ПЕЧОРА БОК


Веж сывъя вына сусъяс, дубъяс сямӧн дзик,
Юр лэптісны лун-лун Печора бокын вылӧ
Да зумыш парма вомӧн видзӧдісны ылӧ,
Мед аддзыны, морт шудлӧн кӧні лыбӧ пик.

Сё нэмъяс дзоргисны — эз аддзыв налӧн син
Ни сійӧ гӧрасӧ, ни сійӧ долыд мусӧ.
Тшук шонді петалас, и бӧр нин сійӧ кусӧ,
Морт пукалӧ би дорын — сылӧн шог оз чин.

Но нэмъяс вежсисны и вежсис мортлӧн сям:
Код вӧліс збойӧн зэв, то сійӧ лоис рам,
А рамыс... Збоймӧдчис и лоис медся збойӧн.

И чӧвтіс сійӧ сьывъяс шогыслы аркан
И вежис аслас зумыш мулысь чужӧмбан,
И талун сійӧ ставлы шонді югӧр койӧ!