НУЖДА

Оліс-выліс крестьянин. Сылӧн вӧлі кык пи. Юксисны да ӧтикыс овмӧдчис бура, озырмис. Мӧдыслӧн керка тыр челядь, муртса кыссьӧны.

Ӧтчыд озыр вокыд именинник кузяыс бал вӧчас. Коралас сійӧ став рӧдвужсӧ, озыръясӧс, а гӧль воктӧ оз и кор.

Пуксялісны найӧ пызан сайӧ, юӧны да сёйӧны. Озыр воклӧн ваялӧма быд сикас угӧщенньӧяс: мармелад и шоколад, ӧгурчи и ӧгманчи, пелепетушки и лапша, колькъя рысь и нӧкъя рок, вый сука рач и еджыд блин.

Гӧль вок и шуӧ гӧтырыслы: петала пӧ ме тшӧтш бал вылас, ёна пӧ окота.

Гӧтыр оз лэдз, шуӧ: эн пӧ мун кортӧгыд. Непрошеннӧй гӧсть пӧ хуже татарина. Петала пӧ сё равно. Петіс. Мунӧ озыр вок ӧшинь улӧдыд. Озыр вокыд аддзис дай шуӧ: юр уськӧдысьыд пӧ воӧ.

Гӧль вок ӧдзӧсӧд кутіс пырны, а озырыд сылы паныд уськӧдчис. Эн пӧ лок. Бӧрти пӧ волы, рытнас. Горшӧй пӧ тай косьмӧ да юыштны кӧсйи, шуӧ гӧль вокыд. Керкаводзас пӧ ваыс, сэсь ю.

Посводзас сэні сулалӧ ва пельса, кӧш эм и. Юис сэсь гӧль вокыд дай коддзис. Кильчӧ вывтіыд петны кутіс дай горӧдіс сьывны. А озыр вокыд видчӧ бӧрсяньыс:

— Лёк мортыд юрӧс янӧдны кӧсйӧ.

Друг гӧль мортлы кывсис: бӧрсяньыс кодкӧ тшӧтш сьылӧ. Видзӧдліс: зэв лёк паськӧма морт локтӧ. Код пӧ тэ сэтшӧмыс? Ме пӧ тэнад Нуждаыд. Но, коли пӧ тэ менам Нужда, пыран пӧ ме ордӧ.

Пырисны найӧ керкаӧ. Гӧль морт и шуӧ: кӧзяйка пӧ, кыкӧн пӧ ми локтім да, вай пӧ вердышт миянӧс мыйӧнкӧ. Кӧзяйка вайис шыд да рок да, мый вӧлі, ставсӧ вайис. Но сэсся, кӧзяйка, вай пӧ миянлы вольсышт мыйкӧ. Ми пӧ сэсся водам. Кӧзяйка вольсаліс, мый сылӧн вӧлі: перинатор да, кӧлуйяс юр улӧ пуктышталіс да. Кӧзяин водіс Нуждакӧд, а кӧзяйка — пӧлать сэрӧгас челядьыскӧд.

Асывводз кӧзяйка чеччис, пач ломтіс, шыд-рок пуис. Нужда да кӧзяин чеччисны, кӧмасисны-керисны. Кӧзяиныд и шуӧ: вердышт пӧ вай, кӧзяйка, миянӧс. Сёйыштам пӧ да ветлам Нуждакӧд уджавны.

Кӧзяйка вердіс-юкталіс. Нужда да мужик черъяс босьтісны, кӧрт зыръяс босьтісны да мунісны уджавны — кӧбрег гу кодйыны.

Воисны кладбище дорӧ, кутісны кодйысьны. Первой ӧтикыс кодъяс, сэсся мӧдыс.

Джуджыд нин лоис гуыд, морт джуджда нин. Сэсся пырис кодйыны Нужда. Копыртчис да муртса тыдалӧ.

Кӧзяиныд и шуӧ: но пӧ, Нужда, мольыд абу нин?

А сійӧ гу пытшкад мышкырасьӧ да гу пыдӧссӧ мольӧдӧ. Мольыд нин пӧ лоис, мольыд, пыр пӧ кая.

Бура пӧ мольӧд, бура.

Нужда копыртчис мольӧднытӧ, а кӧзяин босьтіс кӧрт зыр дай кутіс валитны сы вылӧ небыд мусӧ. Дзикӧдз тыртіс Нуждаӧс. Гу вывсӧ шыльӧдіс-мольӧдіс, пу лӧп вылысас тэчаліс, чер-зыр босьталіс и лэччис гортас. Но, шуӧ кӧзяйкалы, вай пӧ вердышт. Ме пӧ гуалі Нуждатӧ.

Кӧзяйка кыскаліс пачысь шыд-рок дай вердіс.

Но, меным висьтавны регыд-а, воис рыт, и водалісны узьны. Аскинас кӧзяин чеччис, шонді вылын нин, кайис паччӧр вылас дай куритчӧ. А налӧн вӧлі курӧг. Сійӧ колькъялӧма дай зэв ёна котсьӧ. Кӧзяин лэччис, видзӧдӧ: колькйыс абу прӧстӧй, а зӧлӧтӧй;

Кӧзяйкасӧ кутіс чуксавны:

— Чеччы, — шуӧ, — кӧзяйка, курӧгыд вайӧма мыйкӧ зэв мичаӧс.

