ШОГ ПЕКНИЧА

Петырлӧн талун вомыс шердын кодь. Тӧданныд-ӧ, мыйла? Но кутшӧм гажтӧмӧсь тіян мӧвпъясыд, лыддьысьысь. Машина, сьӧм да нӧшта кутшӧмкӧ озырлункӧд йитанныд Петырлысь нимкодясьӧмсӧ.

Делӧыс мӧдторйын... Том зон тӧрыт ассьыс сьӧлӧмшӧрсӧ, мича нылӧс колльӧдіс. Кымынӧдысь нин! Сэсся тай сывйыштіс, топӧдіс морӧс бердас да шӧпкӧдӧ:

— Кор нӧ гижсям, Наста?

Ӧнія нывъястӧ ӧмӧй мыйӧнкӧ чуймӧдан. Воча нюмдіс: кӧть пӧ аски.

Петыр сатшкысис нывлы пӧсь вом дорас, чӧскыда окыштіс.

— Аски и кежала, аски...

Аскинас буретш пекнича вӧлі.

Чеччис водз, прамӧя нуръясьтӧг и лыйис ывлаӧ. Кокыс печласьӧ-нуӧ сійӧ керкаланьыс, кӧні быд вежон мичмӧдӧм машинаяс сулалӧны.

Юрсӧ чатӧртіс, лыддьӧ. Уджалӧ пӧ ӧкмыс чассянь. Шыӧдчӧм босьтӧны сэтшӧмтӧ лунъясӧ... Гижӧдӧны...

Син пырыс лэдзис шыпасъяссӧ, а сьӧлӧмыс нӧшта мӧдіс нетшкысьны — гым да гым кылӧ.

— Мый нин та дырасӧ лыддян? — кыліс Петыр мыш сайсьыс кыз гӧлӧс.

Бергӧдчис. Сы водзын сулаліс джекпом кодь дядьӧ. Ичӧтик тушаа, куш юра.

— Видзӧда тай: кор да кыдзи...

— А мый видзӧднысӧ. Талун пекнича — юксян лун.

— Кутшӧм юксян лун?

Шыльыд юра дядьӧлӧн весиг гӧгрӧс чужӧмыс топавліс, быд чукыр вежыньтчыліс. Здук видзӧдіс чуймӧм Петыр вылӧ, тыдалӧ, мӧвпаліс, мый крапкыны воча. Но ылӧсӧ эз мӧдӧд, том зонмыс, кутю кодь на.

— Олыштан вӧльнӧй светас, гашкӧ, и гӧгӧрвоан. Юксян луныс сійӧ... сійӧ, кор гозъя торйӧдчӧны ӧта-мӧдсьыс. Муснысӧ зыртӧ, сідзкӧ. Верӧссӧ йирӧ гӧтырыс. Овлӧ и мӧдарӧ, но гежӧда.

— А-а-а. Дӧвгис жӧ ӧні, — гогнитіс юрнас Петыр. Сёрнитігмоз и пырисны керкаӧ, пуксисны лабичӧ.

Олӧма дядьӧ, шусис тай Иванӧн-а, кабраліс дженьыдик чуньяса кинас рудов картуз, зумыша видзӧдіс ӧшиньӧ. Петырлысь нюмсӧ быттьӧ чышкыштісны. Гӧгӧрвоис — мыйкӧ дойдӧ мортыслысь сьӧлӧмсӧ.

— Ме тай бумага талун вайи-а, — дзуртыштіс Иван да сюйис кисӧ пытшкӧс зептас.

Перйис нёль пельӧ кусыньтӧм кабалатор. Пыдісянь ышловзис, пычнитіс сё пудъя кывъяс:

— Ог сэсся вермы тадзисӧ овны. Кӧть тэ эскы, кӧть эн, а ог вермы!

— Кодкӧд он? — челядь руӧн артмис Петырлӧн.

— Кодкӧд да кодкӧд! Аслам гӧтыркӧд. Сы могысь и кежи татчӧ. Гӧгӧрвоин?

— Гӧгӧрвои, буракӧ. А ме гӧтрасьны. Тӧдмавны пыри — мый да кыдзи...

— А сэсся? — шевкнитіс картуза кинас дядьӧ.

— Гижсям... Настакӧд...

— Гижсьы, гижсьы, зонмӧй. Зэв нин лудӧ, тыдалӧ, кытсюрӧ. Но татчӧ локтӧдз сёысь гӧгӧр мӧвпышт, медым балябӧжтӧ бӧрыннас эз ков гыжъявны.

Пуксис орччӧн, ӧшӧдіс куш юрсӧ, ланьтіс.

Чӧв оліс и Петыр. Юасьны эз вӧв лӧсьыд. Дӧзмас, гашкӧ, мортыс. Но мӧдыд ачыс сёрнисӧ водзӧ нуӧдіс. Морӧсас, тыдалӧ, важӧн нин пуӧ.

— Воддза гӧтырӧй менам кувсьыліс, квайт во нин лоӧ, — ышловзис Иван. — Ӧтнамӧн олі. Челядьыд? Найӧ менам гырысьӧсь нин. Гӧтыраӧсь и верӧс сайынӧсь... Бура, позьӧ шуны, олі. Кынӧмӧй пӧт, сьӧмыд зептад. Курыдторнад эг дурлы — гыркӧй висьӧ.

Иван малыштіс шыльыд юрсӧ, кызӧктіс гоз-мӧдысь. Песлӧдліс картузсӧ кыкнан кинас, эз тӧд, тыдалӧ, кодарсянь медся дойданаланьыс матыстчыны.

