МЕ ТӦДЛІ САЛДАТӦСМе тӧдлі салдатӧс, — мен Изьваысь шусис, — Эз вӧв сійӧ паськыд ни ён — Дзик ме кодь жӧ косньыд да еджыдик юрси, Дзик ме кодь жӧ прӧстӧй том зон. Но бойын, кор тіраліс муыс и сынӧд, Кор ньыліс став ловъясӧ би, Дзик некодыр полӧм эз петкӧдчыв сылӧн, Эз тірав гранатаа ки. Ме помнита, танкъясысь лайкъяліс муыс И киссис дон свинеча шер. Но сійӧ сэк степ шӧрӧ сувтіс да шуис: «Фашистскӧй оз мун таті зверь!» Оз сюрны мен кывъяс, мед висьтавны ставсӧ, Кыдз тышкасис коми салдат. Пӧв кызь сійӧ му улӧ тырліс, но враглысь Эз лэдз мунны ни ӧти танк. Кыдз магмаӧдз вужъясьӧм, сулаліс сійӧ, Кор лыйсьӧмӧн гымаліс вой. И коставтӧм сылӧн гранатаяс биысь Кызь танк ассьыс колис пеж шой. Ме тӧдлі салдатӧс, — мен Изьваысь шусис, — Эз вӧв сійӧ паськыд ни ён — Дзик ме кодь жӧ косньыд да еджыдик юрси, Но сылы ог аддзы ме дон! 1957 во.
