НЁРЫМӦ ДЯДЬӦ

Оліс-выліс ӧтик дӧвеч. Гашкӧ, эз и гӧтрасьлы. Лёк шапкаа, лёк паськӧма, дӧмас вылын дӧмас, да и то дӧмастӧм, рузя. Кынӧмыс сюмалӧ, кыськӧ колӧ нажӧтка. Няйт да лёк да, кодлы сійӧ колӧ, некод узьныыс оз лэдз, полӧны сыысь.

Заводитіс кыны лапти. Лапти кыас, базарӧ нуас, вузалас. А базарыс, ещӧ кар ли мый ли вӧлі сэтӧн, зэв ылын. Гашкӧ, и куим лун колӧ мунны подӧн. Ӧтпыр коркӧ лапти кыйис, мешӧкӧ сюйис дай базарӧ нуӧ вузавны. Горт деревняас быдӧн нин, гашкӧ, лаптиаӧсь да некодлы нин оз ков.

Мешӧкӧ сюйис, бедь босьтіс да пондіс мунны. Дерт, тӧв вӧлі, кӧдзыд. Бара лёк кышансӧ ассьыс кышаліс, лёк шапкаасис да мунӧ. А зэв вӧлі пургаа поводдяыс да кӧдзыд. Деревняяс гежӧд вӧлі, вӧлӧстьясыс, деревня костъясыс ыджыд. Пемдыны кутіс, а некытчӧ эз во. Зэв шогсьӧ, маитчӧ: «Талун кулан войнад татчӧ туй вылас».

Сэсся видзӧдӧ да сэтӧні шор, а шор бокас керка сулалӧ. Абу ёна туйсяньыс ылын.

— Час, ветла татчӧ да вӧзйысьла, кодкӧ, гашкӧ, олысь эм. Оз-ӧ лэдзны?»

Туй трӧпа, пода туй ли, мый ли кежыштӧ, гашкӧ, и вӧла туй. Кежис сэтчӧ, бедьнас стенас тарк-тарк вартіс:

— Эй, код татӧн олысь, узьны он-ӧ лэдз?

Купечлӧн вӧлӧма сэтӧні кутшӧмкӧ стрӧйба ли, мый ли. Курӧгъяс видзӧны служанкаяс, кык ныв. На дорӧ некод волывлысьыд абу да зэв радӧсь:

— Лэдзам, дедушко, лэдзам. Пыр лок, пыр.

А сійӧ зэв лымйӧсь, лымйӧн тырӧма. Пырны пондіс, найӧ петісны, корӧсьӧн сійӧс пыркӧдісны, чышкалісны, киысь бедь босьтісны, пельӧсӧ сувтӧдісны, керкаӧ пыртӧдісны, пӧрччӧдісны. Лёк пупайка шой вӧлі сылӧн. Дерт, лёк, кысь нин бурыс.

— Муса нывъясӧй, кытчӧ нӧ ме тайӧ пупайкасӧ пуктыла?

Найӧ шуӧны:

— Лавичас пукты, лавичас.

А сійӧ шуӧ:

— Лавич улас пукта, менам ӧд мешӧкын эм лапти, сійӧ нӧ кытчӧ пуктыланныд?

— А ми петкӧдам, миян курӧгъяс эмӧсь да, курӧгъяс дорӧ гидӧ пуктам.

— Мед бара оз жӧ косявлыны лаптитӧ курӧгъясыд.

— Оз, оз. Миян найӧ пакӧсьтсӧ оз вӧчны.

Найӧ босьтісны да гидад петкӧдісны, курӧгъясыд кытӧн олӧны, пельӧсӧ и пуктісны, шымыртісны да. Но и зэв радӧсь, дедӧлы самӧвар пузьӧдісны, чайӧн юктӧдӧны, кольк пуисны, колькйӧн вердісны, курӧг кольк уна. Зэв дедӧ рад лои.

— Нывъяс, нывъяс, кытчӧ нӧ ме вода?

— Пӧлатьӧ, пӧлатьӧ, а ми водам крӧватьӧ.

Дедӧ пӧлатьӧ водіс и мудзӧм бӧрад да кынмӧм бӧрад шоныдінад пыр сійӧ унмовсис, каргыны кутіс. А нывъяс сёрнитыштісны дай коркӧ вой шӧр гӧгӧрыд унмовсисны, крепыда унмовсисны.

