ТӦДТӦМ ЙӦЗ

Автобуснӧй станцияын тырыс йӧз. Ӧтияс пукалісны паськыд скамьяяс вылын, варовитісны ӧта-мӧдкӧд, мӧдъяс сулалісны билетнӧй касса дорын.

— Билетъяс талун сӧмын такси вылӧ, — кылӧ, висьтавліс кассир. — Автобусъяс аски мунасны.

Электропильщик Шилов сулаліс зал помын, гыӧртыштӧм ӧшинь пыр видзӧдіс ывлаӧ. Гудыр енэжсянь лэбзисны шочиник лым чиръяс, дышиникпырысь пуксялісны еджыд шебрасӧн вевттьысьӧм туй вылӧ. Пасьтӧм пуяс сулалісны чӧла, быттьӧ любуйтчисны лӧнь поводдянас.

Дзуртыштіс сьӧкыд ӧдзӧс. Кокньыдик походкаӧн залӧ пырис еджыд буркиа, лӧз ватника, угриӧсь чужӧма, утка кодь паськыд ныра ныв. Сійӧ босьтіс юрсьыс шапка-ушанкасӧ, пыркнитіс лым чиръяс, ыджыд гӧлӧсӧн юӧртіс:

— Кодъяс такси вылӧ, кора пуксьыны машинаӧ.

— Эн жӧ бара кольӧй, эн кольӧй, — скамья вылысь кыпӧдчис кӧрӧм коска пася пӧрысь нывбаба, кодлӧн ной шаль увсьыс муртса тыдыштіс чукырӧсь чужӧмыс, да ӧдйӧ кутіс чукӧртны кӧлуйсӧ.

Шилов босьтіс пач бокысь ичӧтик чемодан, кизяліс сьӧд полушубоксӧ, ыджыд воськовъясӧн петіс еджыд буркиа ныв бӧрся.

— Татчӧ, — ныв индіс «Победа» вылӧ, коді сулаліс важиник автобус сайын, сэсся восьтіс багажниксӧ да йӧткыштіс сэтчӧ электропильщиклысь чемодансӧ.

Видзчысьӧмӧн восьлалігтыр машина дорӧ матыстчис и ной шалля баб. Шуйга киас сійӧ кутіс ноп.

— Бур нылӧй, тайӧ али мый таксиыд?

— Тайӧ, бабуля, тайӧ. Пуксьӧй. А кӧлуйтӧ — багажникӧ.

Бабушка сюся видзӧдліс багажник пытшкӧсӧ, но нопсӧ кисьыс эз лэдз, топӧдіс сійӧс морӧс бердас, быттьӧ поліс мырддьӧмысь.

— Усьны сэтысь вермас.

— Оз усь, эн пов, — серӧктіс ныв. — Томналам.

Локтіс коймӧд пассажир. Тайӧ вӧлі бледіник чужӧма, сьӧд синкыма, ӧкуратнӧй паськӧма статнӧй нывбаба. Сылы позис сетны комын арӧсысь не унджык.

Нывбаба чунь йывнас чышкыштіс ӧчки стеклӧсӧ, портфельсьыс перйис билетсӧ, петкӧдліс еджыд буркиа нывлы, сэсся пелька пырис машина пытшкӧ.

Кор пассажиръяс пуксялісны небыд пуклӧс вылӧ, шофёр видзӧдліс быд мортӧс торйӧн, быттьӧ на пиысь кӧсйис аддзыны тӧдсаясӧс. Но куимнан пассажирыс вӧліны тӧдтӧмӧсь. Шилов кыскис гач зепсьыс самӧвар кампорка кодь ыджыд часі, пыдісянь ышловзис.

— Оз-ӧ позь тэрмасьыштны, барышня?

— Вот воас нёльӧд пассажир, и мунам, — вочавидзис машина дорын ноксьысь ныв.

Коли минута дас. Нёльӧд пассажир пыр на эз вӧв. Машинаын пукалысьяс заводитісны нервничайтны. Шилов коймӧдысь нин кыскыліс часісӧ, унаысь кызӧктіс кулакас. Бабушка то пӧрччылас шальсӧ, то выльысь кӧрталас сійӧс.

— Безобраззьӧ! — портфеляс ки пыдӧснас швачкӧбтіс ӧчкиа нывбаба. — Мый дыра лоӧ виччысьны.

