КРАСНӦЙ ПЛОЩАДЬ ВЫЛЫН


Москва...
Туй помсӧ эз нин дыр коль виччысьны,
И, медым танклысь шойччӧдны мотор,
Машина сувтіс. Гӧгрӧс люкысь мыччысис,
Бинокльӧ кутчысьӧмӧн, вермахтса майор.

А водзын грымгис чорыд канонада.
Уралса сталькӧд паныдасис Рур.
Эз тӧд майор, мый райыс лоӧ адӧн,
И шуис: «Гут». Мый миян ногӧн: бур.

Люк пӧдлассис, и вӧрзис танкыс, медым
Сьӧд лымті водзӧ мунны, но эз вай
Фашистскӧй зверлы тайӧ туй победа — 
Сук биӧн сійӧс ӧлӧдіс Москва.

Со Краснӧй площадь. Кремль. Со Спасскӧй башня.
Рубинӧвӧй звезда, кыдз символ, гӧрд.
Туристъяс сулалӧны коймӧд час нин, гашкӧ,
Зэв ылӧ коли налӧн ФРГ.

Ныв-гид кыдз колӧ висьталӧ и петкӧдлӧ,
Ӧд гӧстьяс, колӧ петкӧдлыны, дерт.
А ӧти, сой пӧла, пыр чӧв олӧмӧн ветлӧдлӧ
И мӧвпалӧ.
Кӧть сёрӧнкодь, но мед.