РУЧ ДА МУЖИК
Старик гозъя вӧлі олӧны. Дерт, юыс эз вӧв налӧн ылын, матын и вӧлі, куръя ли мый ли, чериа зэв. Шуӧны ӧд: ва вежӧдӧм дырйи пӧ чериыд вӧрӧ. Чери кыйны тӧлын колӧ крещенньӧ дырйиджык. А сэтшӧм веж мороз вӧлі. Старукаыслы старикыс и шуӧ:
— Старука, ме талун лэччыла ю вылӧ, чери кыйны ветла.
— Ветлы, ӧні тай, шуӧны, крещенньӧ дырйиыд, чериыд самӧй сюрӧ.
Старикыд и муніс чери кыйны. Чери кыйны муніс да зэв уна кыйис. А вӧла вӧлі, рӧзваля. Рӧзваль тыр мича чери сюри сылы.
Локтӧ руч. Руч локтӧ дай шуӧ:
— Дедушко, тэ меным черитортӧ он сет?
— Ог, ачыд кый. Ме войбыд тані кынми, а тэ дась чери кӧсъян сёйны. Ачыд кый.
— Кыдзи нӧ ме кыя?
— Бӧжтӧ йӧрданас сюй да, кытчӧдз оз сибды, сы мында виччысь.
А руч думайтӧ:
— Ак, тэ кӧсъян менӧ ылӧдлыны. Ме ӧд руч на, ме асьтӧ на ылӧдла.
Сійӧ дедӧӧс панйис и водзӧ гӧнитіс, туй вылас водіс, вом паськӧдіс, кокъяс чатыр лэптіс, лекнитіс, син кунис, туй вылын куйлӧ. А дедӧ сьылӧ доддьын да мунӧ, чери вайӧ, зэв рад.
Вӧлыс кутіс нырнас корскӧбтны да корскӧбтны. Оз водзӧ мун. Вачкыштӧ плетьӧн, ёрччыштӧ нин ас ногыс:
— Мый тэкӧд лоис? Друг станӧвитчин, он мун.
Видзӧдліс, мыйкӧ сьӧд водзладорас. Вӧлӧс панйис, видзӧдӧ: руч куйлӧ, кулӧма. Но пӧ, менам кык чассьӧ талун: чериыд и ручыд сюрис.
А черисӧ вӧлі ёна быдмавлӧма вонйӧн, додьсӧ быдӧн быдмавлӧма. Руч сюрис, и сюйыштіс сэтчӧ чери дорӧ, пологтӧ, вонтӧ лэптыштіс да тшӧтш сэтчӧ саймовтыштіс. Ачыс бара пуксис додь синмӧ, вӧв бӧрладорӧ. Додь бӧрладорас оз и видзӧдлы. А руч лэптыштіс рузум дортӧ, вевтыдлысь дорсӧ, туй вылад черитӧ пондіс шыблавны. Уна нин шыблаліс, гашкӧ, зэв этшаник кольыштіс гортад вотӧдз.
Старик воис коркӧ асывводз нин гортӧ. Зымӧдчис. Гӧтыр восьтіс звӧз. Пос йылӧ кум-кам вӧлӧн кайисны и зэв любӧ.
— Старука, тӧдан талун мый ме тэныд вайи?
— А мый нӧ?
— А додь тыр чери вайи дай воротник вылӧ тэныд руч ку вайи.
Зэв любӧ. Старука чуш-чаш додь вевт восьтіс. Додь вевтын ни чери, ни руч — нинӧмыс абу. Старик сэтшӧм шогӧ воис и ёрччыштлӧ, и матькыштлӧ, и ручӧс пинялыштӧ.
Но мый? Дерт, нин руч пӧръялӧма. Сідзик и лои миритчыны коньӧръяслы.
А руч петӧма да ӧктӧ черитӧ, чукӧртӧ аслыс, кытчӧкӧ позъяс гӧняйтӧдлӧ. Дерт, сійӧс мешӧкӧн оз ну, босьтыштас вомад, мый тӧрыштас да, унаысь нин нуис. А рытыс вӧлі кӧдзыд, тӧлыся, самӧй крещенньӧ дыр.
Кӧин мунӧ сэт. Кӧин мунӧ дай шуӧ:
— Ручӧй, кысь тэн чериыс?
— А кыйи ме.
— Тэ кыдзи кыйин? Юкышт вай. Меным да тэн шӧри юкам.
— Ог, тэ ачыд кый.
— А кыдз ме кыя? Ме ог куж!
— Ме тэнӧ велӧда.
— Кыдзи нӧ эськӧ кыйныыс колӧ?
— Со таті лэччы, мун ва дорас, сэн йӧрданыс восьса на. Ме кытысь кыйи, тэ сэтчӧ бӧрӧн бергӧдчы да йӧрданас бӧжтӧ сюй, сэн зэв дыр пукав да сэсся лэптыштлы. Лыбӧ на кӧ, сэк эн на лэпты. Кор оз понды лыбны, бӧжад тэн уна чукӧрмас, уна кутчысяс, сэк сэсся и лэпты.
Кӧин сэтчӧ и муніс. А руч ставсӧ нуаліс аслыс, меститіс черитӧ туй вылысь. Но, а кӧин пукалӧ. Синсӧ дзирдӧдлӧ сэтӧні йӧрдан дорын. Бӧж сюйӧма йӧрданӧ. Заводитлас лэптыны — кокниа на лыбӧ. Бара пукыштас. Коркӧ эз понды бӧжыд лыбны, сибдіс. Ӧтар-мӧдар клынь-клынь, чеччаліс-чеччаліс, некыдз эз бӧжыд сюр. Асывводз нин вӧлі, а бабаяс васӧ вӧлі ведраӧн сэсь катӧдлӧны, ю вывсьыс. Лэччӧны карнана бабаяс кыкӧн кымын вала. Локтісны, йӧрданын кӧин пукалӧ. Кӧинӧс эськӧ карнаннад кӧсйисны повзьӧдны, а сійӧ ӧтар-мӧдар шыбласис-шыбласис да бӧжыд сибдӧма ваад. Ӧтик баба сэтчӧ сулавны коли, а мӧдыс вӧлӧсьтас муніс да мужикъясӧс чукӧртіс. Кӧин бӧж орласьтӧдзыс сэтӧн чеччаліс, но сё ровно виисны сійӧс, ловйӧн эз лэдзны сэсся.