— Колӧкӧ, сійӧ оз и лок, — вӧсньыдик гӧлӧсӧн шыасис бабушка.

Шофёр лэптыштліс пельпомсӧ, но нинӧм эз вочавидз. Бура дыр ставӧн чӧв олісны. Лым заводитіс усьны ёнджыка.

— Барышня! Ме ог тӧд, кыдзи тэнӧ ыдждӧдлыны, но колӧ мунны, — стрӧга видзӧдліс шофёр вылӧ Шилов.

— Шуӧны менӧ Машаӧн, — кыліс нывлӧн чирыштӧм гӧлӧс. — А пассажирӧс кольны ог вермы.

Виччысисны ещӧ минута вит. Машина пытшкын лои ыркыдджык.

— Поезд вылӧ верма сёрмыны, — ыджыд кулакнас плешас мыджсис Шилов. — И кӧні сійӧс чӧртъясыс кыскалӧны?

Ӧчкиа нывбаба сьӧдбӧж моз жӧдзис места вылас.

Кӧть чужӧмыс сылӧн ӧні кажитчис вывті стрӧг, но эз вошты мичлунсӧ.

— Меным рыт кежлас быть колӧ воны Княжпогостӧ. Сёрма кӧ лыддьысьысьяслӧн конференция вылӧ — скандал артмас.

Бабушка гоз-мӧдысь нюлыштіс лӧзӧдӧм парсӧ, тшӧтш мыйкӧ кӧсйис шуны, но сӧмын ӧвтыштіс лӧз сӧнъясӧн зэвтӧм косіник кинас.

«Но и пассажиръяс веськаліны, — думайтіс Маша. — Быттьӧ ме вӧсна лоӧ сулавны. Ставныс горзӧны, тэрмӧдлӧны. Ме, колӧкӧ, наысь ёна тэрмася».

— Он ӧмӧй кыв? — выльысь шыасис Шилов да разяліс полушубоксьыс кизьяссӧ.

— Кыла, абу пельтӧм. Мунӧй норасьӧй.

— И норасям!.. Жалӧба гижам! — грӧзитчис ӧчкиа нывбаба, сэсся кокнас йӧткыштіс машина ӧдзӧс да котӧрӧн пырис автобуснӧй станцияӧ.

Бабушка топыдджыка гартыштчис шальнас, бергӧдчис шофёрлы мышкӧн.

— Мый дыра со прӧста сулалам. Сійӧ, колӧкӧ, ресторанын горшсӧ пожъялӧ, а ми — виччысям.

— И тэ, бабуля, тэрмасян? — юрсӧ лэптыштліс Маша.

— А мый... Чайтан, меным тэрмасьны некытчӧ? Пиӧй гӧтрасьӧ. Рытнас — свадьба, а ме со тані на. Тӧрыт Серёжа звӧнитліс, быть пӧ лок.

— Воан.

— Коркӧ, дерт, воа, — эз сетчы бабушка. — Нэм чӧж кута ӧбижайтчыны, рочаканьӧй, тэ вӧсна кӧ сёрма.

— Но и ӧбижайтчы!

— Сылы веськодь, бабушка, пассажиръясӧдзыд, — кинас ӧвтыштіс Шилов. — Веськодь! Мед сёрмӧны йӧзыд.

Ныв кӧсйис скӧрысь вочавидзны, но эз удит. «Победа» дорӧ матыстчисны станцияса диспетчер да ӧчкиа нывбаба.

«Норасьӧма, сукарыд», — скӧрысь югнитісны Машалӧн синъясыс.

— Исакова ёрт, мыйла сулалан? — юаліс диспетчер.

Пассажиръяс ӧта-мӧд вежмӧн заводитісны норасьны. Лыддьысьысьяслӧн конференция вылӧ тэрмасьысьлӧн гӧлӧсыс вӧлі медся ыджыд. Кор шумыс неуна лӧнис, Маша висьталіс сёрмысь пассажир йылысь.

— Ах... Ме и дзикӧдз вунӧдчи, — небзьӧдіс гӧлӧссӧ диспетчер. — Сійӧ военкоматӧ котӧртіс. Ӧні жӧ звӧнитла. Эн шумитӧй. Дас минута мысти кӧ оз во, машина мӧдӧдам сытӧг.