Дедӧ садьмис и думыштіс:

— Час ме лаптитӧ лэчча да косявла.

Кыштым-каштым пасьтасис-кӧмасис, гидӧ петіс, корсис, а курӧгъясыд тӧдтӧм мортсьыд полӧны да быдӧн пельӧсӧ чукӧртчисны, сы вылӧ дзоргӧны-видзӧдӧны. Босьтіс да лаптитӧ косявліс, торъяссӧ шыблаліс гид пасьта. Бӧр зэв ӧдйӧ пырис, пӧрччысис и водіс. Асывводз воис, нывъяс коркӧ чеччисны. Дедӧ, чайтӧны, узьӧ. А дедӧ эськӧ эз узь. Кыштым-каштым мыйкӧ пач ломтісны, бара мыйкӧ сэтӧні пуыштісны, жаритыштны. Дедӧ чеччӧ:

— Пӧра ӧд мен мунны, пасьтасьны да.

Найӧ шуӧны:

— Пуксьы, ю-сёй да вӧлисти мун.

— А ті, нывъяс, петалӧ да вайӧ жӧ менсьым лаптиӧс.

Найӧ петісны, а толькӧ лаптилӧн торъясыс гидын. Пырӧны зэв шогынӧсь.

— Ок-ок-ок, дедушко, дедушко, лаптитӧ ӧд курӧгъясыд быдӧн косявлӧмаӧсь.

Сійӧ скӧрмӧдчис и пондіс шуны:

— Пись-пись вундала да, пот-пот потлала, сё стена-ӧшинь костӧдыд пета да сё шайт беда ме тіянлы вӧча. Медбур курӧгнаныд он мынӧй.

Повзисны коньӧръяс.

— Эн миянлы сё шайт бедатӧ вӧч, ӧшинь костӧдыд эн пет.

Асьнысӧ сэтшӧм мыжаӧн арталісны. Кӧзяинлы ковмас мыйкӧ висьтавны.

— Ми пӧ тэныд медбур курӧгсӧ сетам.

Сылы вайисны медбур курӧгсӧ. Сійӧ и сюйис мешӧкӧ, ачыс муніс сералігтыр: обдуриті пӧ ме тайӧясӧс.

Курӧга лоис, лапти пыдди курӧг. Мӧд лун сійӧ муніс, бара эз во деревняад. А сэн вӧлі, гашкӧ, сійӧ жӧ купечыслӧн, бара керка ли, мый ли. Сэн вӧлі нин видзӧны дзодзӧгъясӧс. Бара кежис сэтчӧ. Тарк-тарк бедьнас:

— Эй, коді татӧні олысь, узьны он-ӧ лэдзӧй?!

Сэн нывъяс жӧ вӧліны, прислуга, служанкаяс.

— Пыр, дедӧ, пыр, лэдзам. Мый нӧ ог лэдзӧй туйвыв мортӧс?

Бара сійӧс пыртӧдісны, дедӧӧс. Пӧрччысис дедӧ, лавич улӧ сюйыштіс кӧлуйсӧ, лёк валеги шойсӧ пуктіс паччӧрӧ. Курӧгсӧ меститіс дзодзӧгъяс дорӧ.

Нывъяс пач ломтісны, жаритісны дзодзӧг яй. Сэсся вердісны дедӧӧс, чайӧн юкталісны. Сійӧ «пасибӧ, аттьӧ» висьталіс.

— Татшӧм бура сёйи. Татшӧмасӧ ме некор нин эг сёйлы яя сёянсӧ. Но, кытчӧ нӧ сэсся ме, нывъяс, вода?

Найӧ шуӧны:

— Пӧлатьӧ, дедӧ, пӧлатьӧ. А ми крӧватьӧ водам.

Найӧ крӧватьын бара мыйкӧ сёрнитыштісны да сералыштісны, а мӧд сійӧ ывла вывсьыс пырӧм бӧрын каргис-узис. Мыйӧн нывъяс унмовсисны, сійӧ вой шӧр гӧгӧрын бара чеччис:

— Час, ме петала да курӧгӧс мошкорита.

Бара кӧмасис-пасьтасис, гидӧ петіс, чуш-чаш быдӧн косявліс курӧгсӧ, толькӧ гид пасьта гӧныс лэбалӧ. Бара пырис, пӧрччысис, водіс. Водіс, унмовсис ли, эз ли, асывводз воис. Нывъяс садьмисны, пач ломтісны: дедӧ пондас мунны, колӧ мӧдӧдны.