Кӧзяйка чеччис. Видлалӧ кольктӧ — збыль зӧлӧтӧй и эм. Налы зэв любӧ. Босьтіс кӧзяйкаыд кольктӧ дай нуис лавкаӧ, пуктіс лавочник водзӧ. А лавочниклӧн синмыс вералӧ. Уна-ӧ коран та вылӧ? Уна-ӧ пӧ сетан? Сто рублей тырмас? Тырмас пӧ, шуӧ гӧль мортыд. Сё шайтыд сылы зэв нин ыджыд деньга.

Кӧзяин босьтас сё шайттӧ, ньӧбас мый колӧ сёян-юан и лэччас гортӧ. Воис налы ыджыд лун праздник.

Висьтавны регыд, а аскинас курӧгыд бара зӧлӧтӧй кольк ваяс. И аскомысьнас сідз жӧ. Вузаласны найӧ мӧд кольктӧ двести рублейысь, а коймӧдтӧ — тристаысь. И лунтыр гозъя босьтасисны: шыдӧстӧ мешӧкӧн, сакартӧ мешӧкӧн, пызьтӧ доддьӧн, ситеч-матерьетӧ понаясӧн. Босьтасисны да босьтасисны, лэччӧдлісны да лэччӧдлісны вӧлӧн и, ас выланыс и. Нянь и, сакар и, шыдӧс и — быдторйыс налӧн лои дӧвӧль.

Озыр вокыд и кутіс думайтны: «Мый тайӧ лои менам воккӧд, ставсӧ кулльӧн да мешӧкӧн лэччӧдлӧ. Кысь сылы деньгаыс?» Ёна завидь сылы лои.

Гӧль вок и шуӧ кӧзяйкаыслы:

— Но, — шуӧ, — кӧзяйка, овлім ми тэкӧд гӧля, нужда ради нэмӧн бал эг вӧчлӧй, нимлун эг ыдждӧдлӧ, ӧні, — шуӧ, — миян эм быдтор. Вай, — шуӧ, — лӧсьӧдчы, сёян-юан пӧжав, самӧкур гудрав, сур пу, нимлун вӧчам тэа-меа.

Кӧзяйка куим кӧрчагапом пуис, вежалун чӧж самӧкур вийӧдіс, сур пуис, нянь пӧжаліс.

Сур да нянь эштіс, вина — ыджыд бӧчкатыр, и сочинитісны найӧ нимлун кузя пир на весь мир. Коралісны став рӧдвужсӧ, тшӧтш и озыр воксӧ.

Озыр воклы яндзим. Юис румка-мӧд, сэсся оз ю, оз кӧсйы коддзыны. «Час жӧ, тӧдмала, кыдзи-мый менам вокыд озырмис».

А вок сійӧ радлун кузяыд ӧтикӧд румка да мӧдкӧд стӧкан. Сулик коддзис.

Озыр вок и кутіс юасьны:

— Аттӧ, — шуӧ, — вокӧ, кыдз бара тэ озырмин-а?

Код юрнад вокыд ставсӧ и висьталіс. Вот пӧ, вокӧ,

Нуждаыд пӧ ме дорӧ кӧвъясис, кор пӧ ме тэ дорӧ пир вылад волі. Помнитан пӧ, вӧтлін менӧ ещӧ. А ме пӧ босьті дай гуалі Нуждатӧ. Сідз и мыні сыысь.

Озыр вок и думайтны кутіс: «Час, ме кая да перъя сэсь Нуждасӧ. Скӧр йывсьыд сійӧ бӧр нуждаӧ вӧйтас менсьым воктӧ».

Ладнӧ. Озыр вок гусьӧник пышъяс пир вывсьыд, босьтас кӧрт зыр, каяс кладбище вылӧ и кутас кодйыны. Кодъяс, кодъяс, видзӧдӧ — копошитчӧ кодкӧ гу пыдӧсас.

— Нужда, — шуас, — ловъя?

Нужда кыпӧдчис сэки дай шуӧ: ӧдва пӧ ловъя, чуть пӧ эг пӧд, вай пӧ отсав петнысӧ.

Озыр вок сетіс кисӧ, лэптіс дай шуӧ:

— Со ӧд, — шуӧ, — лёк мортыд мый тэнӧ вӧчис. Не кӧ ме, татчӧ и лоис эськӧ сісьмыны. Лэччы, — шуӧ, — сы дорӧ, талун как раз пир сылӧн.

— Пасибӧ, — шуӧ, — тэныд, бур морт, перйӧмыд вылӧ. А вокыд дорӧ ме нинӧмысь ог лэччы.

Мый сыкӧд вӧчан? «Час ме ылӧдла тайӧс, — думайтӧ озыр вок. — Лэччӧда пир вылад да сэтчӧ и коля».

Мӧдӧдчис вокыс пир вылӧ. А сэні пызан вывтыр быд пӧлӧс сёяныд: пелепетушки и лапша, ӧгурчи и ӧгманчи, колькъя рысь и нӧкъя рок, вый сука рач и пӧсь блин.

Пырис сэтчӧ озыр вок, а Нужда кольччис кильчӧ пос помад. Оз лысьт пырныд, шеда пӧ да бара гуалас.

Озыр вок оліс-оліс сэн шогпырысь дай мӧдӧдчис. А Нужда тут как тут — кӧвъясис, братӧ, мынтӧм вылӧ. Кӧвъясис, дай гӧльмыны кутіс озыр вокыд: ӧти лунӧ ошъяс скӧтсӧ виисны, мӧд лунӧ вӧръяс амбарсӧ петкӧдісны, коркӧ сэсся и керкаыс сотчис.

Со ӧд кыдз Нуждаыд вермас бергӧдчыны.