МЫЙ НӦ ВӦЧНЫ?


Асывводзын, кодыр шӧпкӧдчӧ веж льӧм,
Кодыр пасьталӧ шӧвк енэж алӧй рӧм,
Ӧшинь увті мунӧ удж вылӧ том ныв,
Сӧмын менсьым сьӧлӧм тіпкӧмӧс оз кыв.
Косьма сы вӧсна, а сійӧ...
Сьӧлӧм тіпкӧмӧс оз кыв.

Шуа сылы: — Мича ныв, кӧн тэнад нюм?
Кӧсъя тэныд висьтавны ме ӧти дум.
Ныв жӧ серӧктас — и водзӧ: тэ пӧ, зон,
Сӧр да аслыд, эз кӧ мудзны кыв да вом,
Этша кӧть, но гӧгӧрвоа...
Эн пӧ ылӧдчы тэ, зон!

Нывкӧд паныдасям клубын — сетас ки,
Весиг ӧтлаын сэк танец йӧктам ми.
Сӧмын тайӧ меным вайӧ ыджыд шог:
Нюмыс — шонді, ачыс — мелі василёк,
А вот гортас сійӧ некор...
Мекӧд ӧтлаын оз лок.

Мый нӧ вӧчны, мый нӧ вӧчны, дона друг?
Менам радейтчӧмын артмӧ веськыд дзуг:
Нывлы гажа, мен жӧ ывлаыс век саль,
И ме ола, быттьӧ кельдны мӧдӧм чаль, — 
Сотчӧ сьӧлӧм, кӧть и аслым...
Весиг ывлаыс век саль.

Асывводзын, кодыр шӧпкӧдчӧ веж льӧм,
Кодыр пасьталӧ шӧвк енэж алӧй рӧм,
Ӧшинь увті мунӧ удж вылӧ том ныв,
Сӧмын менсьым сьӧлӧм тіпкӧмӧс оз кыв.
Косьма сы вӧсна, а сійӧ...
Сьӧлӧм тіпкӧмӧс оз кыв.

1959 во.