— Нывъясӧ, нывъясӧ, мен ӧд пӧра мунны сэсся. Вайӧ меным курӧгӧс.

Найӧ петісны, дедӧ сэк кості сёйис-юис, а курӧглӧн толькӧ гӧнъясыс лэбалӧны гидын. Бара зэв ёна повзисны, пырисны:

— Ок-ма, ок-ма, дедушко, курӧгтӧ ӧд дзодзӧгъясыд косявлӧмаӧсь.

Сійӧ бара скӧрмӧдчис:

— Пись-пись вундала да, пот-пот потлала, ӧшинь костӧдыд пета да сё шайт беда вӧча, медбур дзодзӧгнаныд он мынӧй.

Нывъяс повзисны, оз тӧдны, мый керны.

— Эн миянлы сё шайт бедатӧ вӧч, ӧшиньтіыд, ӧшинь костӧдыд эн пет. Ми тэныд медбур дзодзӧгтӧ сетам. Бара медбур дзодзӧгсӧ сюйисны мешӧкӧ дедӧлы. Дедӧ водзӧ мунӧ, дзурликтӧ. Мойд мойд и эм.

Бара лунтыр муніс, бара керка воис, видзӧдӧ да. Эз во деревняӧдзыс, а сійӧ тӧдӧ нин, велаліс да. Пӧвадитчис.

— Час, татчӧ кежала.

Сэтчӧ кежис, бара стенас тарк-тарк вартіс:

— Эй, коді татӧні олӧ. Лэдзӧй менӧ узьны!

Сэн бара купечлӧн вӧлі служанкаяс олӧны, межъясӧс видзӧны. Бара дедӧӧс пыркӧдісны, пӧрччысьӧдісны.

— Нывъясӧй, нывъясӧй, кытчӧ нӧ пупайкаӧс пукта?

— Лавичас пукты, лавичас.

Сійӧ бара лавичӧ пуктіс, лавич пельӧсӧ.

— Кытчӧ нӧ ме вода, нывъяс?

Нывъяс шуӧны:

— Сёй, дедушко, ю да вӧлисти вод.

Сійӧс вердісны, юкталісны и пӧлатьӧ водтӧдісны, асьныс крӧватьӧ водісны. Бара дыркодь найӧ сэтӧні мыйкӧ варовитісны, сёрнитыштісны. А мӧд, кынмӧм бӧрад, пыр узьӧ. Пӧрысьлӧн узьӧмыд уна. Бара каргис-узис, вой шӧр гӧгӧр садьмис, нывъяс унмовсьӧмаӧсь, узьӧны, чискӧны. Бара кӧмасис-пасьтасис, сюсьмис нин ӧні:

— Петала бара!

А дзодзӧгтӧ сійӧ ыж гидӧ меститліс.

Бара гидӧ петіс, дзодзӧгӧс босьтіс да чуш-чаш вӧчис лёк пӧрысь кинас, косявліс быдӧн, шыблаліс, гӧнсӧ разӧдіс и бара пырис. Водіс, узьӧ ли, олӧ ли сэн, нывъяс нинӧм эз тӧдлыны. Асывводз чеччисны да бара сылы, дедӧлы, лӧсьӧдӧны сёйны да юны, самӧвар пузьӧдӧны. Дедӧ чеччис да шуӧ:

— Нывъясӧ, нывъясӧ, мен ӧд колӧ мунны сэсся. Вайӧ жӧ менсьым дзодзӧгӧс.

Петісны нывъяс:

— Тэ сёй, а ми ваям.

Нывъяс петісны дзодзӧгла. Толькӧ гӧныс дзодзӧглӧн лэбалӧ. Бара ёна повзисны, пырисны:

— Дедӧ, дедӧ, межъясыд ӧд дзодзӧгтӧ косявлӧмаӧсь.

Сійӧ бара скӧрмӧдчис на вылӧ, пондіс стрӧжитны найӧс:

— Пись-пись вундала да пот-пот потлала, ӧшинь костӧдыд пета да сё шайт беда тіянлы вӧча, медбур межнаныд ті он мынӧй.

Найӧ повзисны:

— Эн миянлы сё шайт бедатӧ вӧч, эн ӧшинь костӧдыд пет. Ми тэныд медбур межсӧ сетам.

