ПАРША НЫВЪЯС


Кор ичӧт вӧлі ме, бать вайӧ вӧлі пыр
То кос нянь тор, то сир и сетас, вӧлі шуӧ:
— Тэн парша нывъяссянь. Ме ветлі ылыс юӧ,
И найӧ ыстісны. Со ещӧ пелысь сыр.

И сэтшӧм нимкодь меным! Пелысь сырйыс гӧрд
И ӧзйӧ биӧн. Шуа: — Кутшӧм парша нывъяс? —
А батьӧй висьталӧ: — Юсь сьылі небыд сывъя.
Сэн кытшӧн ворсӧны пыр ӧта-мӧдныскӧд.

— Сьӧд вӧрас? — Да. И мича сьыланкыв
Пыр ливкйӧдлӧны ставныс... — А сэн кымын ныв?
— Зэв уна. Еджыд платтьӧаӧсь быдӧн найӧ.

Кор быдми ыджыда, сэк муні ме став вӧр
Да корси найӧс сэсь — эз сюрны: вӧрлӧн шӧр
Дзик тыртӧм. Но ас пилы пелысь сыр век вая!

1968