РЫТЪЯ АНЬ
Ыркӧдчигмоз петіс Евлог ывлаӧ рытъя сынӧднас лолыштны и паныдасис Семен Васькӧд. Во сайын мортыд дӧвечӧн коли. Чолӧмасисны, сулалӧны да надзӧникӧн баитӧны, юксьӧны асланыс тӧждъясӧн да могъясӧн. Но и юаліс, кыдзи нин сійӧ дзик ӧтнасӧн олӧ, абу-ӧ гажтӧм войяснас. И вот мый сійӧ висьталіс.
— Мыйла гажтӧм? Ньӧти абу. Дерт, пель водзад некод оз зыньгы лунтыртӧ да ӧти ногӧн кӧ, ёна лӧсьыдджык. Но да ӧд быд рыт сэсся ме дорӧ волывлӧ мича ань. Чунь рӧчнас дзик стӧч ӧкмыс часын ӧдзӧсӧ квайтысь таркнитас тадзи: «Тонь, тонь, тонь», — и пырас. Дыр сэсся ми сыкӧд варовитам. Дерт, медсясӧ сійӧ меным висьталӧ, юксьӧ выльторъяснас, бурнас и лёкнас тӧдмӧдас. Ме сӧмын сылы: «Да-да», — кайта. Аслым любӧ, ӧд сэтшӧм том да сӧстӧм ань мекӧд сёрнитӧ, ме вылӧ видзӧдӧ кельыдлӧз сӧдз синъяснас, сёрниыс быттьӧ ичӧтик вӧрса ёль дзольгӧ, сэтшӧм мыла, ур гӧн кодь небыд, тӧдчӧ, мый табактӧ оз шпуткы. Чужӧмыс сэтшӧм гӧгрӧсіник, дзик кӧвдум моз банйӧма, и пыр меным меліа нюмъялӧ. А ме сы водзын сідзи и сыла, сідзи и сыла.
«То, другӧ, — думайтӧ Евлог. — Кыдзи мойвиӧма Семен Васьыдлы. Этатшӧм шӧк тугйыд кӧ быд рыт волывлӧ, дерт, сійӧ ёнасӧ оз и шогсьы гӧтырыслӧн кулӧм бӧрад».
— Быд лун выль паськӧмӧн ме водзын петкӧдчӧ, и ставыс сэтшӧм ладнӧя вылас пукалӧ, быдпӧлӧс платтьӧыс сылы мунӧ.
— А коді нӧ эськӧ сэтшӧм мича аньыс? Колӧкӧ, ме тӧда сійӧс?
— Ог тӧд, бара-й, висьтавны али не? Тэ ӧд поводнӧй да, верман и мырддьыны на сійӧс, дьӧбӧ менӧ кольны.
— Да тэ нӧ мый?! Том дырйи весиг менам сэтшӧм модаыс эз вӧв да ӧні кысь нин? Да и ловъя гӧтыр дырйи сэсся ме дорӧ ӧд оз жӧ кут волывлыны! Збыль висьтав, колӧкӧ, тӧдса меным?
— Тӧдса, дерт, кысь нӧ сійӧс он тӧд!
— Но, висьтав, коді тэнсьыд сэтшӧмасӧ сьӧлӧмтӧ быд рыт шонтӧ?
— Ладнӧ, сӧмын тэ некодлы водзӧ эн паськӧд, а то йӧзыд лёк сёрнисӧ кыпӧдасны сы йылысь да вермас дӧзмыны и дугдас ме ордӧ волывлынысӧ.
— Дерт, ог. Вомдорӧс каличала, ва кута новлӧдлыны вом пытшкын, а некодлы ог висьтав.
Семен Вась корис Евлогӧс копыртчывны ас дорас матӧджык да дзик пель водзас вашкӧдіс:
— Ольга Кокорекина.
— Коді тай «Программа «Времятӧ» нуӧдӧ?
— Сійӧ и эм.
— Но тэ и солыштін жӧ! А ме тані йӧй моз пельясӧс ӧшӧдӧмӧн да вом паськӧдӧмӧн тэнӧ кывза!