Сӧгласитчис. Межӧс сюйисны мешӧкӧ. Бара дядьӧ мешӧк ӧшӧдіс мышкӧ, бедь босьтіс, зэв скӧр, лӧгасьӧмӧн муніс сэтысь. Ачыс шешъялӧ пиньтӧм вомнас, шуӧ:

— Ылӧдлі ме тайӧясӧс, сюсялі.

Бара дзурлик, дзурлик, лунтыр дзурликтӧ, гашкӧ, и нарошнӧ сэні рытсӧ виччысьӧ. Бара воис кутшӧмкӧ шор дорын керка, узьны деревняӧдз нарошнӧ эз мун. Кежис туйӧд, кильчӧ вылӧ, ӧшинь улӧ воис, беддьӧн торк-торк вартіс:

— Эй, коді тані олӧ?

А бара нывъяс, служанкаяс вӧлі. Найӧ и шуӧны:

— Пыр, дядьӧ, пыр. Лэдзам узьныд, лэдзам. Кысь нӧ туйвыв мортӧс ог лэдзӧ? Пыр, шонтысь, узь.

Пырис. Бара дедӧӧс пӧрччысьӧдісны, туплялісны кӧлуйсӧ, лавичӧ пуктісны, а межсӧ мешӧкнас ыж гидӧ сюйисны. Вердісны-юкталісны, гӧститӧдісны. Зэв аттьӧаліс найӧс:

— Бура сёйи, бура вердінныд. Ме татшӧмасӧ эг нин сёйлывлы. Но и бур. Кытчӧ нӧ менӧ водтӧданныд, нывъясӧй?

— Дедушко, пӧлатьӧ вод, а ми водам крӧватьӧ.

Дедушко бара сэсся каргыны-узьны кутіс мудзӧм бӧрад, кынмӧм бӧрад. А нывъяс дыр на шӧпкӧдчисны сэтӧні, шушкӧдчисны и коркӧ сёрнас, вой шӧр гӧгӧр, унмовсисны и узьӧны-чискӧны. Нёрымӧ дядьӧ бара чеччис:

— Час, ме петала меж дорӧ ыж гидӧ.

Ыж гидӧ петіс, найӧ тӧдтӧм мортсьыд повзисны да ставныс пельӧсӧ чукӧртчисны. А сійӧ кыскис мешӧксьыд межтӧ, бара косявліс лёк пӧрысь кинас, чорыд кинас и гидӧ шыблаліс, вот и мешӧк тыртӧм коли бара. Пырис кынки-канки, пӧрччысис, бӧр пӧлатьӧ. Унмовсьліс ли, эз ли. Асывводз воис, нывъяс бара чеччӧны. Дедушкотӧ колӧ мӧдӧдны. Найӧ пуисны ыж яй, ыж видзысьясыд. Жаритісны да дедӧс зэв бура вердісны-юкталісны чайӧн, вердісны жаритӧм яйӧн.

Сійӧ шуӧ:

— Нывъясӧ, нывъясӧ, мен ӧд колӧ мунны. Вайӧ жӧ менсьым межӧс мешӧкысь.

Нывъяс петісны, мешӧкын нинӧм абу, валяйтчӧны кучикторъясыс джоджас. Но ыжъяс повзьӧмаӧсь, быдӧн чукӧртчӧмаӧсь пельӧсӧ, синъяснысӧ югйӧдлӧны. Повзисны нывъяс, пырисны котӧрӧн:

— Дедушко, дедушко, ыжъясыд тэнсьыд косявлӧмаӧсь межтӧ.

Бара дедушко скӧрмис:

— Ме пись-пись шӧрала да пот-пот потлала, ӧшинь костӧдныс петала да сё шайт беда ме тіянлы вӧча, медбур ӧшнад он мынӧ.

— Эн миянлы бедатӧ вӧч, сё шайтӧ, ми тэныд медбур ӧштӧ сетам.

Вот сылы медбур ӧш нин сетісны, а дедӧ сэсся зэв нин рад. Муніс-петіс, нывъяс бӧрдӧны:

— Мый висьталан кӧзяиныдлы? Миян ӧти ӧш оз понды тырмыны.