Маша кыскыштіс нырнас кӧдзыд сынӧдсӧ, буркиа кокнас вештыштіс кок увсьыс гӧн кодь небыд лымсӧ, бӧр пырис аслас машинаӧ.

— Но вот, а ме вылӧ ставныс горзӧны.

Шофёрлы некод эз вочавидз. Сэки машина дорӧ котӧрӧн матыстчис руд шинеля, турунвиж погонъяса салдат. Гӧрдӧдӧм чужӧм кузяыс ефрейторлӧн визувтіс пӧсьыс.

— Кора прӧститны... военкоматын дыр видзисны, — морӧссӧ водзлань чургӧдӧмӧн рапортуйтіс салдат, сэсся лӧсьӧдыштіс югъялан пражаа тасмасӧ, тэрыба пӧрччис вещевӧй мешӧк, пуксис ӧчкиа нывбабакӧд орччӧн.

Сійӧ жӧ здукас машина небыдика вӧрзис места вывсьыс да ыджыд скоросьтӧн мӧдӧдчис паськыд туй кузя.

— Пасибӧ, абу кольӧмныдӧсь. Ме и сідз нин отпуск бӧрын сёрма. Талунъя поезд вылӧ кӧ ог веськав, лёк лоӧ, — недыр мысти нурбыльтіс салдат.

Пассажиръяс чӧв олісны, скӧралісны сы вылӧ.

Машина тӧвзис шыльыд тракт кузя. «Победалы» паныд ӧти бӧрся мӧд котӧртісны телеграфнӧй столбъяс, гыӧртӧм потшӧсъяс, вӧр діяс. Лым эз нин усь. Сӧмын лэчыд тӧв гуляйтіс тыртӧм туй кузя. Маша видзӧдіс канаваяс пӧлӧн сулалысь еджыд шапкаяса пуяс вылӧ да ас кежас нимкодясис. Арся зэръяс бӧрын тӧвся луныс сылы кажитчис вӧвлытӧм мичаӧн. Окота вӧлі петны машинаысь да ылӧдз котӧртны ляпкыдик лым кузя.

Пассажиръяс дырӧн варовмисны. Шилов кресталіс кокъяссӧ да висьтавліс асланыс лесопункт йылысь, кӧні сійӧ уджалӧ дас витӧд во.

— Окота на уджавны уна-уна во, а вот пӧрысьмыны куті, — ышловзис сійӧ.

— Сӧкӧл кодь на, ен сыкӧд, — кӧк моз шыасис бабушка. — Уджалан на ассьыд пайтӧ.

— Да и кыдзи не уджавны, кор тэнӧ уважайтӧны, — кияснас шеныштіс Шилов. — Ме со прӧстӧй вӧр лэдзысь, а Москваӧдз, министерствоӧдз, сӧвещанньӧ вылӧ корисны.

Маша бергӧдчыштліс сьӧд полушубока пассажирлань, кодӧс ӧнӧдз лыддис служащӧй туйӧ. «Со вӧлӧм мыйла тэрмасьӧ». — И ӧддзӧдіс машинасӧ.

Бабушка медсясӧ ошйысис аслас Серёжа пиӧн, коді уджалӧ кӧрт туй вылын.

— Со тай, думыштӧма гӧтрасьны. Медъя, медъя... Кувтӧдз кӧть внукъясӧн любуйтчышта.

— Коді нӧ пиыдлӧн гӧтырпуыс? — ӧчкисӧ лэптыштліс портфеля нывбаба.

Бабушка лэдзыштіс ной шальсӧ пельпом вылас, чӧскыда нюлыштіс пардорсӧ, и сӧмын та бӧрын вочавидзис:

— Дусяӧн шуӧны. Кӧрт туй вылас жӧ уджалӧ. Зэв шань нылыс. Варов, мича. Да и, майбырлӧн, киподтуйыс эм. Бур кӧзяйка лоӧ. Серёжа ӧмӧй босьтас кутшӧмсюрӧӧс!

Маша ачыс эз вӧв мича и, мыйлакӧ, дӧзмис татшӧм сёрнисьыс. Сылы кажитчис, мый тури кодь вӧсньыдик голяа баб вывті нин ошкӧ ассьыс моньпусӧ.

«Варов, мича, — думсьыс нерыштіс старукаӧс сійӧ. — А характерыс, колӧкӧ, некытчӧ туйтӧм. Морттӧ ӧд ӧти мичлун кузя оз позь донъявны. Со тай, менам пассажиркаӧй абу жӧ мисьтӧм чужӧм вылас, а сьӧлӧмыс, тыдалӧ, изйысь чорыдджык».

