ТӦРЫТ ДА ТАЛУН

Кузьчуткомов муртса контораӧ пырис, лолыштны эз удит, а кодкӧ пошкис-локтіс нин сы бӧрся. Микул Иван вӧлӧма, тракторист. Отделениеӧн веськӧдлысь лэптіс юрсӧ паськыд пызан дорысь, букӧстіс кыз гӧлӧснас:

— Кутшӧм мог нӧ суис, Иван?

Вочавидзӧм пыдди мӧдыс дзумгыліс кисӧ гач зептас, перйис нёль пельӧ кусыньтӧм кабалатор.

— Мӧвп эськӧ эм да... Гоз-мӧд лун юрӧс жугла.

Тапиктіс пызанлань, тувкис кыз чуньнас бумагаӧ:

— Неважӧн газет куті лыддьыны. Водзынтӧ ёнасӧ киӧ эг босьтлы. Асьныд тӧданныд — пыр некор. То гӧра-кӧдза, то сьӧм сетасны. Пес-турун ваян — доз мыччӧны. Ю пӧ, сёшайт. И лӧсыштан... — Иван видзӧдліс управляющӧйлы синмас.

Кузьчуткомовлӧн сьӧлӧмыс небзис, нюмыс ылькнитіс. Курыд зелля радейтысьястӧ ӧдйӧ тай косӧдісны. Сиктса скод вылын босьтчисны, став мирӧн. Со Микул Иванлӧн чужӧмыс быдӧн шылялӧма, ӧти чукыр он аддзы. Кӧть ӧні выльысь гӧтрав.

— Газет, мися, гогналі. Ёна, вӧлӧм, идӧртӧмлун йылысь гижӧны. Миян ӧд, Васильевич, абу жӧ ставыс лючки...

Кузьчуткомов чошкӧдіс пельсӧ. Мый нӧ тайӧ Микул Иваныскӧд лоӧма? Кольӧм вежонас, собрание дырйи, медводз жӧ чепӧсйис сёрнитны. Сэтшӧма лӧсаліс совхозса главнӧй инженерӧс — мыктавмӧныс мортыслы лои. Сійӧс эськӧ важӧн и колӧ вӧлі ньӧръявны да. Отделениеӧ туйсӧ вунӧдіс, ерӧмаканьыд. Шляпвидзӧ шоныд контораын, быттьӧ тувъялӧмаӧсь пуклӧс бердас.

— Кывза, кывза, — эновтіс ассьыс уджсӧ Кузьчуткомов. — Мый жӧ сэтшӧмсӧ казялін?

— Чӧв, Васильевич. Уна лӧп-ёгыс вӧлӧма. Бур жӧ, кор вежӧрыд сӧстӧм. Лӧсьыда ӧти ыджыд ёрт шулӧма: мортыд кӧ пӧ оз мӧвпав, юр вемыс сімӧ.

Овмӧсӧн веськӧдлысь исыштіс сынӧдсӧ. Абу-ӧ Иваныс кокыштӧма? Вомыс изки моз изӧ. Но мортсяньыс ни вина, ни одеколон дук эз кыв. Куш соляркаӧн ӧвтіс! Абу дивӧ. Нэмсӧ трактор дорын да.

— Дженьыдджыка висьтась. Важ пӧчсяньыд сёрнисӧ панан. Некор больгынысӧ. Бригадаын менӧ виччысьӧны.

— Ме ӧмӧй больга, Николай Васильевич! — Микул Иван пуксис управляющӧйлы воча, тотш-тотшкерис пызан пӧвйӧ.

— Сёрниыс, Васильевич, миян дойяс йылысь. Тэныд тшӧтш инмӧ.

Кузьчуткомов муртса эз тшӧкмун. Кымын во трактористалӧ Иван, и збыльысь вомсӧ прамӧя эз восьтыв. Сӧмын кор тыртчасны — варовӧсь. Тувсов гутъяс моз дзизгӧны. Гаражас кӧть эн пыр, йиркӧдзыс лӧз тшын везъялӧ. Кыв он лысьт шуны — ыпнитӧны кос сюмӧд моз.

Тадзисӧ тӧрыт вӧлі. Талун быттьӧ олӧмыс вежсис...

— Куйла вӧлі, телевизор видзӧда. Сэки и дӧвгис юрӧ. Мыйла, мися, быдлаӧ миянлы вына трактор колӧ, позьӧ ӧд и вӧв доддявны кутшӧмсюрӧ удж вылӧ.

Микул Иван чургӧдіс ассьыс куснялӧм кабаласӧ, быттьӧ вӧзйис Кузьчуткомовлы.

