ШКОЛАЫН


Талун, вокӧй, меным лои
Мунны школа ӧшинь увті.
Кор ме школа весьтӧ вои,
Восьса ӧшинь водзӧ сувті.

Уна челядь вӧлі сэні —
Ставныс шаньӧсь, шыльыд юра.
Ачыд тӧдан, найӧ ӧні
Овны велӧдчӧны бура.

Тӧдан, вокӧй, тайӧ школа
Пемыд йӧзлы — югыд шонді!
Гажӧн тыри менам лолӧй,
Кор ме кывзыны сэн понді.

Гижӧм вӧлі налӧн мунӧ:
Быдӧн кутӧ киас перӧ,
Быдӧн гижӧ мыйкӧ уна,
Перӧ кокньыдика вӧрӧ...

Сэсся велӧдысьыс шуис:
«Тӧдны школьникъяслы колӧ,
Кытысь лои-чужи муыс,
Коді, кӧні кыдзи олӧ!»

Кутіс висьтавлыны сійӧ...
Дыр ме сулалі да шензи.
Татшӧм тӧлка морткӧд, пиӧ,
Ми вок, буракӧ, он вензьы!

Сэн ме кылі, вокӧй, кыдзи
Муыс шонді гӧгӧр ветлӧ.
Ентӧг артмӧма пӧ сідзи.
Енмӧс ыдждӧдлыны петлӧ!

Сэсся кылі, тӧдны понді:
Кӧні лымйыс во чӧж усьӧ,
Кӧні би моз сотӧ шонді,
Битӧг сёянторйыс пусьӧ.

Кӧні эмӧсь ыджыд каръяс;
Кӧні миян моз оз овны;
Кӧні озыръяс да саръяс
Вирсӧ кисьтны оз на повны.

Унатор ме кылі, вокӧй,
Унатор ме тӧда ӧні.
Эз и мудзлы эськӧ кокӧй,
Кӧть ме рытӧдз олі сэні.