РУЧ ДА ПОНЪЯС
Старик гозъялӧн вӧлі кык пон да курӧгъяс. Гӧльӧсь вӧліны. Пывсян вевтсӧ нин ломтӧмаӧсь, тьӧссӧ. Толькӧ нин йиркыс муа на.
Тулыс воис да йӧзыс быдӧн гӧрӧны да кӧдзӧны, пуктысьӧны. А налӧн муыс абу. Дыш радиыс ли мый ли эз и лӧсьӧдлыны, эз босьтлыны. А видзӧдӧны, да тожӧ окота лои. Мыйкӧ пӧ кӧть пуктыштны колӧ, да муыд абу, некытчӧ.
Старукаыд и шуӧ:
— Мый нӧ некытчӧ? Пывсян йиркным вевттӧм, тыртӧм, восьса. Менам сёркни кӧйдыс эм. Кӧть сійӧс кӧдзам, петам да.
Мужик сӧгласитчис.
— Збыль ӧд, миян сэтчӧ сёркни позьӧ кӧдзны.
Гӧтыр босьтіс сёркни кӧйдыс, мужик — грабли, зыр, пывсян пельӧсӧд гыж-гаж кайис пывсян йирк вылӧ, гӧтыр сэн зыр мыччис, грабли сетіс. Гудйысьыштіс сэн старик и кӧдзис сёркни кӧйдыс.
Ӧшинь дорын пукалӧны гожӧмбыд сёркни виччысьӧны. А сэн ӧд муыд лёка ляпкыдик, жарнас, лун-мӧд кӧ оз зэр, косьмылӧ. Кор зэрас, эськӧ и удитас быдмыштны. Коркӧ коръясис, быдмыштіс лук кодьӧдз кымын, гашкӧн. Сэсся и ар воис. Йӧзыс то галанка вайӧны, то капуста, то редка, картупельтӧ босьтӧны.
— А миян эськӧ, старик, колӧ жӧ сёркнитӧ нетшкыны да! — старука шуӧ.
— Колӧ, дерт, ӧд и ар лоӧ. Колӧ уберитны. Петавлам да нетшкам!
Старукаыс босьтіс кӧрзина, старикыс пурт: ме пӧ сэн тшӧтшӧда, каям йирк вылас да.
Петісны, а пывсян пельӧсыд сісь нин вӧлӧма, ёна нин сись. Коркӧ пывсян горсьыс шыблавлӧмаӧсь изсӧ, да пывсян гӧгӧрыс изйыс унакодь. Пондіс старукасӧ первой кӧзяиныс лэптыны. Лэптіс, лэптіс, старука кутчысьӧ, гыжъясьӧ. Пельӧсӧ кутчысис, пельӧс жугаліс да старука жмотькысис-усис. Старик скӧрмыштіс дай шуӧ:
— Тэысь тай пӧльзаыс нинӧм абу. Вай ме кая. Меным отсышт бӧрладорсянь.
Старик кайис, гӧтыр отсыштіс, кайис да сёркнитӧ нетшкис, муас шыблаліс, гӧтыр сэн тшӧтшӧдӧ. Гашкӧ и кӧрзина тыр нетшкис.
— Сэсся, кӧзяйка, абу.
— Абу кӧ, лэччы.
— Лэчча, да мед эськӧ ог усь. Вай кинад кутышт менӧ.
Кокъяс ӧшӧдіс пывсян пельӧсӧ, кинас кутчысис, кокъясӧн гыж-гаж. А пывсян пельӧсыд жугалі, керйыд пазалі, дай старикыд уси, как раз сылӧн кӧсичаыс веськалі из вылад, да и кулі. Старука бӧрдны кутіс. Бӧрдіс, бӧрдіс и шуӧ:
— Аттӧ, мудзи нин бӧрдныыд да, колӧ тай кодӧскӧ медавны бӧрдысьсӧ, кывзыны дась бӧрдӧмсӧ.
Мӧдӧдчис кытчӧкӧ мунны бӧрдысьӧс-мастерӧс корсьны. Муніс, муніс да туй вылас паныдасис кӧчкӧд.
Кӧч шуӧ:
— Кытчӧ нӧ, бабӧ, мунан?
— А менам мужикӧй кулі, да бӧрдны колӧ. Ме бӧрднысӧ медавны кодӧскӧ кӧсъя.
— Вай менӧ нуӧд. Ме бӧрда.
— Но, заводитлы, кыдзи тэ бӧрдныыс кужан, лыддьӧдлыныыс?
Кӧч нӧ кысь кужас? Мыйкӧ «тив-тяв» асногыс шыасис. Старука шуӧ:
— Ме та вылӧ донтӧ ог мынты. Тэ он куж, мун аслад туйӧд, ме кыськӧ мастерӧс корся.
