САУНА

Тайӧ вӧлӧма важӧн, зэв важӧн, кор миян пӧльяслӧн на пӧльясыс гачтӧг пызан увті нёль кокӧн тімбылясьлӧмны. Сэки ӧд сідз жӧ, миян дырйи моз, туристъясыд вӧлӧмаӧсь, сӧмын мӧд ногӧн шулывлӧмаӧсь найӧс-а.

Веськавлӧма кыдзкӧ Коми муӧ ӧти финн. Код тӧдас, кыдзи татчӧ воӧма, дыр-ӧ олӧма миянын да кыдзи бӧр мунӧма. Но висьтавлӧны: ёна кӧсйӧма тӧдмасьны коми йӧзлӧн олӧм-вылӧмӧн, стрӧйбаясӧн. И пыр вӧлӧм гижалӧ ставсӧ кыз тетрадьӧ да весиг серпасалӧ.

Зумыд овмӧса дядьӧ ордын патеруйтӧма, став уджсӧ видлӧма, мый йӧзыс сійӧ каднас горт гӧгӧрас бергӧдлісны. Дерт, кӧнкӧ, ӧткодявлӧма и асланыс олӧмкӧд. Кажитчӧма финныдлы миян пӧльяслӧн кужанлуныс да сюсьлуныс. Быдтор ӧд сэки ас ки помысь на вӧчавлісны, эз магазинысь ньӧбавны. Пыралӧма гӧсьтыд жытникӧ и кӧбрегӧ, гидӧ и рынышӧ, гӧгӧрбок быдтор синмалӧма-видлалӧма. Сэсся и пывсянас кӧзяинкӧд лэччасны.

А сёрнитны некодныс ӧта-мӧд ногыс оз кужны, кияснас да кокъяснас петкӧдлӧны.

— Кыдзи нӧ тайӧ шусьӧ? — пывсян пытшкас кияснас шенасигтырйи юалӧ финн.

— Са уна, — вочавидзӧ кӧзяин, — да ми ӧд сійӧс кадысь кадӧ роскӧн чышкалам.

— А, сауна! — гӧгӧрвоӧ мӧдыс да пасйыштӧ аслыс тетрадьӧ. — А мый ті тані вӧчанныд?

— Со татчӧ пачас пес пыртлам, пӧртъяс ва ваялам, ломтам. А мыйӧн ваймас, гор вылас ва койыштам. Гӧтыр пӧрччысяс да вылыс джодж вылас водас, а ме сійӧс корӧсьӧн бурпӧт швачӧда, а сэсся сійӧ — менӧ. Сьӧлӧм бурмытӧдз пывсям да гортӧ каям.

Но кӧть кыдзи эз висьтав мужик, сідзи эз и гӧгӧрво мӧдыс.

Аскинас дзик гӧсьт вӧсна пывсян ломтісны, петкӧдлісны сылы, кыдзи коми йӧз вермӧны пывсьыны. Ёна и кажитчис сьӧд пывсяныс мортыдлы. Финляндияад ӧд сэки, вӧлӧм, ва шонтасны да ыджыд пельсаясын и мыссьӧны, пывсьӧмтӧ абу на тӧдлӧмаӧсь. А кутшӧм нӧ сійӧ мыссьӧм? Нильзьылан сӧмын.

Мыйӧн мунӧма гортас финн, пыр жӧ и стрӧитӧма коми йӧз моз сьӧд пывсян, сӧмын нимсӧ сідзи и кольӧма: сауна. И ӧнӧдз на сідзи шуӧны. Весиг рочьяс мӧдісны саунаяс вӧчавны да финнъяслы аттьӧ висьтавны, кӧть эськӧ комияслы тайӧ медвойдӧр инмӧ. Ӧд финнъястӧ найӧ велӧдісны жар пывсянъяс вӧчавны.