КЛЕТКА АДДЗИГӦН


Руч оліс клеткаын. Кӧть шонді аддзис пыр
И тырмис сынӧдыс, эз овсьы сэні сылы:
Сы дорысь гажыс кӧнкӧ ветлӧдліс зэв ылын,
И вердісны — эз сёй, зверь вомӧ нем эз пыр.

«Кыдз эськӧ пышйыны?» — пыр оліс юрас мӧвп.
Вот сюрис здук — и сійӧ шутёвтіс сьӧд вӧрӧ.
Сэн сійӧ, майбыр пӧ тай, гуляйтнысӧ тӧрӧ, —
Ов — гӧгӧр лача, сімӧсь клеткаӧн оз ӧвт.

Мӧд делӧ фермаын: руч пышйис — сэн урон,
Кыв колӧ кутны: ручысь коді мынтас дон?!
И суӧдісны зверӧс, кутісны сьӧд вӧрысь.

Морт киӧ веськаліс, син водзас сувтіс бӧр
Важ ичӧт клеткаыс, кӧрт сутугаяса йӧр,
Руч думыштіс и потіс сьӧлӧмыс дзик шӧри.

1968