— Пукси да артышті. Чуйми, Васильевич, мыйта солярка позьӧ видзтыны, кымын трактор эськӧ дзонь колис. Серам петлӧ — ӧти мешӧктӧ «ДТ»-ӧн мукӧддырйи няркӧдам-кыскам. Пӧшти сё вӧв вына. А чибукыд сиктын вит сӧмын кольӧма.

— Тэ, Иван, эн вай ышлолав. Ми думыштлам. А ӧні некор. Шулі нин — тэрмася.

— Гӧгӧрвоа. Уджыд удж и эм, — тракторист шамыртіс гижӧдсӧ, сюйис зептас. Ӧдзӧсӧн крапкытӧдз чӧвтіс:

— Эн дивит, Васильевич. Дум кӧ лоӧ, вола на.

Управляющӧй петіс пызан сайысь, мӧдіс жӧдзны ӧтарӧ-мӧдарӧ. Сё лешак! Вежӧра морт Микул Иваныс вӧлӧма. Гылыда сёрнитӧ и. Но... Абу кокни сылысь мӧвпсӧ делӧӧ бергӧдны. Ӧти-кӧ, выль конюшня ковмас. Ӧніяыс ропмунӧма. Мӧд-кӧ, сийӧс-кӧлуй корсь. Нӧшта додьтӧ кысь босьтан. Вӧчысьыс некод нин абу. Чуньыд оз тырмы лыддьӧдлыныс, — сы мында «колӧ» чукӧрмӧ. Ёна тай! Ставсӧ трактор вежас. Майбыр, техника эм ӧні. Сэсся мыйла сылы, управляющӧйлы, юрсӧ жуглыны. Пенсияӧдз кык во коли. Дзуртас нин кыдзкӧ.

Морӧс вывсьыс быттьӧ из усис. Зэв кокни лои Кузьчуткомовлы. Сӧмын эз дыр кежлӧ...

Некымын лун мысти довгӧ управляющӧй конторалань, а кильчӧ помас — Микул Иван. Вомыс кальк нюмысла, бандзибъясыс ӧгыр моз ломалӧны. Югъялысь син сертиыс и казяліс Кузьчуткомов — бара мыйкӧ юрас воӧма.

— Чолӧм, Васильевич! — мыччис топыд кисӧ Иван.

— Чолӧм, чолӧм. Гортсьыд тэнӧ вӧтлісны талун буди, — гын сапӧгсӧ пыркӧдіг броткыштіс Кузьчуткомов.

— Нинӧмысь тодмышкавнысӧ да. Сьӧм вая, эсійӧнад ог ышмы. А кежи татчӧ делӧ кузя. Дум ӧти эм, ог тӧд, мый шуанныд?

Кузьчуткомов быттьӧ дойысь чукыртчыліс, но эз пыркнитчы ни эз горӧд. Кутіс асьсӧ да тшӧктіс:

— Эн вай намгы. Висьтав, мый нин юрад.

— Быд во ме, Васильевич, турун-силосӧн нокся, скӧт карта дорӧ ваяла. Бузгам кӧрымсӧ лым толаӧ либӧ няйтас, картасяньыс, гашкӧ, сё воськов сайӧ. А мӧс лысьтысьяс пӧсь кисьтӧны, кыскалӧны ас выланыс.

— Тракторнад ӧд картаас он пыр!

— Кысь нӧ пыран! Но уджсӧ вермам жӧ кокньӧдны. Вай карта помас лэбув либӧ сарай лэптам. Медым трактор доддьӧн тӧран. Сысянь турунтӧ веськыда транспортёрас позьӧ тэчны.

Гыжйыштіс голясӧ управляющӧй, ружӧктіс гоз-мӧдысь. Мый вочавидзан? Сюсь синма Иваныс лоӧма. Дзикӧдз со топӧдны кутіс. Кӧть томан сайын ов.

— Та йылысь ме кымыныськӧ сёрнитлі жӧ нин. Вомӧй мудзис, — дӧзмӧмӧн шуис управляющӧй да эз и гӧрдӧдышт, пӧръяліс кӧть. — Лоӧ мыйкӧ вӧчны. Дояркаяс увгӧны и.

— Босьтчанныд кӧ, чукӧстлӧй жӧ менӧ!

— Юӧртам, дерт...

Шогӧдіс Кузьчуткомовӧс: син водзас сувтіс скӧт карта. Кор он лэччыв сэтчӧ, пыр и кытшаласны мӧс лысьтысьяс. Вӧв моз пӧ уджалам, ныр вылӧ усьтӧдз кӧрым лоӧ кыскавны, зэрӧ кӧть лым сапкӧ.