Бара водзӧ муніс. Муніс, муніс да руч паныдасис, шуӧ:
— Кытчӧ нӧ бабӧыс мунӧ?
— Менам мужикӧй куліс, да бӧрдысь колӧ. Ачым мудзи, ог вермы. Бӧрдысьсӧ кӧсъя медавны, лыддьӧдлысьсӧ.
— Менӧ босьт!
— Вай заводитлы, кыдзи тэ бӧрдан. А омӧля кӧ бӧрдан, ме ог медав.
Ручыд бурджыка бӧрдіс:
— А мый нӧ эськӧ, уна-ӧ коран лыддьӧдлӧмыд вылӧ?
— А мый нӧ унаыс?! Тэнад тай, со висьталан, курӧгъяс эмӧсь, да кык чипан кӧ сетан, сэсся сы вылӧ ме лыддьӧдла нин.
Пывсян дорӧ нуӧдіс, старик дорӧ старукаыс, да сэні и бӧрдӧ, лыддьӧдлӧ руч:
Коньӧрӧй дай бабӧӧй,
Дедыд тэнад кулӧма,
Турун пестӧ вайысьыд,
Керкатӧ шонтысьыд,
Бабӧӧс вердысьыд,
Коньӧрӧй дай бабӧӧй.
Баба шлюпкӧ, кинас тупкысьӧма да, зэв ёна бӧрдӧ. Тадзи раз дай мӧд. Сэтшӧма нормис бабӧлӧн сьӧлӧмыс, дугдыны оз вермы. Руч кыкысь бӧрдіс, сэсся шуӧ:
— Донтӧ кӧ он кӧсйы сетныыд, ог лыддьӧдлы.
— Сета, содтышта мыйкӧ, ещӧ лыддьӧдлы.
Сьӧлӧмыс нормис да.
А руч бара:
Коньӧрӧй дай бабӧӧй,
Коді нӧ тэныд кӧмкоттӧ вурас?
Коді нӧ тэныд пасьтӧ вурас?
Коді тэныд пестӧ ваяс?
Лыддьӧдліс, лыддьӧдліс, бабӧ толькӧ шлюпкӧ-бӧрдӧ. Бӧрдіс-бӧрдіс. Сэсся руч и шуӧ:
— Сэсся и тырмас!
А мӧдыс шуӧ:
— Но сэсся менам мынтыны донтӧ нинӧмӧн. Курӧгыд толькӧ кык. Час, тэ пукавлы кильчӧ вылын. Менам понъяс эмӧсь да керкаад пыртӧдныыд ог лысьт, тэнӧ ӧд косявласны. А ме мешӧкӧ сӧвта да тэныд и петкӧда.
Мешӧк пыдӧсад первой понтӧ сюйис ӧтикӧс. Сэсся вылысас кык курӧг пуктіс, кӧрталіс дай петкӧдіс.
— На, сэсся локныыд эн лысьт. Локтан кӧ, менам пон эм, косявлас тэнӧ.
А понъяс вӧлі ёна дружитӧны да ӧтикыс казяліс, мый мӧдыс мешӧкын. Эз вермы эновтчыны, кыйӧдӧ, кытчӧ старука мунӧ. Пуксьыштлас да, коньӧр, шогсьыштас, шогсьыштас да бара муныштас. Ручлы мешӧксӧ сетіс.
А руч гӧнитіс, гӧнитіс, мешӧк мышку вылас шыбитіс да, и думыштіс:
— Мый бара старукаыд пуктіс меным мешӧкад-а? Ме эг и видзӧдлы, мый сэтчӧ сӧвтіс. Гашкӧ, пасьшой пуктіс. Ыджыд тай зэв йӧрышыс. Час, пуксьыла да видла, мый сэтчӧ пуктіс.
Колода вылӧ пуксис, мешӧк кӧв разис, гусьӧникӧн ки сюйис, сюрис чипан. Чипанӧс кыскис да курч-карч зэв ӧдйӧ сёйыштіс, ньылыштіс, зэв чӧскыд кажитчис.
— Эз менам тай прӧста вош бӧрдӧдчӧмыд, — руч шуӧ. — Ещӧ на эськӧ колӧ вӧлі лыддьӧдлыны, вӧлі кӧ чипаныс.
Ачыс гӧнитӧ да тадзи думнас думайтӧ. Бара водзӧ гӧнитіс. Терпитныыд оз вермы, нюлыштӧ да нюлыштӧ вом дорсӧ.
— Час, унакодь на тай, зэв на сьӧкыд, пуксьыла да ӧтикӧс ещӧ сёйышта.
