* * *

Тэ эскы «енъяслы», но сэк эн вошты юр:
Му вылас тшынӧдӧны енэж разнӧй «енъяс»,
И быдӧнлӧн портрет оз югдӧд керка стенъяс, —
Тэ эскы «енъяслы», но тэ эн вошты юр.

А воштан кӧ, тэ сэки лоан прӧстӧй гут,
Код дузгӧ-лэбалӧ, а мыйла? Морт оз висьтав.
И ӧшйӧ сэсся пыр жӧ, кодкӧ ма кӧ кисьтас.
А маас — курыд яд. Кор сёяс, бӧр оз сувт.

Ме татшӧм «енъяслысь» ог казьтышт зывӧк ним, —
Сідз найӧ тӧдсаӧсь, кыдз кӧртлы — сёйысь сім,
Но шуа нӧштаысь: эн ло тэ синтӧм гутӧн.

«Ен» сӧмын сійӧ бур, код йӧзлы сетӧ нянь,
Да дорвыв тӧждысьӧ, мед олӧм вӧліс шань.
Но омӧль сійӧ «ен», код горштӧ вундӧ пуртӧн.

1969