РУЧ ДА СЁКЫР

Важӧн олісны-вылісны руч да сёкыр ӧтлаын. Кор няньыс быри, пуд вӧчисны, кодсӧ начкыны. Пуд сюри сёкырӧс начкыны. Сёкыр шуӧ:

— Менӧ начкыны колӧ пан пурт.

Руч мунӧ Пан ордӧ:

— Панӧй, Панӧй, вай тэ пурттӧ сёкырӧс начкыны, менӧ, ручӧс, вердны.

Пан шуӧ:

— Менам пурт ныж, колӧ Ен зуд.

Руч мунӧ Ен дінӧ:

— Енманӧй, Енманӧй, вай зудтӧ пан пурт кеслыны, сёкырӧс начкыны, менӧ, ручӧс, вердны.

Ен шуӧ:

— Менсьым зуд кыскыны колӧ тӧлысь ӧш.

Руч мунӧ тӧлысь дінӧ:

— Тӧлысянӧй, тӧлысянӧй, вай ӧштӧ ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Тӧлысь шуӧ:

— Менам ӧш оз мун шонді зонтӧг.

Руч мунӧ шонді дінӧ:

— Шондіанӧй, шондіанӧй, вай зонтӧ тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Шонді шуӧ:

— Менам зон оз мун кӧч йӧвтӧг.

Руч мунӧ кӧч дінӧ:

— Кӧчанӧй, кӧчанӧй, вай йӧвтӧ шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кӧч шуӧ:

— Менам йӧв оз пет пипу пӧдӧнчатӧг.

Руч мунӧ пипу дінӧ:

— Пипуанӧй, пипуанӧй, вай пӧдӧнчатӧ кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, сёкырӧс начкыны, менӧ, ручӧс, вердны.

Пипу шуӧ:

— Менам пӧдӧнча оз шед кынь пиньтӧг.

Руч мунӧ кынь дінӧ:

— Кынянӧй, кынянӧй, вай мем пиньтӧ пипу пӧдӧнча перйыны, кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кынь шуӧ:

— Менам пинь оз шед кузнеч клещитӧг.

Руч мунӧ кузнеч дінӧ:

— Кузнечанӧй, кузнечанӧй, вай клещитӧ кынь пинь перйыны, пипу пӧдӧнча вӧчны, кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кузнеч шуӧ:

— Вомтӧ паськӧд да кывтӧ нюжӧд.

Руч вом паськӧдас, кыв нюжӧдас, а кузнеч пӧсь клещиӧн ручӧс кывйӧдыс кутас и сэтчӧ и виас.