САРАЙ ЫБӦС
Шондіӧн пӧжӧм амбар дор. Миянлы сійӧ вӧлі чом. Локтам, пуксялам гулюяс моз лунтырӧн шоналӧм пӧвъяс вылӧ. Но пукавсяс ӧмӧй йылӧмыдлы? Петшӧра турунӧд пышъям, и чишкалас ки-кокнымӧс петшӧрыс. Жар лунӧ шондіысь дзебсьыны котӧрӧн каям кильчӧ содйӧд да пырам сарайӧ. А сэні йӧшкыд, сэтчӧ шондіыс оз веськавлы... Пась-пась восьтам сарай ыбӧссӧ, син водзаным шевкнитчас шонді водзас вералысь ю ковтыс. Ми ланьтам тайӧ мич водзас, а ловным дась нин морӧс кудйысь лэбыштны кыпыд енэжас: кыв шутӧг ставным ӧттшӧтшмоз чеччыштам сарай порог дорсянь... Лэбам-лэбам енэжа-муа костас. Но тайӧ сӧмын здук. Кок дзинавмӧн бӧр воам петшӧра му вылас. И джӧмдалігтыр котӧртам вадорӧ. Ӧктам шонді водзын югъялысь посни изсӧ зепъяс тырным. Кытчӧ сэсся найӧс вӧлі воштам — чомйӧ нуам либӧ сикт шӧрӧд дзольгысь югыд шорӧ шыблалам — ог помнит. Но колӧ вӧлі аддзавны сэтшӧмъясӧс, мед сэсся некодлӧн эз вӧв тэнад кодьыс.
А сэсся лэпта видзӧдласӧс, и тайӧ здукас чардби ньӧв син оровтан потасӧн вундас енэжсӧ шӧри. Мукӧдыс казялӧмаӧсь жӧ, котӧртӧны нин сиктлань, ме на бӧрся кавшася джуджыд берегас. А сэсся гым шы улӧ нин ӧта-мӧдлы вежмӧн крапӧдам кильчӧ ӧдзӧс. Уськӧдчам веськыда сарайӧ да ӧдйӧджык сиптам енэжас петысь ыбӧссӧ. Сувтам и сулалам пемыд сарай шӧрас, ичӧтик сьӧлӧмӧн кывзам, кыдзи гымайыс йиркӧдлас тэльӧга вӧлӧн... Тан кӧть чардалӧмыс оз тыдав.
Дыр-дыр сулалам сарайын, асьным полам, но керкаӧ ог пырӧй — Палэй баб видас, шумитны оз лэдз. А сэсся вылісянь кодкӧ керка вевт пасьталаыс сикӧтш моль сявкнитас. А здук мысти ыджыд шумӧн нин ызнитас. Зэрмӧ!.. И быд коласӧд ылькнитӧ уль сынӧд — и ми радпырысь рай-рай восьтам сарай ыбӧснымӧс.
Нэм чӧжнас Палэй баб мыйтаыськӧ и восьтыліс да сиптыліс жӧ сарай ыбӧссӧ... Тайӧ вӧлі аслыспӧлӧс кыв — ыбӧс восьтӧмӧн видзаасьны ывлавыв олӧмыскӧд. Палэй баб важӧн нин кувсис, и керкаас некод оз ов. А ме мӧвпнам пыравла на сэтчӧ: пытшкӧс жыръяс тан сійӧ молитчывліс, татӧн сулалісны ӧбразъяс, ӧзйылісны сисьяс, воддза жыръяс ӧти ӧшиньӧд видзӧдлі ме выльӧн мыччысьӧм тӧвся гӧрд шондісӧ и тайӧ ӧшиньӧдыс жӧ виччыси Варук тьӧтлысь ме арлыда жӧ Сашкӧӧс, сійӧ вайлывліс миянлы йӧв... Петала мӧвпӧн и пемыд сарайӧ, кӧні коркӧ ичӧтнам аддзи — сарай шӧрын быттьӧ тыдавтӧм кодкӧ сулаліс да ыпмунӧм би кутіс киас. Тайӧ вӧлі шонді югӧр. И нэм кежлӧ босьті сійӧс аслым, и кокниа верма судзӧдны лов пытшкысь кӧть кор да ловзьӧдны син водзын. А кыдзи эськӧ сійӧ кужис йиджны олӧмам?.. Ог тӧд. Кымын во шонді ньӧв моз пестысьӧ меын, но сямма-ӧ тайӧс висьтавны кывйӧн?..