— Друг да ӧшыбитчис пиыд? — ичӧтик кыр кайыштӧм бӧрын бабушка дінӧ шыасис Маша. — Быд югъялантор оз овлы зарни.

— Мортыдлы колӧ веритны, радейтны сійӧс, — юрсӧ пӧлыньтыштіс Шилов. — Тӧдмасян кодкӧдкӧ, и он тӧд, мый сы йылысь думайтны. И друг, кутшӧмкӧ ӧти лунӧ, аддзан сылысь сы мында бурсӧ, код йылысь некор эн кужлы думайтны. А мыйта миян сэтшӧм йӧзыс. Дерт, эмӧсь и сэтшӧмъяс, кодъяслӧн сьӧлӧмыс тыртӧм.

Пельсӧ чошкӧдӧмӧн кывзіс бабушка, но сідзи и эз гӧгӧрво: ошкӧны сылысь моньпусӧ али вӧйпӧны. Сійӧ кӧть дзик на ӧтчыд аддзыліс Дусяӧс, но сьӧлӧмнас эскис сылы, чайтіс, мын сыысь шань нылыс абу вӧльнӧй свет вылас. Окота вӧлі ещӧ висьтавны том гозъя йылысь, но машина крута сувтіс. Тайӧ лои сэтшӧм виччысьтӧг, мый бабушка весиг тшӧкмуніс.

— Тьфу, прӧсти господи, тайкӧ пӧрӧдан!

«Победа» сулаліс ичӧтик сикт помын. Куим ӧшинь ляпкыдик керка дорсянь, кияснас ӧвтчигтыр, машиналы паныд котӧртіс тӧдтӧм нывбаба. Сійӧ вӧлі ӧтпӧлӧса, юрси пратьяссӧ лэчыд тӧв шыблаліс ӧтарӧ-мӧдарӧ. Пельпом вылас плаввидзис гырысь цветъяса кашемир чышъян, коді вот-вот усьӧ дзикӧдз.

— Сулав! Су-лав! — ыджыд гӧлӧсӧн горзіс сійӧ, кӧть и машина сідз нин сулаліс.

— Мый лои? — машина ӧдзӧссӧ восьтіс Маша.

Ар кызь вита, сартас кодь косіник нывбаба кыкнан кинас кутчысис сьӧлӧм бердас, дыркодь пошиктіс, сэсся вазьӧм синъяссӧ чӧвтіс ушанкаа ныв вылӧ.

— Ой, мездӧй, бур йӧз! — сӧмын и удитіс шуны сійӧ, сэсся надзӧникӧн лэччысис южмӧм лым вылӧ, сыркъялӧмӧн кутіс бӧрдны.

Ефрейтор звиркнитіс места вывсьыс, уськӧдчис нывбаба дінӧ. Электропильщик да ӧчкиа нывбаба гӧгӧрвотӧма видзӧдлісны ӧта-мӧд вылас.

— Мый нӧ лои? Мый лои? — выльысь юаліс Маша, сэсся отсаліс салдатлы лэптыны нывбабаӧс.

Нывбаба сьӧкыда сувтіс кок йылас. Ӧти кинас кутчысис Машалы сояс, мӧднас зыраліс ассьыс морӧссӧ. Векньыдик ныр боктіыс кык вожӧн сӧдзӧдчис синва.

— Нылӧй... нылӧй куланвыйын... Светочкаӧй... — слабиник гӧлӧсӧн шуыштіс сійӧ. — Больничаӧ колӧ нуны.

Сӧмын ӧні Маша гӧгӧрвоис ставсӧ.

— Да тэ эн бӧрд, гражданка, справитчас нылыд, — нывбабаӧс бурӧдіс салдат.

— А кулӧ кӧ? — став тушанас сыркъяліс нывбаба. — Ӧти ӧд сійӧ менам, дзик ӧти! Шофёр, босьт миянӧс. Княжпогост больничаӧ кӧть ну.

— Карӧдз жӧ матынджык.

— Асывбыд нин машина кыйӧда. Быттьӧ нарошнӧ, талун оз ветлыны. Босьт, нэм ог вунӧд буртӧ.

