ТӦЛЫН УТКАЯС

Лунвывса шоныд муясысь волысь став лэбачьяс, кодъяс быдтысьӧны Коми муын, арнас бӧр мунӧны татысь.

Посни лэбачьяс, истанъяс, уна пӧлӧс уткаяс сентябр помын нин эновтӧны войвыв. На бӧрся лунвылӧ заводитӧны лэбзьыны сювчӧжъяс, дзодзӧгъяс, турияс, юсьяс. Медсёрӧн мунӧны сьӧд уткаяс.

Мукӧд дырйи найӧс аддзан на лым усьӧм бӧрын. Сук гӧныс да кыз госныс видзӧны найӧс кынмӧмысь.

Шочиника овлывлӧ и сідз, мый ранитчӧм либӧ асланыс табунъясысь торъялӧм уткаяс кольччӧны весиг тӧвйыны.

Кыдзкӧ март тӧлысь заводитчигӧн мем аслам синъясӧн удайтчыліс аддзывны сьӧд уткаясӧс Койтыысь.

Вӧлі кӧдзыд асыв. Посньыдик кымӧръяс костӧд мыччасис бледіник шонді. Чукӧрӧн-чукӧрӧн сулалісны еджыд кудриа кыдзьяс, йӧжгыльтчӧмаӧсь, оз весиг вӧрзьыштны.

Восьлалі ты пӧлӧн, кӧсйи вуграсьыштны йи пыр, кыйны ёкышъясӧс, йӧршъясӧс. Неылын тыдаліс восьсаин, коді и тӧвнас некор оз кынмыв: тыдалӧ, ключ петӧ. Тшын кодь ру пуркӧдіс-петіс сэтысь да дышиника руньгис лымйӧн вевттьысьӧм берег пӧлӧн.

Эг на удит вӧчны воськов кызь, восьса рыысь кыпӧдчисны уткаяс да ӧдйӧ вошины бадь кустъяс сайӧ. Найӧ вӧліны куимӧн. Первойсӧ весиг эг кӧсйы веритны: уткаяс? Тӧлын?

Кыдзи нӧ найӧ вермисны терпитны нелямын градуса кӧдзыдъяс? Коді видзис найӧс бушковъясысь? Кӧні дзебсясисны кузь войяснас? Мый сёйисны, кор став юяс да тыяс дзебсьӧмаӧсь кыз йи улӧ?

Недыр мысти паныдаси Койтыбӧж грездса нывбабаяскӧд, кодъяс локтісны турунла. Кор висьталі налы уткаяс йылысь, то ичмоньяс ньӧти эз дивуйтчыны. Налысь ме тӧдмалі, мый уткаяс Койтыын олӧмны тӧвбыд. Первойсӧ найӧ вӧлӧмаӧсь нёльӧн, но кутшӧмкӧ лёк мортлӧн лыбӧма киыс ӧтиӧс на пиысь лыйны.

А видзны эськӧ колі. Ӧд кутшӧм уна сьӧкыдлунъяс ковмис терпитны уткаяслы кузь, кӧдзыд тӧлын.

Нывбабаяс висьталісны и сы йылысь, мый уткаяс унджык кадсӧ олӧны турун зорӧдъясын, дзебсясьӧны лым пытшкын. Сӧмын регыдик кежлӧ петавлӧны сёйны восьса рыясӧ.

Дыр пукалі берег дорын. Окота вӧлі выльысь видзӧдлыны повтӧм лэбачьяс вылӧ, но найӧ сідзи и эз петкӧдчывны.