* * *

Февраль — и Ялтаын февраль,
Веж пальма гӧгӧр гартчӧ турӧб,
Дзик быттьӧ Эжва бокын дурӧ...
И мыйкӧ друг мем лои жаль.

Ас нэмӧн мунлі-ветлі кыт,
Мем ӧні сьӧкыд весиг шуны,
Но некор Помӧсдін ог вунӧд
И Тима Веньлы сиӧм рыт.

Кӧн быттьӧ пызан вылын нянь,
Мем лои ас — поэтлӧн муза,
Кӧн ӧти рытӧн лои муса
Рам видзӧдласа коми ань.

Ас пытшкын радлунӧс эг кут,
И вӧлі енэж тырыс кодзув...
Но чайті сэк, мый ставыс водзын —
Шань ёрт, поэзия и шуд.

Эг кутчысь талунъяас ме,
Пыр волі ӧти кывйӧ аскӧд,
Мый шуда лоа коркӧ аски,
А луныс исковтіс кӧ — мед.

И со, лым шапкаа миндаль.
Зэв ылын сикт, кӧн тырыс пожӧм...
Да, вӧвлі сьӧлӧманым гожӧм,
А ӧні ми костын — февраль.