МОЙДӦМ


Тӧвся войын ӧшинь сайын
Кӧдзыд вой тӧв жургӧ.
Мыйкӧ сьылӧ, мыйкӧ горзӧ,
Код вылӧ кӧ мургӧ.

Шоныд паччӧр вылын челядь
Кӧдзыдысь оз повны.
Пӧрысь пӧчкӧд, муса пӧчкӧд,
Лӧсьыд налы овны.

Пӧчыс чуня кепысь кыӧ,
Ассьыс уджсӧ вӧчӧ.
Эз на некор прӧста пукав
Паччӧр вылын пӧчӧ.

Челядь видзӧдӧны, кыдзи
Пӧчлӧн уджыс содӧ.
Ӧти шуӧ: «Кузь на войыс.
Огӧ на ми водӧ».

Мӧдыс шуӧ: «Кепысь кыан,
Муса бабӧй, пукты.
Сэсся шойччигмозыд мойдышт,
Уджавнытӧ дугды».

«Мойдышт, мойдышт, муса бабӧй! —
Коймӧд-нёльӧд горзӧ. —
Зіля кывзыны ми кутам
Тэнсьыд мойданторсӧ».

Пуктіс пӧчӧ кепысь кыан.
Мый нӧ накӧд керны?
Челядь виччысьӧны мойдӧм,
Ку пытшкӧ оз тӧрны.

«Мойда, мойда, — пӧчӧ шуӧ: —
Пукалӧй да кывзӧй:
Ичӧт Сашӧ, ичӧт Машӧ,
Ланьтӧй, энӧ чивзӧй!»

Паччӧр вылын челядь ланьтіс.
Пӧчлӧн гӧлӧс кылӧ.
Мойдӧ сійӧ, кыдзи вӧрын
Ручыс олӧ-вылӧ.

Кыдзи ошкӧд мужик-мортыс
Ӧтув сёркни кӧдзис.
Кыдзи кӧнкӧ зарни чери
Ыджыд дивӧ вӧчис...

Пӧчлӧн уна мойданкывйыс.
Помыс налӧн ылын.
Лӧсьыд челядьыслы овны
Шоныд паччӧр вылын.

Ӧшинь сайын кӧдзыд вой тӧв
Ёнджыка на жургӧ.
Пырны керкаӧ оз вермы,
Сы вӧсна и мургӧ.