Яндзим весиг овлӧ. Но шлапнитас дояркаяс водзын кинас — нинӧмӧн пӧ отсавны ог вермы — да руч моз уйкнитас вӧлі ӧдйӧджык.

Нӧшта нормис сьӧлӧмыс Кузьчуткомовлӧн, кор артыштіс, уна-ӧ да мый ковмас, медым кокньӧдны дояркаясӧс. Кытысь тьӧс-плакасӧ босьтан? Бара кыськӧ дзайгы. Сюръя вӧрыд, шуам, сюрас и черӧн вӧдитчысьыд эм. Ӧтилаысь ковмас нетшыштны, мӧдлаӧ тувкыны. А кӧрым разӧдан транспортёрыскӧд кыдзи сарайсӧ йитан? Тьпу! Шунытӧ кокни. Артмас-ӧ? Гашкӧ, лёкджык на лоӧ да. Ачым и мыжа коля. Овлас на мед важ ногыс. Юртӧ таысь некод оз керышт...

Управляющӧй зуньгыртчис пызан сайын. Некутшӧм тӧжд кӧ эськӧ эз вӧв! Шондіыс то тулыслань бергӧдчӧ. Пыдӧстӧм лӧз енэжыс мича да лӧнь... Тайӧ здукас гурйыв воссис контора ӧдзӧс.

— Позьӧ, Васильевич!

Порог дорын сулаліс Микул Иван. Управляющӧй ымӧстіс сӧмын, кыв ни джын шуны эз вермы. Со желльыд, бара локтӧ. Вир гудыртысь! Оз висьлы ни, оз... Бара, тыдалӧ, юрас мыйкӧ чужӧма.

Чолӧмасьӧм пыдди Кузьчуткомов усьӧм лолӧн ӧвтыштіс кинас: висьтась пӧ. Аслас мӧд дум — кыдзи мездысьны тайӧ лежнӧгсьыс.

Микул Иван пырис морӧс зептас. Кузьчуткомовлӧн пӧсьыс чепӧсйис. Кывзӧ и оз кывзы, а Иван ассьыс дольӧ. Комбайн пӧ гараж дінын весь сімӧ. Няньтӧ кымын во нин огӧ кӧдзӧй. Босьтам да лӧсьӧдам комбайнсьыс...

Мый лӧсьӧдам, кыдзи? Нинӧм эз кутчысь вежӧрас Кузьчуткомовлы. Сійӧ сӧмын дакайтіс да жӧдзис — виччысис, кор мӧдыс помалас сёрнисӧ.

— ... Соснымӧс, дерт, ковмас пуджлыны. Но бур делӧ лоӧ, — лабутнӧя кыв кӧрталіс тракторист. — Кыдзи, мый?

— Да... колана... ён. Отсалам.

Управляющӧйлӧн кыз гӧлӧсыс рутшмуні-небзис. Синваыс кутіс доршасьны, — сэтшӧма забеднӧыс босьтіс. Кымын во юралӧ тані, быттьӧкӧ би пырыс и ва пырыс мунліс. Но эз куж мӧвпыштлыны, мый этайӧ паськыд плешка Микул Иваныс голя вылас сувтас. Кор юӧ вӧлі — майбыр, шы ни тӧв.

Перйис дас шайта да кевмысяна видзӧдліс Иван вылӧ.

— Пыдзыртам, гашкӧ, талун?

Микул Иван биысь моз чепӧсйис сы дорысь.

— Менам ӧд эм жӧ, — малыштіс гач зепсӧ. — Тӧрыт на сеталісны да.

Воськовтіс петны, но тэрыба бӧр бергӧдчис:

— Тэ эн шогсьы, Васильевич! — шлапкис управляющӧйлы пельпомас. — Ме ӧд абу ӧтнам. Шопер Вась мыйкӧ думыштӧма жӧ. Пырала пӧ Кузьчуткомов дорӧ. Пиля Ӧльӧ, ва шонтысьыд, ӧзйӧма и. Сэсся ачым на кежала.

Ӧдзӧс пӧдласьӧм бӧрын Кузьчуткомов зутшкысис лабич помӧ. Ки-кокыс лигышмуніс, ӧдва пукалӧ. Кыдзи и водзӧ овны? Позьӧ, дерт, вӧзйысьны удж вылысь. Чӧв! Тайӧ медся кокни. Виччысьлам. Гашкӧ, лӧнясны жӧ.

Кодкӧ торкнитіс ӧдзӧсӧ. Кузьчуткомов бергӧдчис да муртса эз пӧр: сылань шавксьӧдіс шопер Вась.