* * *

Тавой енэжас ӧти кодзув —
Лэбач кельӧбсьыс кольччӧм лов.
Быттьӧ воштӧма туйсӧ водзӧ,
Быттьӧ нинӧм нин оз и ков.

Ӧтка кодзулыс — ӧтка сьӧлӧм —
Чӧла югзьӧдӧ енэж шӧр.
Сӧмын сы кындзи нинӧм вӧлӧм
Оз нин ков да и оз нин тӧр.

Ӧтка кодзулыс — сӧстӧм синва,
Енэж бан бокын — дзирыд войт.
Усяс — сьӧлӧмӧ дойыс инмас,
Сылас — кодлӧнкӧ кусас мойд.

Гашкӧ, тэнад, а гашкӧ-й, менам —
Кодзув енэжас ӧти-й эм.
Пемыд синъяса войсӧ веніг,
Видзӧ тэнсьыд ли менсьым нэм.