ПЕВ КУЗЯ ПИ

Важӧн олісны-вылісны мужик гозъя. Налӧн ныв-пи эз вӧв, а налы зэв ёна вӧлі колӧ. Асьныс ёна нин пӧрысьӧсь вӧлісны. Мый вӧчны? Пуксисны и думайтны кутісны. Думайтісны-думайтісны, баба мужиклы кутіс шуны:

— Вай Енлысь кутам корны, Ен оз-ӧ сет!

Найӧ пидзикок вылӧ Ен водзӧ сувтісны и кутісны кевмыны. Кевмисны-кевмисны быдса вой да и лун, а налӧн пи век оз чуж. Бара думайтны кутісны, думайтісны-думайтісны, мужик бабалы и кутіс шуны:

— Вай жӧ ми сідз вӧчам, оз-ӧ мыйкӧ артмы. Петав, вай чулансьыд гӧнтӧ и сійӧс пукты чуманӧ, и катӧд паччӧр вылад. Ачыд сэтчӧ вод и пӧлявны кут, а ме ветла песла, локта да пачтӧ ломта, мед шоныдджык лоӧ.

Баба каяс паччӧрӧ, гӧн чуман бокӧ пуктас, ачыс кымынь водас и кутас пӧльтны, а мужик песла мунӧ. Ветлас, пес ваяс, пач ломтас и бабалысь юавны кутас:

— Мыйкӧ артмӧ, оз?

А баба ӧтарӧ пӧльыштӧ да пӧльыштӧ гӧн чуманӧ, и нем оз шыась. Мужик гоз-мӧдысь юалас, а баба век ружтӧ да пӧльтӧ. Мужик скӧрмис, сьӧлыштіс да и петіс. Омӧлик кӧбыласӧ доддяліс и кайис гӧрны. Гӧрӧ и думайтӧ: «Ак, — шуас, — пиыд кӧ эм, эськӧ ме ыджыд мыр вылас пукси и куті сӧмын индавны: вот, шуа, сэті — сідз, а вот таті — тадз. А сійӧ эськӧ менам сьывны да гӧрны кутіс». Сійӧ сідз джынсӧ кымын муыдлысь гӧрис, думайтігтырйиыд, и кыськӧ друг кывны кутіс зэв ёна сьылӧм шы, а морт некӧн оз тыдав.

Мужик гӧригкості бабалӧн гӧн чуманӧ чужис пи — пев кузя, и мыйӧн чужис, пыр и кутіс сёрнитны. Баба повзис:

— Мый, — шуӧ, — тайӧ лои? Пев кузя и эм, а сёрнитӧ.

Пи гӧн чуманысь чеччис и шуны кутіс:

— Мамӧ, — шуас, — ме ветла пескыдла, а тэ пачтӧ ломты и няньтӧ пӧжав, мем сёйны колӧ!

Мам зэв рад лои:

— Вот, — шуас, — тайӧ дивӧ! Ӧні на чужис, ачыс сӧмын пев кузя и эм, а песла нин мӧдӧ, да ещӧ кутшӧм прӧсуж.

Пи гез босьтіс, ветліс, пес вайис. А мам небыд нянь пӧжаліс и вугъя чуманӧ тэчис, и кӧсйӧ катӧдны мужикыслы гӧранінас.

А пев кузя пи шуӧ:

— Вай, мамӧ, ме катӧда, кая да батьлы отсала.

Мам и шуӧ:

— Тэ вошан, он аддзы.

Сійӧ мамлысь эз кывзы, нянь вугъя чуманӧ босьтіс и мӧдӧдчис бать дінӧ. И зэв ёна сьывны кутіс. Бать и кылӧ сьылӧм, а оз аддзы — кӧні, коді?

Пев кузя пилы шор воис, и вуджны оз вермы, и кутіс горзыны:

— Батьӧ, батьӧ! Вуджӧд!

А батьлы морт оз тыдав, и дивуйтчӧ — кӧні, коді кылӧ? Гӧлӧс эм, а морт оз тыдав. Кӧні, коді — кутіс корсьны. Муніс шор дорӧ и видзӧдӧ: мӧдар шор дорас морт сулалӧ, нянь чуман кырымас босьтӧма. Сійӧс мужик моздорас босьтіс, вуджӧдіс и юалӧ:

— Тэ кодлӧн и кытчӧ мунан?

Пев кузя пи и шуӧ:

— Ме, — шуас, — чужи гӧн чуманӧ и тэныд нянь вая.

Бать зэв рад лои и нуис гӧранінӧ, и сійӧс пуксьӧдіс вӧв вылас, а сійӧ лэччис бӧж улас, кутчысис и зэв ёна кутіс сьывны. Бать гӧрӧ, а пи сьылӧ, и вӧв ветлӧ.

Кыдзкӧ матыникӧд сэті мунны кутіс поп, и кылас сьылӧм шы. Воас сэтчӧ и юавны кутас гӧрысь мужиклысь:

—Кӧні, коді тэнад татшӧм мичаасӧ сьылӧ, а ме ог аддзы?

