МЫЙ ШУЛІН ТЭ...


Мый шулін тэ, ог вермы ӧні казьтывны,
А чайтсис сэк, мый тэын сӧмын бур.
А чайтсис сэк, мый помтӧм муыс пасьтала
Тэ дорысь некод бурджыкыс оз сюр.

Сэк чайтлі ме, мый зарни кывъяс шуалін,
Да эски: наын мелілуныс тыр.
Но шуднымӧс тэ ловъявывсьыс гуалін
И кыв ни джын он шулы вель нин дыр.

А бордъясьліс сэк лолӧй тэнад кывъясысь,
И чайтлі — наын менам олӧм шӧр.
А йӧймӧм сьӧлӧм-лэбач тэнад тывъясысь
Эз мынтӧдчыны кӧсйы некор бӧр.

А эски сэк, мый нэм ог вунӧд муслунтӧ,
И радейтчӧмлӧн дзоридз лэдзис вуж.
Сэк чайтлі — биыс кывъясыдлӧн куслытӧм,
А ӧні найӧс казьтывны ог куж.