ШОНДІ ПЕТӦМ


Ак, кутшӧм гажа асывводз!
Вой кольӧма нин. Шы ни тӧв...
Неуна кӧдзыд, кымӧр шоч,
А ылын, кылӧ, гӧрдлӧ вӧв.

Йӧз узьӧ. Эжва быттьӧ визь.
Му вывті нюжӧдчӧма югыд
И вӧрӧ муртса корнас кыдз.
Вой югдіс... Зарни шонді регыд!..

Ва вылын лӧнь, быд чери ворсӧ,
Да лыва кузя дзодзӧг чукӧр
Зэв тшапа мунӧ, каля горзӧ...
И мыччысьӧ нин шонді югӧр.

Вӧр ловзис... Дугдывтӧг кай сьылӧ.
Пу йылын зарни визь нин вӧрӧ...
Гаж шонді лэдзӧ нин му вылӧ...
Йӧз, садьмӧй, чеччӧй, уджъяс керӧй.