Мужик шуӧ:

— Э... тайӧ, попӧ, менам пи татшӧмыс.

— А кӧн нӧ сійӧ? — поп шуӧ.

— А вот, бӧж увтас.

Поп бара шуӧ:

— Нолытӧ, петкӧдлы, а то он-ӧ вузав?

— Чӧв, — шуӧ мужик, — кытчӧ позьӧ мортӧс вузавны. Тайӧ менам абу вузӧс, а вежны позьӧ, став олӧмтӧ кӧ сетан.

Поп юрсӧ гыжъявны кутіс и шуӧ:

— Кыдз сійӧ позьӧ? А вай вузав, куимсё сета.

А пи гусьӧникӧн батьыслы шуӧ:

— Сет менӧ, ме бӧр локта, а тэд деньгаыс сюрас.

Мужик сетіс пиӧс, куимсё поплысь босьтіс и бара гӧрны кутіс. А поп зэв рад лои, пев кузя пиӧс зептас сюйис, мӧдӧдчис гортас и думайтӧ:

— Вот, — шуас, — мем сюрис кутшӧм дивӧ, бытса морт, а зептӧ тӧрӧ, а ещӧ кутшӧм лӧсьыда сьылӧ. Эк, баба ёна и ошкас.

Мунӧ и сідз сёрнитӧ ӧтнас, а зепсӧ оз видлы. А пев кузя пи поп зептысь гусьӧникӧн петіс и пышйис, поп эз и тӧдлы, и муніс батьыс дінӧ. А поп гортӧ воис и шуӧ бабалы:

— Вот, — шуас, — попаддя, ме мый тэд вайи, веськыд дивӧ! Пырав жӧ, — шуас, — менам зептӧ да видлы, сӧмын надзӧнджык, эн дойд.

Попаддя кырым поп зептӧ сюяс, а сэні тырыс сіт. Давай попӧс видны:

— Сэтшӧм-татшӧм, — шуас, — тэ ачыд поп ещӧ, зептад сіт новлӧдлан да ещӧ менӧ ылӧдлан.

Босьтас коколюкасӧ и давай попӧс кучкавны, кытчӧ веськалӧ, да шуавны:

— Вот тэд — «эн дойд», вот тэд — «эн дойд»!

Поп ӧдва мынӧ, и давай пышйыны. Пышъяс-пышъяс и веськӧдчас мужик дінӧ.

А пев кузя пи, поп зептысь петӧм бӧрын, бара батьыс дінӧ муні, бара пырас вӧв бӧж улас и сьывны кутас.

Мунӧ сэті суддя пара вӧлӧн и кылас, мый кодкӧ ёна сьылӧ. Видзӧдӧ, мужик гӧрӧ, и сылысь юалас:

— Коді татшӧм лӧсьыдасӧ сьылӧ?

Мужик шуӧ:

— Тайӧ менам пи, вӧв бӧж улын.

Суддя видзӧдлас, и сылы кажитчас, и шуны кутас:

— Он-ӧ вузав, куимсё сета.

Мужик бара вузалас пиӧс, деньга босьтас и бара гӧрны кутас. Гӧрас-гӧрас, и гӧрсяс. Вӧвсӧ лэдзас, верзьӧм вылӧ пуксяс и мӧдӧдчас гортӧ.

Сылы бара поп паныдасяс. Мужик бӧрдны кутас и поплы норасьны, мый сылысь писӧ, кодӧс поплы вузавліс, кутшӧмкӧ суддя нуис да и деньгасӧ тшӧтш мырддис. Поп юавны кутіс:

— Кӧні сійӧ? Вай вӧтӧдам.

Мужик шуӧ:

— Вай.

И найӧ омӧлик кӧбыла вылад пуксисны кыкӧн и кутісны вӧтчыны. Вӧтчисны-вӧтчисны, вӧлыс конъясис и уси, и оз чеччы. Найӧ кучкалісны-кучкалісны, вӧв сэтчӧ и кулі. Мужик бӧрдны кутіс и поплы шуӧ:

— Менам ӧтик вӧв и вӧлі став олӧмыс, и тэ сійӧс начкин. Ме норасьны кута гырысь йӧзлы, мыйла тэ начкин.

Поп повзис и шуны кутіс:

— Эн явит, на сё шайт, толькӧ эн норась.

Мужик босьтіс сё шайт и бергӧдчис гортас, а поп сэтчӧ коли. Кытчӧ сэсся поп муні, ме ог тӧд. А мужик воис гортӧ и босьтіс выль вӧв, ёнӧс. Сэсся выль керка пуктіс, кык судтаӧс, и тӧргуйтны кутіс. А пев кузя пиӧс суддя гортас нуис да сы сайӧ нывсӧ сетіс, и зятьыс сыысь бура кутіс овны. А поп йӧймис и ӧні йӧйталӧ. Ме аддзылі, ӧні на ставныс олӧны.