ЧИПАНЪЯС ВИСЬМИСНЫ

— Ветлім ми коркӧ Коми-Пермяцкӧй Автономнӧй Округса ӧти сиктӧ концертӧн, — заводитіс Семен Вась ассьыс висьтсӧ.

— Автобуснас мунӧмсӧ, кузь туй гартӧмсӧ ог нин кут казьтывны, вывті дыр лоӧ. Та вӧсна веськыда концертсяньыс и заводита. Зэв бура няньӧн-солӧн примитісны, ми сьылам да йӧктам, видзӧдысьыд клуб зал тырыс чукӧрмӧма, ёна клопайтӧны. Но медся шензьӧданаыс лои миян чипанъяс йылысь сьыланкыв сьылігӧн.

Ме петі сцена вылӧ кык анькӧд, помалім воддза куплетсӧ, а сэсся припевсӧ сьывны ме водзӧджык воськовті, морӧсӧс паськӧді и заводиті:

«Миян чипанъяс висьмисны

Колӧкӧ и куласны».

И став залыс быттьӧ чашмуніс, сэтшӧма серавны мӧдісны войтырыд. Ме, кӧнешнӧй делӧ, ог гӧгӧрво, мыйла сэтшӧма ваксьӧны йӧзыс, кӧн тані тешыс, но он ӧд ланьт, помалі припевтӧ. Мӧд куплет сьылім, йӧзыд лӧньыштісны быттьӧ. И бара ме водзлань воськовті да горш тырӧн ракӧсті:

«Миян чипанъяс висьмисны

Колӧкӧ и куласны».

И выльысь зал пасьтаыс зык-шум кыптіс, куснясьӧмӧн сералӧны. Ме сьыла, быттьӧ нинӧм эз и ло, ачым, пӧнятнӧй делӧ, мӧвпала, абу-ӧ кутшӧмкӧ нелючки менам паськӧмын? Первой, дерт, гач дум вылӧ усис. А друг да кизьясыд менам разьсьӧмаӧсь? Надзӧникӧн сьылігмоз нуӧдышті киӧн гач кузя, быттьӧ ставыс тыр-бур. Но, сьылі припев да коймӧд куплетӧ вуджим. Та дырйи бара йӧзыд лӧньыштісны. А кор коймӧдысь припевтӧ ме заводиті, дзик мат воссис. Дзоньнас залыд куйлӧ, мукӧдыс и серавнысӧ весиг оз вермыны, сӧмын ойзӧны. Восьсӧн нин сьылігкості видлі киӧн кизьясӧс и бара нинӧм лёксӧ эг казяв.

Но, помалім ассьыным сьыланкывнымӧс, пырим занавес саяс. Сідзи эг и вермы гӧгӧрвоны, мыйла миян вылын тадзисӧ сералісны?

Концерт бӧрас нин матыстчи Культура Керкаса директор дорас да юалі, мыйла, мися, йӧзыс тадзисӧ ваксисны?

А сійӧ — мичаник солиднӧй дамочка, краситӧм вомдоръяса, лӧсьыда кудритӧм юрсиа, вомсӧ кинас тупкыштіс да: «Хо-хо-хо», — серӧктыштіс. А ме ог лэдзчысь, окота ӧд тӧдны, мый миян сьылӧмын вӧлі тешкодьторйыс?

Но, сэсся сійӧ серам сорӧн и шуис, миян ногӧн пӧ чипаныс лоӧ пенис.