А дед мунӧ-клёнчитӧ. Муніс, муніс, ӧшкӧс нуӧдӧ. Сермӧд вӧчыштіс кыськӧ, гашкӧ, аслас гач вӧньсьыс. Сермӧдаліс, туй кузя мунӧ. Дӧзмис, ылын карыд вӧлӧма. Туйыд лёк. А кодлӧнкӧ, буракӧ, кутшӧмкӧ дядьлӧн доддьыс жугалӧма, заветкаыс орӧма, и пу додь, турун кыскалан пу додь туй бокас шыбитӧма. Дедӧ ӧшкӧс сувтӧдіс, видлаліс додьсӧ: позьӧ лӧсьӧдны. Кежаліс туй бокӧ да понӧль ли, бадь ли керыштіс, песовтіс и ӧшкӧс сэтчӧ доддяліс. Доддьӧ пуксис да пондіс мунны, ачыс пондіс сьывны, зэв рад. Босьтіс киас кузь ньӧр, ӧшлы кучкыштӧ, ачыс сьылӧ:

Лапти не лапти,

Куры не куры,

Лебеди не лебеди,

Баран не баран.

Бычӧ не бычӧ,

Пруч, бычӧ, домой.

А ӧш лютік-летік, лютік-летік гӧнитыштас и оз ӧдйӧтӧ вермы.

Локтӧ кӧч, петӧма вӧрысь, и шуӧ:

— Нёрымӧ дядьӧ, вай менӧ босьт доддяд, зэв тай тэ мичаа сьылан. Босьт менӧ тшӧтш, ме кывзышта тэнсьыд.

— Ог босьт, менам ӧд доддьӧй зэв омӧль, заветкасӧ орӧдан.

— Ой, менам ӧд зэв кокньыд тушаӧй, менам ӧд пушистӧй гӧнӧй, толькӧ кучикӧй! Пуксьӧд!

— Но, пуксьы инӧ.

— Кытчӧ нӧ тэ мунан?

— Ме базарӧ муна, ӧшсӧ тайӧ кӧсъя вузавны.

— Ой, ме базарсӧ эг на аддзывлы, вот менӧ и нуӧдлы базарӧдзыс. Вот сэсся и мӧдӧдчисны.

— Ноко, сьылышт, ме кывзышта.

— Но, сьылышта, кывзан кӧ.

Дед бара пондіс сьывны:

Лапти не лапти,

Куры не куры,

Лебеди не лебеди,

Баран не баран,

Бычӧ не бычӧ,

Пруч пӧ, бычӧ, домой.

Ӧш бара лютік-летік гӧнитыштас. Руч локтӧ дай шуӧ:

— Нёрымӧ дядьӧ, зэв тай мичаа сьылан, вай тшӧтш менӧ босьт доддяд. Кытчӧ нӧ тэ мунан?

— Ме базарӧ ӧш вузавны муна.

— А ме базарсӧ эг на аддзыв, вай нуӧдлы менӧ.

— Но, коли эн аддзыв, пуксьы, ветлам.

Руч пуксис и шуӧ:

— Нёрымӧ дядьӧ, зэв тай вӧлі мичаа сьылан, сьыв, ме кывзышта.

— Но, кывзан кӧ, сьыла. — И пондіс Нёрымӧ дядь сьывны бара:

Лапти не лапти,

Куры не куры,

Лебеди не лебеди,

Баран не баран,

Бычӧ не бычӧ,

Пруч пӧ, бычӧ, домой.

Бара ньӧрйӧн кучкис. Ӧш лютік-летік, лютік-летік гӧнитыштіс, кӧин паныдасьӧ, бара шуӧ:

— Нёрымӧ дядьӧ, кытчӧ мунан? Босьт менӧ тшӧтш доддяд.

— Менам доддьыс тыр нин, ог нин тэнӧ пуксьӧд. Менам заветкаӧй омӧль да орас.

— Ме кӧть кокъясӧс ӧшӧда, тӧкӧтьӧ пуксьышта доддяд. Абу ӧд ме сьӧкыд, менам ӧд толькӧ бӧжӧй пушистӧй, ыджыд.

— Но инӧ, пуксьы.

— Ме базартӧ эг на аддзыв да нуӧд тшӧтш менӧ сэтчӧ.

— Ветлам, коли эн аддзыв, дак видзӧдлы.

Пуксис кӧин. Пондісны мунны.

— Нёрымӧ дядьӧ, зэв тай тэ вӧлі мичаа сьылан, вай сьылышт, ме кывза.

— Но инӧ, сьыла, кывзан кӧ, — шуӧ, и бара заводитіс:

Лапти не лапти,

Куры не куры,

Лебедь не лебеди,

Баран не баран,

Гуси не гуси,

Бычӧ не бычӧ,

Пруч, бычӧ, домой.