— Гажтӧм сэсся ӧтнамтӧ босьтіс. Садьман вой шӧр войын да йирмӧг лолӧ. Кӧть мурзы. Висьман кӧ, некодлы ваӧн юктӧдны... Коркӧ и дӧвгис меным — босьт да и гӧтрась. Абу тай дзик шыбитана, квайтымын муртса и эм. А куш юр вӧснаыд мый шогавнысӧ. Пессьы кӧть эн, а выль юрси оз нин чепӧсйы. Воан кӧ сьӧлӧм вылас кутшӧмкӧ аньлы, петас и татшӧм саяд.

Висьтасьысь ланьтіс, сэсся бергӧдчис зонлань.

— Петырӧн тай шусин, буди?

— Сідзи, сідзи, — воча довкнитіс пашкыр юрнас Петыр.

— Сюри меным ӧтка аньыд, Петырушко. Кӧвдум кодь, банйыштӧма быдӧн. Лӧз синмыс кольчча быттьӧ. Лӧсьыд! Кувтӧдзыд кӧть кургы-ов. Но сьӧлӧмыс... Изйысь на чорыд вӧлӧма.

Шлапкис чорыд кабырнас ёсь пидзӧсас, курччис вом дорсӧ.

— Энӧ лӧсялӧй, сідзкӧ?

— Тӧлысь-мӧдтӧ бура олім, — джоджӧ видзӧдіг лӧня шуис Иван. — Стӧча казявлӧмаӧсь роч йӧз: абу пӧ ставыс зарни, мый дзирдалӧ. Сідзи и вӧлӧма.

— Пӧръяліс али мый? — чуймис Петыр.

— Пӧръяліс?! Экма! Вылӧджык босьт. Йирны-джагӧдны мӧдіс. Варыш моз кокавны. Да мый лешаксӧ тэ гӧгӧрвоан. Эн на гӧтрасьлы да, — ӧвтыштіс кинас пузьӧм Иван.

— Абу жӧ кын юра, — чушкӧдчис зон. — Ловъя лов ӧд.

— Ловъя кӧ, кывзы олӧмаджык войтырсӧ. Эн зэв чепсась. Шуи тай: йирны-тільны босьтчис. Дзик збыль. Первойтӧ ме ку пиысь петтӧдз зіли. Мый шуас, котӧрӧн и вӧча-кера. Киподтуй эм, зільлуннад енмыс абу жӧ ӧтдортлӧма. Сэсся аддза: кымын водзӧ, сымын сьӧкыдджык меным рӧдтынытӧ.

— Коліс ӧлӧдыштны, — топӧдліс пельпомсӧ Петыр.

— Сюсь тай зэв. Видлы, кӧртвомав вельмӧм бабаястӧ. Ӧтчыд веськыда крапкис: этша пӧ сьӧмтӧ ваян. Мукӧд мужикъяс зырйӧн зыртӧны, а тэ? Мый вайлан, сійӧс и ватшкан-сёян. Чӧв ола, воча нинӧм ог шу. Пиньӧ ӧд воан. Быттьӧ абу лӧсьыд — регыд на олам... Мӧдысь зэв нимкодь тӧвзьӧ, дача улӧ, висьталӧ, му босьті. Ковмас вӧрсӧ пӧрӧдны, керка тшупны. Тьӧс-плака ньӧбны, пила-чер лӧсьӧдны... Сылы нӧ мый! Шуӧма, сідзкӧ вӧч. А кыдзи? Ачыс шляпвидзӧ, кивыль оз кер. Вомӧс восьтны пола — пинялас бон-бус. Тадзи и олім. Шулі нин: сьӧлӧм пыддиыс, тыдалӧ, енмыс из сетлӧма.

— Гашкӧ, бурӧн позис кыдзкӧ, — зілис небзьӧдны сёрнисӧ Петыр.

— Быд ногыс ме гӧгралі. И мелі кывйӧн, и матьыд петаліс. Весьшӧрӧ! Ёрисны дзик бабатӧ. Асланьыс куш сынӧ.

— Ёма тай, сідзкӧ.

— Вот-вот. Веськыд ёма и эм. Позис жӧ менӧ гӧгӧрвоны, верӧс туйӧ кӧ пуктіс. Абу нин кызь арӧса. Сьӧлӧмӧй топӧдлывлӧ и. Кертӧ кӧ быгльӧдлыны кута, аскинас и мӧдар югыдас лоа. И мый лешакысла колӧ вӧлі ӧтлаасьнысӧ?

Иван шевкнитіс-паськӧдіс кисӧ, швачкис важ картузсӧ скӧрысь лабич помӧ.

— Кысь нӧ ме тӧда, — петіс нюмыс Петырлӧн.

— Тэ эн жеръяв. Ас вывтіыд вермас на мунны... Пекнича луныс.

Петыр тшӧкмуніс тайӧ кывъяссьыс. Мый татчӧ вочавидзны?

... Ывлаӧ найӧ петісны бур тӧдсаяс быттьӧ. Картуза морт кежис веськыдвыв, Эжвалань. Восьлаліс чожа, быттьӧ сьӧкыд доддьысь мездмӧм вӧв.

Зон — мӧдарӧ. Шлапсьӧдіс туй кузя — зумыштчӧма, лӧнь. Со тай тӧдмаліс: гижсян лункӧд орччӧн и юксян лун вӧлӧма.

... Мӧд пекничаӧдз вӧлі быдса вежон на.