КӦДЗЫД ПӦЛЬ ДА ВАРОВ ЁЛЬ
Со и тӧв шӧр воис. Важӧн кодь нин Кӧдзыд пӧль дорис кыз йиӧн юяс да тыяс, шебраліс еджыд эшкынӧн пармасӧ, муяс да видзьяс. И тулысӧдз унмовсис вӧр-ваыс. Вугралӧны кыз йи улын черияс. Узьӧны пармаын козъяс да пожӧмъяс. Водісны водзвыв лӧсьӧдӧм гуясӧ ошъяс. Сӧмын тэрыб уръяс визьлалӧны ӧти пусянь мӧдӧ да китшкӧны кольяс. Сизьяс колскӧны нырнаныс косьмыны пондӧм пуяс. Кӧчьяс да йӧраяс пӧткӧдчигмоз йирӧны пипуяслысь кырсьсӧ. Ловъя ловъяслы кӧдзыдыс оз сет ланьтӧдчыны. Сӧмын шоныд гӧна паськӧмыс видзӧ найӧс кынмӧмысь.
Кытшовтіс Кӧдзыд пӧль став вӧр-васӧ да долыд лои сылы сьӧлӧм вылас. Чӧв-лӧнь быдлаын. Весиг йӧз гежӧда мыччывлӧны нырнысӧ ывлаӧ. Ломтӧмаӧсь гортаныс ыджыд пачьяс да шонтысьӧны паччӧр выланыс. Сідзкӧ сійӧ бура вӧчис, мый сетіс быдӧнлы шойччыны тулысӧдз. Мед коді узьӧ да вугралӧ. Тулыс воас да бӧр ставыс ловзяс. А сійӧ сэки ылі войвылӧ пышйылас локтан тӧлӧдз.
Пуксис сэки Кӧдзыд пӧль джуджыд сён весьтӧ. Пукалӧ да нимкодясьӧ вӧчӧм уджнас. Долыд сылы, мый гӧгӧр чӧв-лӧнь. Сӧмын корсюрӧ пашляк лыйсьӧ пуяссӧ чашкӧдлігмоз. И друг сійӧ кыліс, кыдзи тайӧ чӧв-лӧньсӧ торкис кутшӧмкӧ аслыснога сьылӧм гор. Кӧдзыд пӧль весиг дрӧгнитіс. Коді нӧ лысьтіс торкны тайӧ чӧв-лӧньсӧ, коді оз кӧсйы узьны тулысӧдзыс?
Видзӧдліс сійӧ сёнлӧн увтасінлань да пыр жӧ гӧгӧрвоис, коді оз кӧсйы сылысь кывзысьны. Тайӧ ичӧтик ёль вӧлӧма. Писькӧдчӧма ключ ваа ёль му пытшкӧсысь да со ӧні долыда визувтӧ водзӧ. Кӧть и лым шебрас вевттис сійӧс, но ёльыд оз кӧсйы мукӧд моз узьны да мыйкӧ ас кежысь нимкодьпырысь сьылігмоз писькӧдчӧ пыр водзӧ и водзӧ увлань. Весиг еджыд шебрасыс сійӧс оз кут. Тыдалӧ, кӧсйӧ садьмӧдны и дыр нин узьысь паськыд юсӧ.
Дӧзмис быдсӧн сэки Кӧдзыд пӧль. Мыйла нӧ кодкӧ лысьтӧ торкны сыӧн вӧчӧм уджсӧ. Ӧд пыр на сідз вӧлі, мый тӧвнас став вӧр-ва узьӧ. И мый нӧ лоӧ, садьмӧдас кӧ шорыс юсӧ. Сэки ставнас гӧгӧр торксяс. Кадысь водз воас тулысыс. А гожӧмнас ставыс кынмас. Дерт, ичӧтик шорыдлӧн, гашкӧ, выныс та вылӧ оз тырмы. И век жӧ Кӧдзыд пӧльӧс тайӧ пондіс ёна майшӧдлыны да сійӧ кутіс мый вынсьыс пӧлявны ключ ваа ёль вылӧ, мед кыдзкӧ кынтыны сійӧс.
Но ӧтнаслӧн сылӧн, тыдалӧ, выныс та вылӧ эз жӧ тырмы. Сійӧс корис отсӧг вылӧ мукӧд томджык Кӧдзыд пӧльясӧс. Но мыйта кӧть найӧ эз пӧлявны, сідзи и эз вермыны унмовськӧдны ключ ваа ёльтӧ. Сійӧ пыр визувтіс лым шебрас улын да негораа сьыліс. Ӧвтыштчис сэки кинас Кӧдзыд пӧль да шогпырысь вешйис бокӧ. Шог вӧлі сыысь, мый и сылӧн выныс оз тырмы быдтор вылӧ.
Сӧмын эз куж гӧгӧрвоны Кӧдзыд пӧль, кӧть вӧлі и ыджыд вежӧраӧн, мый тайӧ ключ ваа ёльыс петӧ му пытшкысь да буретш муыс и сетӧ сылы ассьыс вын-эбӧссӧ. Со и оз кӧсйы некодлы сетчыны ёльыд да лун и вой, кутшӧм кӧть кӧдзыд эз вӧв, дугдывтӧг визувтӧ водзӧ гораа сьылігмоз.
