодь рудзӧг идзас. Кыдзкӧ тай сэсся шор вомӧныд шыбитісны, дай пос лоис. Но некод оз лысьт первой вуджны, мӧда-мӧдсӧ ыстӧны:

— Шырӧ, шырӧ, вудж, вудж!

А шыр шуӧ:

— Гаддьӧ, гаддьӧ, вудж, вудж!

Нинкӧмӧс оз ыстыны, сійӧ чӧв пласьтвидзӧ-куйлӧ. Ыстысисны, ыстысисны, дай шыр заводитіс вуджны. Шӧрӧдзыс кымын муніс, идзасыд лайкнитчис, а шорыс вӧлі зэв визыв, шырыд прутькысис-усис ваад. Уйис да мӧдарладор берегӧдзыс и кайис, эз нин тайӧ дор берегас слӧймы. Гаддьыд сераліс, ваксис да ваксис шыр вылад и потіс.

А нинкӧм сэтӧні куйлӧ-пласьтвидзӧ ӧтнас пос дорын. Шыр бара локтіс, матыстчис дай шуӧ:

— Нинкӧм, нинкӧм, вудж вай татчӧ, тані быдторйыс эм. Татчӧ некод на эз волыв, ме неуна кытшовтышті и быд сёянсӧ аддзылі. Ме тэнӧ яйӧн понда вердны.

А нинкӧм шуӧ:

— Ме ог кӧсйы тэкӧд дружитны! Мен тырмас. Мен колӧ морт. Ме морткӧд любита дружитны. Ме тіянкӧд татчӧ пропадита.

Шыр бӧр уяс мӧдарас, нинкӧмсӧ пуктас чом пыдди, сэн овмӧдчас, поздысяс и сэн олас сэсся.