ЛЭБАЛЫСЬ УР

— Опонь, эн шумит, лок ӧдйӧджык татчӧ.

Афанасийлы мӧдысь тшӧктыны эз ковмы, здукӧн котӧртіс вокыс дорӧ.

— Мый нӧ аддзин?

— Видзӧд коз вылас, коді тай неуна нёровтчӧма миянлань.

— Нинӧм ог аддзы.

— Видзӧд бурджыка, дзик йылас со сьӧд ёкмыль тыдалӧ. Аддзан?

— Ур.

— Ур, сӧмын аслыссяма.

— Ылӧдлан. Чайтан, поснияслы быдтор позьӧ сӧрны? Миян учитель став звер-пӧткасӧ тӧдӧ, а мӧд пӧлӧс ур йылысь некор на эз висьтавлы. Ой, вӧрӧшитчӧ, чеччыштны кӧсйӧ.

Пу йылын пукалысь звер быттьӧ кыліс кык воклысь сёрнисӧ, торйӧдчис местасьыс, паськӧдіс бордъяссӧ и лэбзис орччӧн сулалысь пу вылӧ. Афанасий сулаліс да видзӧдіс тайӧ бордъя звер вылас. Ачыс пыр на эз эскы вокыслы. Кыдзи нӧ ур вермас лэбавны, кор сылӧн некутшӧм борд абу, эз-ӧ нин пушкыра бӧжсьыс вӧч тайӧ дивӧ-бордсӧ?

— Збыль тай, бордъяса сійӧ. Лэбавны кужӧ.

— Ме тай висьталі. Паляур тайӧ. Аслыссяма вӧрса олысь. Кокъяс костас сылӧн эм кучик. Кор кӧсйӧ пышйыны, паськӧдас сійӧс и артмӧ борд. Сійӧ вермӧ лэбзьыны ӧти пусянь мӧдӧ вель ылӧдз.

Паляур эз дыр манитчы пу вылын, паськӧдіс бордсӧ, бара лэбзис мӧд пуӧ, коді сулаліс зэв ылын.

Афанасий ӧдва вӧтчис вокыс бӧрся, коді сыысь вӧлі ёна пелькджык и дас арӧсӧн ыджыдджык.

Кык вок дыр котралісны звер нисьӧ пӧтка бӧрся. Медбӧрын, дзикӧдз воштісны сійӧс.

Афанасий ёна на дӧзмӧдчис вокыслы, юасис тайӧ аслыссяма звер йывсьыс.

— Ме и ачым зэв этша тӧда сы йылысь, — вочавидзис вокыс. — Вот велӧдчан да дядя Мишаыд моз лоан охотоведӧн, и сэки тӧдмалан паляур йылысь унатор.

Век жӧ Афанасийлы вокыс мыйсюрӧ висьталіс. Паляур, вӧлӧмкӧ, миян вӧръясын паныдасьлӧ частӧ. Сійӧ медсясӧ олӧ войын, луннас радейтӧ тулан моз шойччыны пу горсъясын. Сёйӧ кыдз пу гаръяс, вӧрса дзоридзьяслысь кӧйдысъяссӧ, пожӧм кольяс.

Сиктӧ лэччигӧн Афанасий дыр на думайтіс лэбалысь ур йылысь. Аски школаын висьталас аслас другъяслы. Кодъяскӧ, колӧкӧ, оз и кутны эскыны, мый талун аддзыліс сійӧ вӧрысь.