ЧУЖАН СИКТЫНВои ме ас чужан сиктӧ, Сьӧлӧм радлӧмпырысь тіпкӧ. «Труд» правленье дорті муна, Чукӧртчӧмны йӧз зэв уна. — Митинг али мый нӧ? — шуа. — Мыйла тані йӧзыс жуӧ? А сэн сулалӧ дзор Силыч, Висьталӧ мен, быттьӧ пилы: — Тані, — шуӧ, — сэтшӧм фактор — Ньӧбим аслыным квайт трактор. Веритан-ӧ тэ, Васильич, Мый тэн висьталӧ дзор Силыч? Ньӧбны тракторъяс! Тэ думышт — Кокни сӧмын кывйӧн шуны. А ми ньӧбим и эг долгӧн: Деньга эм и ньӧбны «Волга». Со ӧд кутшӧм долыд лунӧдз Олі ме ас пӧрысьлунӧ! Видзӧда ме аслам синмӧн... Весиг лэдзчӧ радлан синва. Стальысь вӧчӧм багатыръяс Сулалӧны — пуксьы, журъяв. А сэн шонді койӧ югӧр, Налӧн дзирдалӧ сталь мыгӧр. Кӧть и трактор абу дивӧ, Быдӧн видлӧ аслас киӧн. — Ноко, заводитлы, Ивӧ, Мед кӧть жургас аслас шкивӧн! — Мый нӧ, тіянлы кӧ колӧ, Со тай кутшӧм сылӧн лолыс. — Мургӧ трактор — вӧрӧ муыс, Вына горсьыс гызьӧ юыс. — Со ӧд вынйӧрыс кӧн пуӧ! — Бара меным Силыч шуӧ. Сійӧ нюмъялӧ, кыдз шонді, Кодлысь югӧрсӧ он конды. Мый жӧ ставыс тайӧ лоӧ? И мен дум вылӧ сэк воӧ: Дзик жӧ тадз кызь кыкӧд воын, Первойысь на плуг кор воис, Йӧзыс чукӧртчыліс татчӧ, — Быдӧн вӧлі ньӧбны сайтчӧ. * Локтіс сэтчӧ кулак Семӧ — Гӧльӧс серавны зэв вема... Пытшкас лёкыс сылӧн пуис, Силыч дядьлы пыр жӧ шуис: — Силыч, деньгаыд кӧ абу, Эм на тэнад кыз ляк шабур. Сырнас абу на зэв тугъя, Вузав: гӧрны кутан плугйӧн! Сералісны кулак чукӧр, Мый гӧль йӧзлӧн зепныс нюкыр. Найӧ ваксисны, гӧль шогсис, Ваӧ пыр кӧть вӧлі шогсьыс. Кыськӧ кывлӧма йӧз вомысь, Шуис зон, волисполкомысь: — Медым гӧльлун татысь мунас, Колӧ котыртны коммуна. — Да, пӧжалуй, — кодкӧ шуис, — Сійӧ медся вернӧй туйыс. Сикт эм сикт, — сэн быдся йӧзыс. А мужик жӧ аслас звӧзысь Водзӧ аддзыны эз вермы, — Код мый шуас — ставыс вернӧ. Сем и крапнитіс: — Коммуна? Гӧтырыд сэк мӧдкӧд мунас! Шуас: «Ӧти коллективын Овны мӧдкӧд абу дивӧ». Дзуган питӧ сэк и нывтӧ, Вунӧд ассьыд сьыланкывтӧ! — Мужикыд и пемыд сорыд Эскӧ: «Висьталӧмыс чорыд!» Плугсӧ ньӧбны ветліс квайтысь Менам бать да тожӧ кайтіс: — Ӧти пи да йӧзкӧд дзугны? Тэ коммуна йывсьыд дугды! Кыдз нӧ ассьым Машӧс лэдза, Медым кодкӧ водзын педзас?! Ог, ог вермы: менам сійӧ... Аддза — кык пӧв збоймӧ киӧй. — Йӧзлӧн пемыдлуныс сэки Здукӧн гӧльлунсӧ эз нетшышт. Кӧть мед коді кыдз эз артав, Ломзис керкаясын сартас. А со ӧні «сьӧд мужиклӧн» Пиыс тӧвзьӧ мотоциклӧн. Кыдз он радлы! Сьӧлӧм пуӧ... И мен Силыч бара шуӧ: — Висьтав меным тэ, Васильич: Шуда али абу Силыч? Шуа веськыда, мый шуда, Весиг сьывны гӧлӧс лудӧ. Ми ас техникаӧн ӧні... Коді кутчысяс, мый, кӧні?! Медым овмӧс водзӧ бурмис, Косьтам-бырӧдам и нюр ми. Важӧн ставӧн гӧгӧрвоим: Миян вын — колхознӧй стройын. Петім ми лёк гӧльлун тыысь, Аттьӧ партиялы сыысь! — Стальысь вӧчӧм багатыръяс Сулалӧны — пуксьы, журъяв! А кор шонді кисьтӧ югӧр, Налӧн дзирдалӧ сталь мыгӧр. — Мурӧбтасны — вӧрӧ муыс, Вына горсьыс гызьӧ юыс. Муна ме ас чужан сиктӧд, Сьӧлӧм — вӧвлытӧма тіпкӧ. 1958 во.* Сайтчӧм — ӧтувтчӧм.
