ШУДА КОЛЯН, ЧУЖАНІН


Пос ю вомӧн, кӧні вуджанін,
Шевкнитӧма бордсӧ берег дорас.
Шуда колян, дона чужанін,
Менӧ ылі туйӧ олӧм корис.

Менӧ кыскис ылі тӧдтӧм му,
Арся зэрӧн зӧркӧдчис выль олӧм.
Эн вай чӧв ов, мыйкӧ сӧмын шу,
Гӧгӧрво тэ лоӧмторлысь колӧм.

Эскы, абу медводдзаыс ме,
Ӧд быд лэбач кольӧ ассьыс позсӧ...
Мый нӧ сэтшӧм нора, сідзкӧ, тэ
Нюжӧдӧмыд бӧрсянь пелысь розсӧ?

Сӧмын тірӧ кокъяс улын пос,
Сыркъялӧмӧн бӧрдӧ нора шыӧн.
Со нин сылӧн пом, и муыс кос,
Сӧмын юыс ӧвтчӧ аслас гыӧн.