Бара колода вылӧ пуксис, мешӧк вом восьтіс, гусьӧникӧн кисӧ сюйыштіс, бара кипод улад чипан сюрис. И босьтіс вомад. Бара зэв регыд курч-карч сёйыштіс-ньылыштіс, мешӧксӧ кӧрталіс. Ёна вом доръяссӧ нюлӧ:
— Сэсся гортӧ воа да гортын кодӧс сёя, кодӧс местита, кытчӧкӧ пукта аски кежӧ.
Бара дыркодь нин муніс, эз на во гортас. Ылынкодь на. Думайтӧ:
— А мый нӧ тадзикӧн вежӧй петӧ! Колӧ, терпенньӧ абу. Кушӧдз кӧ бырӧда, сёя, сэсся и дум вылын оз ло. Час, пуксьыла да сёя.
А чипаныд эз нин вӧв. Сэн нин пон сӧмын никыльтчӧма. Китӧ сюйис, чипан эз сюр ки улад, гур-гаркерис, ыджыдджыка мешӧк вомыд воссис, понйыд тай сэсь чепӧсйис! А мӧд понйыд следитӧ матын. Кык понйыд тай мӧдісны ручлысь гачсӧ косявны. Гӧнитӧ руч, мый вермӧ, скокӧдчӧ, чеччалӧ, бӧж чургӧдӧма. Понъяс кватайтӧны: «ав-ав-ав, ав-ав-ав!» Эз удитны виныыд ручтӧ, кутныыд, матынджык нин вӧлӧма сылӧн гортыс и дзумгысис-пырис розьӧ. Син паськалӧма, повзьӧма, сьӧлӧмыс чеччӧ, вомӧдыс петӧ. Шуӧ руч:
— Синъясӧй, синъясӧй, мый нӧ ті видзӧдінныд эськӧ, кор ме пӧгибас волі понъясыскӧд?
Синъясыс шуӧны:
— Ми куньтырӧдлім, мед эськӧ тэ пуысь пуӧ люкасьлін, ми эгӧ и видзӧдӧ.
— А мыйла эськӧ тадз?
— Мед эськӧ тэнӧ понъясыс сёйисны, ми сы вылӧ радӧсь.
Зэв ёна скӧрмис. Тіянӧс пӧ ме понъяслы сета! Керыштіс да понъяслы шыбитіс.
— Кокъясӧй, кокъясӧй, ті нӧ эськӧн мый вӧчинныд, кор пикӧ волі понъясыскӧд?
Кокъяс шуӧны:
— Ми сконйӧдлім быд вужйӧ и быд роскӧ тэнӧ, мед эськӧ тэ понъясыслы сюрин.
— Аттӧ, кокъясӧй, кокъясӧй, ме тіянӧс понъяслы и сета.
Скӧр йывтіыс босьтіс чер ли мый ли да кокъяссӧ керыштіс, понъяслы шыбитіс гу сайӧ.
— Пельясӧй, пельясӧй, трустъясӧй, ті мый вӧчинныд?
— Ми кывзім пыр, ылынӧсь-ӧ-матынӧсь понъясыд, дай роскысь роскӧ крукасьлім, кор матысмисны понъясыд, мед тэнӧ кутасны найӧ.
— Дыш крутикъясӧй, мыйла нӧ ті сідзик менӧ крукавлінныд?
— Мед тэнӧ сёясны понъясыд.
— Ме тіянӧс понъяслы сета.
Сійӧ пельяссӧ вундіс да понъяслы и шыбитіс.
Понъяс бара сёйисны, а руч коли коктӧм и пельтӧм, синтӧм и быдӧн.
— Бӧжӧй, бӧжӧй, а тэ нӧ мый эськӧ керин, кор ме понъясыскӧд пикас волі?
Бӧжыс и шуас:
— Ме пуысь пуӧ гартласи, мырйысь мырйӧ кутчыси.
— Мыйла эськӧ тэ сідзикӧн гартласин?
— Мед тэ он вермы пышйыныыд да мед тэнӧ кутасны понъясыс! Скӧрмас да шуас:
— Понъясӧй, босьтӧй, ме тіянлы сета бӧжӧс, дыш крутеньӧс. Розьӧдыд увлань юрӧн сувтас, муланьыд юрӧн, бӧжтӧ лэптас, да понъяслы мыччас. А понъяс кватитасны да кыскасны ручӧс гортас.
А старука пыр на сэтӧні пукалӧ ӧшинь дорын. Видзӧдӧ, а понъясыд ручтӧ кыскӧны бӧжӧдыс.
Сэсся суседсӧ корис, ручлысь кучиксӧ кулисны, гашкӧ, и кыткӧ тшыкласьӧма нин, но позис на вузавны. Старукалы и нянь вылас деньгатор сюри.
