* * *

Сьылан меям, сьылан,
Мича авъя пиӧ!
Долыда ме тэнӧ
Босьтлі мелі киӧ.

Сьӧлӧм шӧрын кӧсйи
Тэнӧ быдтыны ме;
Со тай быдтор ми сідз
Вӧчны кӧсйысьлімӧ!

Уна на тэд колӧ,
Мый эг сетны эшты,
Сӧмын олӧмтӧ тай
Вунӧдӧмысь вешті.

Кытчӧ тэнӧ лэдза?
Кодкӧ босьтас-ӧ мӧд?
Тыдовтчас бур йӧзлы,
Кыдзи мыччысьӧмыд?

Еннога поп лёка
Видзӧдлас тэ вылӧ;
Уна тӧдысь-кужысь
Сералӧ нин, кылӧ…

Крестьянин оз идрав
Лолас тэнӧ, пиӧ;
Вӧтасьӧ вот йылысь
Лун-вой коньӧр сійӧ!

Вӧччӧдас код тэнӧ?
Код ордӧ тэ мунан?
Петлӧ! Он на вош тэ!
Вунӧдім ми уна!

Велӧдчӧ со кориг
Айтӧм пӧнӧмар пи,
Ывлаын со кӧмтӧм
Чеччалӧ тай Карпӧ…

Кодкӧ найӧ костысь
Быдтас сьӧлӧм вылас
Меліа, ме моза
Тэнӧ нора сьылас!

Уна тӧдысьясӧс
Найӧ шензьӧдасны,
Тэнӧ, коми сьылан,
Ылын нимӧдасны!