КОЛИП


Кыдз пу расын колип кӧнкӧ сьылӧ,
Ӧзтӧ морӧс сьыланкывйыс сылӧн.

— Колип, колип, сӧдз да мича гӧлӧс,
Сьыланкывйыд тэнад кымынпӧлӧс?

Песенниксьыд торйӧд меным джынсӧ,
Кыпӧд менам сьыланкывлысь вынсӧ.

И, мед сійӧ вӧліс мича шыа,
Плавъяліс, кыдз зарни бордъя кыа,

Шуда йӧзлы сьӧлӧмӧдзыс йиджис,
Вермӧмъяслысь выль страница гижис,

Юк тшӧтш ассьыд краскаястӧ меным, —
Тайӧс вӧчны грӧш оз сулав тэныд, —

Ассьыс мича сьыланкывсӧ долиг,
Рассянь меным вочавидзис колип:

— Тэн, поэт, ог жалит сетны сьылан,
Сӧмын некыдз вын оз судзсьы менам.

Тэн кӧ сійӧ колӧ югыд, мича,
Олӧм вылас бурджыка тэ видзӧд, —

Сэсь став мича шыяссӧ тэ кылан,
И сэк тэнад песня лоас вына.

1954 во.