ПАНЫДАСЬӦМ


«Прива-ал!»
Колонна
Бокӧ муныштіс,
И расӧ вошины курсантъяс.
Друг
Асыввылын быттьӧ гымыштіс:
Здук-мӧд — 
И тыдовтчисны танкъяс.

Полковник,
Тайӧс водзвыв тӧдіг,
Эз сет тревога
И эз водтӧд,
А сӧмын шуис:
«Тайӧ ӧдас
Эм мичлун — вынным дінӧ
Содтӧд».

«Пехота, чолӧм! — 
Танкъяс сувтӧны.
Люк вевтъяс
Восьтӧны ён кияс. — 
Ми йитчим ӧта-мӧдкӧд
Кувтӧдзным,
Ті — папиросъясӧн,
Ми — биӧн».

Мудз быри.
Серам. Кыпыд шуткаяс.
Ме мыччи «Север» кодлысюрӧ
И акниті:
Вевт сайысь петкӧдчис
Иван Терентьев — 
Щельяюрысь.

Землякыд, ёртъяс, — 
Век земляк на.
Мый аслад абу — 
Сылӧн вичмас.
«Ме, шуӧ,
Комитӧ эг ляк на.
Значоксӧ аддзан со,
Отличник.

А век жӧ гортысь
Быри гажӧй.
Кӧть эськӧ частӧкодь
Мем гижӧны.
Ӧд сэні
Виччысьӧ нин важӧн
Зэв мелі нывка
Лена,
Визинысь.

Ми тӧдмасьлім на Сыктывкарын:
Спартакиада вылӧ
Волімӧ.
Со фото:
«Аддзысьлытӧдз арын».
А кыдзи тэнад, вокӧ,
Олӧмыд!»

Тадз миян костын
Муніс сёрни.
И шуис зон:
«Мир оз кӧ дзугсьы,
То служба вылысь
Воа кор ме,
Бӧр аслам трактор вылӧ пукся».

«Приваллы пом!» — 
Команда юрӧбтіс.
Ми сувтім.
Сёрни-серам кусі.
Стальнӧй лавина
Водзлань журӧбтіс
И регыд воши кыптысь бусын.