КУИМ ЛУН ДА НЭМ

Тӧв шӧр, 21 лун.

Ӧтчыд тэ шуин, мый йитӧдыс йӧз да миян костын — кодӧнкӧ шуштӧм тӧвся войӧ чинтӧм сунис. Тайӧ суниссӧ кӧрталігӧн, мукӧдкӧд ми ӧтлаасям, а мукӧдкӧд сідз жӧ колям некор йитны позьтӧм сунис помъясын. Ми видзӧдам ӧта-мӧд вылӧ, но ог кылӧ ёрта ёртнымӧс, и та вӧсна колям гӧгӧрвотӧмъясӧн. Ми горзам, но чизыр тӧв миянысь гораджык. Ми кӧсъям воськовтны водзӧ, но полам усьӧмысь. Ми корам шонді югӧръяс, но, найӧс аддзигӧн, куням синъяснымӧс да сідзи и кольччам помтӧг ӧшавны асланым сунис помын.

А чайтін-ӧ тэ, мый весиг ӧти сунис помын ӧшйысь ловъяс коркӧ вермасны лоны тӧдтӧмъясӧн? Ме эска, мый миянлӧн тадз оз ло... Некор... Сӧмын воддза олӧм вылам видзӧдлігӧн, пола мӧвпыштны мӧдӧс...

Тэ кӧсъян юавны, мыйла ме гижа та йылысь ӧні, ӧд сӧмын талун на вои гортӧ? Карса олӧм бӧрын сиктса сынӧд садьмӧдӧ ичӧтдырсянь на вунӧм мӧвпъяс да эскӧмъяс... Заводитан видзӧдны олӧм вылӧ мӧд синъясӧн. Карса тшынӧн вевттьысьӧм лов аддзӧ шудлун медводдза шонді югӧрысь, мича лым чирйысь, вӧр-ва шыясысь... Гашкӧ, и сідз... Но ӧні вежӧрӧй менам чужан сиктса мичысь ылын...

Тӧв шӧр, 22 лун.

Ме эг чайт, мый татшӧм кокни юалӧм вылӧ тэнад лоас сы мында вочакыв. Но эг на гӧгӧрво, бур тайӧ али лёк, сьӧлӧм пытшкын и водзджык, быттьӧ ру пытшкысь, кылі тэнсьыд кывъястӧ. Ог кӧсйы велӧдны тэнӧ, мыйкӧ гӧгӧрвоӧдны, сӧмын сы вӧсна, мый и менӧ некор некод оз гӧгӧрво.

Тэ дась сетны ассьыс дневникъястӧ мортлы, кодкӧд ёртасян сӧмын некымын тӧлысь ... Мыйла? Тӧда: весиг ме бы тадзи некор эг вӧч. Тэ бара шуан, мый карса морт уна пӧв сьӧкыдджык сиктсаысь? Сійӧ дзугсьӧма олӧмас, быттьӧ черань везйын. И, мудзӧм, ставӧн кольӧм, оз нин и мӧвпышт корсьны петанінсӧ. Джуджыд керкаяс вевттьӧны сӧмын на петны заводитӧм шонді, лэбачьяслысь сьылӧм важӧн нин вежисны гым кодь шуштӧм шыяс. Сӧмын лэччӧны найӧ оз енэжсянь, а му пыдӧссянь уна мытшӧд пыр кайӧны и кайӧны вывлань. Мый вайӧны найӧ йӧзлы? Кутшӧм тӧдчанлун видзӧны?

Дерт, сиктса морт олӧ мӧдторйӧн... мый йылысь тэ тӧдны он вермы, а ме, кӧнкӧ, важӧн нин вунӧді... либӧ кӧсйи вунӧдны... кӧть ӧні ставыс тайӧ ӧткодь. Ми олам миянлы сетӧм олӧмӧн, паныд шыасьтӧг, нинӧм вежтӧг. Сӧмын вежӧны ӧта-мӧдсӧ ёртъяс, кыдз коркӧ вежасны и миянӧс. Но ми полам мӧвпыштны та йылысь, чайтсьӧ, мый ӧні вывті на водз... а кор лоӧ сёр, дойсӧ йӧз синъясысь дзебигӧн, ми кутам овны водзӧ. Овны и овны водзӧ...

Тӧв шӧр, 23 лун.

Тӧдан, талунъя пӧся ыпъялысь вӧртасын эм кутшӧмкӧ тӧдчанлун... Кутшӧмкӧ сійӧ лажмыд и пыдіса, виччысьтӧм и лӧсьыд, миркӧд йитана и сэтшӧм дженьыд... Сылӧн ставсӧ шымыртысь би быттьӧ ӧзтіс синмӧн судзтӧм лым толаяс, ӧта-мӧд борся сулалысь ловтӧм керкаяс. Татшӧм вӧртас ме аддзылі нин некымын во сайын, но мый йылысь ме мӧвпалі сэки, мыйӧн олі — вочавидзны сьӧкыд. Мый кӧсйӧ сины меным ӧшинь пыр джоджӧ водысь гӧрд югӧр? Вайӧ сійӧ кутшӧмкӧ юӧр али весь шуӧ йӧзлы шонді пырӧм йылысь? Гашкӧ, тэ и вермин бы гӧгӧрвоны сылысь вежӧртассӧ, вӧлін кӧ тані.... А ме, кӧнкӧ, и вунӧді нин, а вермас вӧвсьыны, некор эг и велавлы гӧгӧрвоны.

Мыйла тӧвся кымӧр сэтшӧм пыдӧстӧм да чусыд? Быттьӧ прӧшви, орйӧдлӧм енэж косявлӧ менсьым лолӧс...

Весьшӧрӧ гижа ме тайӧс тэныд, ӧд роч кыв вылӧ вуджӧдӧм бӧрын тайӧ кывъясыс кутасны видзны ас пытшканыс мӧдджык тӧдчанлун, мӧдджык сьӧлӧм кылӧм. Но ме эска... мыйӧ ме эска?..

Кусі алӧйгӧрд кыа, и тшӧтш кыдзкӧ немтор йылысь лои гижны... Регыд ме муна карӧ и бара ачым ог и казявлы, кыдзи дзугся некытчӧ мытшасьтӧм черань везйӧ.

Тэ шулін, мый и уна-уна йӧз дінті мунігӧн, чайтан асьтӧ ӧткаӧн. Ме тӧда: тадзи кокниджык, ӧд йитӧдыс йӧз да миян костын — кодкӧӧн шуштӧм тӧвся войӧ чинтӧм сунис. Тайӧ суниссӧ кӧрталігӧн, мукӧдкӧд ми ӧтлаасям, а мукӧдкӧд сідз жӧ колям некор йитны позьтӧм сунис помъясын...