МЕДСЯ ЛЁК ВӦРӦГ

Ичӧт сиктад и школаыд ичӧт. Ӧти вежӧсын нёль класс велӧдчӧ. Сёр вылын ӧшалӧ ыджыд карта, сійӧ юкӧ классӧ кык пельӧ. Челядь радейтӧны ворсны карта кузя. Ӧти аддзас кутшӧмкӧ ним да шуӧ сійӧс, а мукӧдыс корсьӧны. Коді аддзас медводз, сійӧ сетӧ выльӧс. Карта саяс пемыд, сэні сулалӧны книга тыра шкапъяс. Тайӧ — библиотека.

Василиса Николаевна висьталӧ нёльӧд класса велӧдчысьяслы монголо-татаралӧн уськӧдчӧм йылысь.

Евлог дзоргӧ карта вылӧ, а сэні Китайладорсянь вывлань кайӧ ыджыд гӧрд тӧрӧкан. Сійӧ легӧдӧ кузь усъяссӧ, а бӧрас кыскӧ ыджыд кольк, кӧні пытшкас, тайӧ Евлог бура тӧдӧ, тырыс посньыдик еджыд тӧрӧканпи. Кыдзи сӧмын кокыс вермӧ кутчысьны шыльыд бумагаас?.. Оз ӧд вильды ни, усь ни!

Евлог оз нин кыв Василиса Николаевнаӧс. Сійӧ сюся кыйӧдӧ тӧрӧкан бӧрся, коді усъяссӧ водзӧ легӧдігтырйи Монголиясянь вӧрзьӧдчис рытыввылӧ... Тайӧ абу нин тӧрӧкан, а ачыс Чингизхан. Усъясыс пӧрины чукля сабляясӧ. А бӧрсяньыс оз нин тӧрӧканпиян тыра кольк кыссьы, а векни синма уна лыда верзьӧма воинъяс. Тӧрӧканӧс эз сувтӧдны ни Байкал, ни Сибирса гырысь юяс: Об, Енисей, Лена. Из водзын сійӧ сувтіс, дерт. Кӧнкӧ, мӧвпаліс, вуджны веськыда али кытшовтны. Сулалыштіс, сэсся мӧдӧдчис лунвылӧ, шаркӧдіс Казахстанса степъясті да лунвывсянь кутіс матыстчыны Москвалань. Тайӧс нин Евлог эз вермы терпитны, дась чеччыны да швачнитны тӧрӧкансӧ, мед оз вермы босьтны сӧветскӧй челядьлысь му вылас медся муса карсӧ. Но Евлогӧс торкис Василиса Николаевна:

— Евлог, ноко висьтав, кодъяс вӧліны Киевскӧй Русьлӧн медся лёк врагъясыс?

— Гырысь гӧрд тӧрӧканъяс! — гораа, ас тӧдлытӧгыс вочавидзис Евлог, и вомыс весиг паськаліс чуймӧмысла аслас.