РУСАЛКА


Сюрс кодзулӧн сёр рытын ӧзйӧма Мисхор,
Лӧз Чёрнӧй море весьтті кывтӧ югыд Тӧлысь.
Из вылӧ гыяс вӧтлӧ войся небыд тӧлыс.
И нывбабалысь сэсь ме чужӧм аддза нор.

Сы морӧс бердын кага; мыськӧ найӧс гы;
Но дзоргӧны сэн найӧ кипарисъяс вылӧ,
Кузь мечьяс сямӧн кодъяс кыптӧмны креж йылӧ
Да кывзӧны зэв чӧла море бузгӧм шы.

Ме юала: — Арза,* тэ мыйла сэтшӧм нор?
И мыйла тэ он нюмъёвт, шонді петӧ кор?
Сир курыд шогтӧ ассьыд мыйла тэ он кондыв?

И шуӧ мен Арза: — Ме сы вӧсна зэв нор,
Мый кыпыдлунӧс менсьым ньылыштіс Босфор
Да долыд югӧрсӧ оз кояв меным шонді.

1962 во.


* Арза — кыдз висьталӧ легенда, — труженик Абий-акалӧн ныв, кодӧс свадьба лунас гусялӧма турецкӧй разбойник Али-баба, нуӧма Стамбулӧ да невольникъяслӧн рынок вылын вузалӧма турецкӧй султанлы. Сысянь Арзалӧн чужӧма кага. Арза сійӧс босьтӧма морӧс бердас, шыбитчӧма султанскӧй башня вывсяньыс Босфорӧ да лоӧма русалкаӧн. Русалка — Арза быд во ӧтчыдысь петкӧдчывлӧ кагаа моздорнас аслас рӧднӧй Мисхор берег дорын буретш сійӧ лунӧ да здукӧ, кор сійӧс гусяліс разбойникыс. Тайӧс и нэммӧдӧма ӧні мича скульптураӧн.