Бара кучкыштіс. Ӧш лютік-летік, лютік-летік. Ош паныдасис туй вылас, туйсӧ вомӧн вуджӧ и шуис, шыасис:

— Нёрымӧ дядьӧ, кытчӧ мунан?

— Базарӧ ме муна, базарӧ. Ӧшкӧс кӧсъя вузавны.

Ош шуӧ:

— Менӧ тшӧтш босьт доддяд, ме базарад эг на волыв, ог тӧд, тшӧтш видзӧдла.

— Тэ зэв сьӧкыд да ог, менам доддьыс весиг лямалас, омӧль доддьӧй, заветкаыс орас, некодлы вӧчныыс.

— Артельӧн вӧчам, босьт.

— Но инӧ, пуксьы.

Мыйӧн ошкыд валитчис, заветкаыд и ори, лямалі доддьыс. Но мый кутан керны, чер ни пурт абу.

— Коді ветланныд заветкала, вӧрӧ кежаланныд? Первой ӧчередь кӧчлы!

Кӧч вӧрӧ пырис, гӧняйтліс да гӧняйтліс, а мый колӧ — нинӧм оз тӧд. Кутшӧмкӧ кос ростор кватитіс да вайис. А найӧ виччысьӧны сэтӧні. Ӧш сулалӧ. Кос ростор сетіс, а дедӧ скӧрмис:

— Ой тэ, йӧй кӧч и эм тэ, кӧсӧй. Мыйла тайӧс вайин? Таысь нинӧм оз артмы. Ручлы ӧні ӧчередь. Руч, ветлы, абу-ӧ тэ сюсьджык, мыйкӧ бурджыкӧс вай.

Найӧ оз тӧдны, кутшӧм сійӧ и заветкаыс. Муніс руч, гӧняйтліс, гӧняйтліс вӧрын да кутшӧмкӧ ростор, понӧль вайис. Пиняс босьтӧма, локтӧ, кыскӧ.

— Тайӧ ӧд оз шогмы. Мыйла нӧ тайӧс вайин? Колі уль ньӧр кыськӧ вайны, кӧть понӧль ли, мый ли.

Кӧинлы ӧчередь ветлыны. Муніс. Бара ветліс-ветліс, рысйис-рысйис вӧрын, нинӧм эз аддзы да сідз жӧ кос понӧль кыськӧ кватитіс да кыскӧ. А дедӧ нин скӧрмис на вылӧ.

— Орӧдныд, додьтӧ жугӧдны верминныд, а заветка пу вайны некод он вермӧй. Видзлӧй ӧшсӧ, ме ветла ачым.

А ош шуӧ:

— Ме видза, видза, мед оз мун.

Но, дедӧ ачыс вӧрӧ пырис, пондіс вӧрын келавны лымйӧд, дыркодь лои, нинӧм эз сюр. Ӧтикӧс тракъяс, мӧдӧс тракъяс, но сэсся эськӧ заветка пуыд и сюри, а сэк кості пышъясны кӧч да руч, а ошкыд ӧштӧ косявлас, куляс. Яйсӧ сёяс, кытчӧкӧ нуас, гуалас, гашкӧ, кытчӧкӧ лымйӧ, кучик пытшкас сюялас лым, мыйӧнкӧ сэн вурас. Кокас майӧгъяс сюялас, бедьяс, пу дорӧ сувтӧдас ӧшкӧс, а ачыс пышъяс вӧрӧ.

Дедӧ локтӧ, сьылӧ быдӧн. Видзӧдӧ — зэв рад, ӧшкыс сулалӧ ӧтнас, зэв спокойнӧя, седокъяс абуӧсь.

— Но, ӧні ӧтнам лоа.

Локтіс, сьылӧ, заветка песовтіс, ӧшкӧс кӧсйӧ доддявны. Босьтіс, кутчысис поводӧ, ӧш клупкылӧ пӧри, куш кучикыс бедь йылын. Шогӧ вӧйис. Базарӧ нуны нинӧм эз и ло. Куш кучиксӧ босьтіс, мешӧкӧ сюйис, тапыльтіс дай муніс базарӧ. Дерт, сэтӧні кодлыкӧ вузаліс мыйкӧ донысь. Ог тӧд, донысь-ӧ вузаліс.