ТЭ КЫЛАН, ЁРТ?


Ме вӧрын ветла пыр, централка — мекӧд тшӧтш,
Но некор меысь пӧткаяс оз повны:
Ог вӧрзьӧд найӧс ме, а вӧля сета овны,
Мед мичмӧдӧны вӧр и паськыд ю дор кӧдж.

Ӧд кодыр муна сэт, мен долыд накӧд пыр,
И сьӧлӧм вылын олӧ ыджыд лача
И паськыд мирсӧ югыдджыка аддза, —
Ме восьлала и помтӧм шудӧн тыр.

А вӧрын кӧ оз кыв мен дозмӧр котсьӧм шы,
Оз кыв кӧ, кыдзи чипсасьӧ сэн сьӧла,
Мен чайтсьӧ, мирыс ыджыд шогӧ сӧлӧм

И мекӧд долыд сёрнисӧ оз кы.
Тэ кылан, дона ёрт? Мен лоӧ вывті шог,
Кор пӧтка вылӧ ассьыд кыпӧдан курок.

1968