СИБИРЬ


Да, вӧліс коркӧ кад! Эн угодит — Сибирь!
Босьт киад зумыд бедь, зэвт катаржнӧй ноп кӧлыс.

Мед сотӧ дугдывтӧг сибирскӧй кӧдзыд тӧлыс,
Кын мусӧ тэ кайлоӧн йир сэн, йир и йир!

И йирис уна морт сэн сійӧс уна нэм.
Наручникъясӧн киас, кандалаӧн кокас,
Мед царь водзын, мый вӧчліс, вештыссис став лёкыс
И мӧдар светын бӧрас прӧститіс тшӧтш ен.

И лыдтӧм каторжниклӧн тёпкис муас пӧсь,
И тёпкис вир, но мавтны тронлысь-ӧ сім ӧсь?
Эз, эз, — мед кынмыны рубинъясӧ, алмазӧ.

И найӧ кынмисны. А сьӧлӧм пытшкӧс би?
Сибирскӧй нефтьын ломзьӧ, — нимкодясьӧй ті! —
И братскӧй ГЭС-ын, кӧн ми уджӧ йитім васӧ!

1968