УЗЬЫСЬ ВАНЬ


		Паччӧр вылын чеччывтӧг
		Куйлӧ узьысь Вань.
		Уджъяс сылӧн эштӧма,
		Ставыс сылӧн шань.
		
		Муяс абу кӧдзӧма,
		Вундыны оз ков.
		«Ме пӧ тшыглы кулӧмысь
		Ог на ёна пов!»
		
		Ытшкыны эз петавлы,
		Турунсӧ эз курт.
		«Ме пӧ, зонмӧ, висьӧдча,
		Видз вылын ог бурд!»
		
		Ягын жӧ эз керавлы,
		Сьӧла-ур эз кый.
		«Чер пӧ менам ныжмӧма,
		Пищальӧй оз лый!»
		
		Узьӧмысь оз палявлы,
		Узьӧ вой и лун.
		Куйлӧ паччӧр сэрӧгын,
		Удж вылӧ оз мун.
		
		Кӧлуй ставсӧ разӧдіс,
		Керка лои куш.
		«Нинӧм пӧ мем тӧждысьны,
		Пӧтас ӧти душ!»
		
		Гожӧм бӧрын тӧв кежлӧ
		Сёянтор эз коль.
		Джоджын сӧмын туплясьӧ
		Сёркни куим-нёль.
		
		Нинӧм абу вузавны,
		Сёйны абу нянь.
		Кыкнан кинас гыжъялӧ
		Юрсӧ узьысь Вань.
		
		«Мый нӧ тайӧ лоӧма
		Унмӧй оз нин лок.
		Синмӧй кутіс паськавны,
		Кӧдзалӧма бок.
		
		Кынӧм мыйкӧ рекмӧма,
		Личалӧма вӧнь,
		Менам тыртӧм керкаын
		Вывті лоӧм лӧнь.
		
		Весиг эг кут аддзывны
		Важ моз мича вӧт.
		Часлы, сиктӧ петала
		Корсьны кынӧмпӧт.
		
		Керка сизим кытшовта,
		Няньыс лоас дась!»
		Кӧсъяс пасьсӧ пасьтавны —
		Вузалӧма пась.
		
		Кӧсъяс кӧмкот кӧмавны —
		Вузалӧма кӧм.
		«Аттӧ сьӧкыд олӧмӧй,
		Мыйӧн петны мем?»
		
		Пукалыштіс, шензьыштіс
		Коньӧр узьысь Вань.
		Сэсся кӧмтӧг, пасьтасьтӧг
		Петіс корсьны нянь.
		
		Сійӧ рытӧ ывлаын	
		Кӧдзыд вӧлі зэв.
		Туйсӧ лымйӧн тыртӧма
		Пидзӧсӧдзыс тӧв.
		
		Ваньӧ аслас керкасянь
		Ылӧ эз и мун.
		Шудтӧм лои Ваньӧлы
		Тайӧ тӧвся лун.	
		
		Дасысь сійӧ воськовтіс.
		Водзӧ мунны дыш.
		«Часлы, — шуӧ, — шойччышта,
		Мыйкӧ висьӧ мыш!»
		
		Тола пиӧ шойччыны
		Пуксис узьысь Вань.
		Пукалігас кынмӧма —
		Эз и ковмы нянь.