Маша видзӧдіс шогсьысь нывбаба вылӧ, синваыс муртса оз пет. Кӧсйис шуны меліджык кыв, бурӧдны мамӧс, но горш діныс гӧрддзасис, кывйыс эз артмы.

— Рад эськӧ босьта, да ог вермы, — пыдісянь ышловзис Маша. — Аддзан: пассажиръяс менам машина тыр. Час нёль мысти карӧ кута кайны, сэки — пӧжалуйста.

Нывбаба кияснас тупкис чужӧмсӧ, шатлалігтырйи мӧдӧдчис бӧр. Маша вӧтӧдіс сійӧс, босьтіс сойбордйӧдыс.

— Эн дыр ветлы! — бӧрсяньыс горӧдіс лыддьысьысьяслӧн конференция вылӧ мунысь. — Тэрмасям.

Но Маша ӧвтыштіс сӧмын бензин дука кинас, отсаліс нывбабалы кайны кильчӧ поскӧд, пырис керкаӧ.

Шофёр бӧр локтіс машина дінӧ бура дыр мысти. Пассажиръяс сулалісны туй вылын.

— Пуксялӧй! Мӧдімӧ!

Пассажиръяс эз вӧрзьыны.

— Ёна висьӧ? — шаль помнас вомсӧ чышкыштіс бабушка.

— Нелямын сайӧ температураыс.

— Мда... Виччысьтӧмтор, — нюжӧдіс Шилов.

— ЧП, — юрсӧ лэдзис салдат.

Бабушка кӧсйис чӧвтны пернапас, но видзӧдліс пограничник вылӧ да бӧр лэдзис кисӧ.

— Колӧ отсавны налы, — разис шинель кизьсӧ салдат. — Ме кольчча татчӧ, а найӧс босьтӧй. Пӧпутнӧй машинаӧн кыдзкӧ муна.

— Тэ жӧ сёрмыны верман, бур пиӧй. Ачыд шуан: лёк пӧ лоӧ, — шыасис бабушка. — Татшӧм кӧ нин делӧыс, меным бурджык кольччыны. Дерт, окота вӧлі свадьба вылын гажӧдчыштны, но мый вӧчан. Ме ӧд ачым мам — гӧгӧрвоа.

Маша уськӧдчис старука дінӧ, окыштіс сылысь кӧдзыд чужӧмбансӧ.

— Ме думысь, висьысьӧс ӧні жӧ колӧ мӧдӧдны карӧ, — кыліс ӧчкиа нывбабалӧн гӧлӧс. — Ӧти-кӧ, сэтчӧдз матынджык, мӧд-кӧ, врачьясыс опытнӧйӧсьджык. Да-да... Сӧмын карӧ.

Мыйкӧ дыра вӧлі шы ни тӧв, сӧмын кыліс тӧвлӧн небыдика пошиктӧмыс. Портфеля нывбаба пӧрччис ӧчкисӧ, и Маша аддзис, кутшӧм меліа видзӧдӧны сылӧн мудзыштӧм синъясыс.

«Йӧй ме... — асьсӧ ӧні видіс шофёр. — Ме сійӧс «сукарӧн» думайті, туй чӧж виді, а со вӧлӧм кутшӧм бур сьӧлӧма. Со и тӧд морттӧ».

— Артмӧ, миянлы колӧ прӧщайтчыны тэкӧд, барышня, — меліа шуыштіс Шилов.

— Друг да тэ ме вӧсна сёрман Москваӧ, — гӧрдӧдіс Маша.

— Верма и сёрмыны. Надейтча — прӧститасны, ӧні оз ас йылысь ков думайтны, а сы йылысь, кыдзи спаситны нывкасӧ.

— Вернӧ! — шуис салдат.

— Но, барышня, бергӧд машинатӧ, и айда карӧ. А тэ, пограничник ёрт, котӧртлы керкаас да висьтав: мед петкӧдасны висьысьсӧ, — командуйтіс Шилов.

— А кыдзи нӧ ті? — тшӧкмуні Маша.

— Кутам пӧпутнӧй машина виччысьны, — котӧртігмозыс вочавидзис салдат. — Миян вӧсна эн шогсьы, кыдзкӧ мунам.

Машалы окота вӧлі уськӧдчыны тайӧ бур сьӧлӧма тӧдтӧм йӧз дінас да кутыштлыны налысь кияссӧ! Сійӧ крута бергӧдіс машинасӧ карлань.